Read Хуыцауы Дзырд иронау Филимонмӕ 1 Bible Online

Филимонмӕ 1 - Хуыцауы Дзырд иронау bible

Филимонмӕ 1

¹Павелӕй, Йесо Чырыстийы сӕраппонд ахӕстӕй, ӕмӕ ӕфсымӕр Тимофейӕ — нӕ уарзон ӕмкусӕг Филимонмӕ,

²нӕ хо Апфиамӕ, не ’мтохгӕнӕг Архиппмӕ ӕмӕ, дӕ хӕдзары цы аргъуан ӕмбырд кӕны, уымӕ.

³Хорзӕх ӕмӕ уын фарн нӕ Фыд Хуыцауӕй ӕмӕ Бардарӕг Йесо Чырыстийӕ.

⁴Ӕз ӕдзух бузныг фӕзӕгъын мӕ Хуыцауӕн, мӕ куывды дӕу дӕр куы ӕрымысын, уӕд.

⁵Уымӕн ӕмӕ ӕз хъусын, Бардарӕг Йесойыл куыд тынг ӕууӕндыс, ӕппӕт сыгъдӕджыты цы уарзтӕй уарзыс, уый тыххӕй.

⁶Ӕз кувын, цӕмӕй, немӕ дын иумӕйаг цы уырнындзинад у, уый ахъаз уа, Чырыстийы сӕраппонд хорзӕй саразын нӕ бон цы у, уый базонынӕн.

⁷Дӕ уарзт нын ӕрхаста стыр цин ӕмӕ нӕ ныфс бауагъта, уымӕн ӕмӕ дӕ фӕрцы, ме ’фсымӕр, срухс сты сыгъдӕджыты зӕрдӕтӕ.

⁸Уымӕ гӕсгӕ мын кӕд Чырысти бар дӕтты, дӕуӕй, цы саразын дын ӕмбӕлы, уый домын,

⁹уӕддӕр дӕм хуыздӕрыл нымайын ӕрхатын, уымӕн ӕмӕ дӕ уарзын — ӕз, зӕронд Павел, ныр та Йесо Чырыстийы сӕраппонд — ахст лӕг.

¹⁰Курын дӕ, ахӕстоны куы уыдтӕн, уӕд мӕ хъӕбулау чи сси, уыцы Онисимы тыххӕй.

¹¹Кӕддӕр дын уымӕй пайда[1] нӕ уыди, ныр та дӕуӕн дӕр ӕмӕ мӕнӕн дӕр пайда у. Ӕмӕ дӕм ӕй фӕстӕмӕ ӕрвитын,

¹²раст дын цыма мӕ зӕрдӕ дӕттын, афтӕ.

¹³Хъавыдтӕн ӕй мемӕ ныууадзынмӕ, Фарны Уацы сӕраппонд цалынмӕ ахӕстоны дӕн, уӕдмӕ мын дӕ бӕсты ӕххуыс куыд кодтаид.

¹⁴Фӕлӕ мӕ де ’вастӕй ницы бакӕнын бафӕндыд, цӕмӕй дӕ уыцы хорз хъуыддаг ӕвӕндонӕй арӕзт ма ӕрцӕуа, фӕлӕ — барвӕндонӕй.

¹⁵Дӕуӕй цыбыр ӕмгъуыдмӕ, чи зоны, уый тыххӕй фӕхицӕн ис, цӕмӕй йыл сӕмбӕлай ӕхсызгонӕй ӕмӕ мыггагмӕ уа демӕ,

¹⁶цагъар дын мауал уа, фӕлӕ цагъарӕй уӕлдӕр — уарзон ӕфсымӕр. Ӕз ӕй бирӕ уарзын, фӕлӕ дӕуӕн та ноджы зынаргъдӕр суыдзӕн — куыд адӕймаг ӕмӕ Чырыстиимӕ иудзинады фӕрцы де ’фсымӕр.

¹⁷Уӕдӕ кӕд демӕ иу хъуыддагыл кусӕм, уӕд ыл баузӕл, мӕныл куыд баузӕлис, афтӕ.

¹⁸Кӕд истӕмӕй дӕ хъыджы бацыди кӕнӕ дӕ истӕмӕй хӕсджын у, уӕд ӕй нымай мӕ хӕсыл.

¹⁹Ӕз, Павел, мӕхи къухӕй фыссын: бафиддзынӕн дын ӕй. Дӕхӕдӕг дӕр хӕсджын дӕ мӕ разы, фӕлӕ дын ӕз уыцы хӕсы кой нал кӕнын.

²⁰Уӕдӕ, ме ’фсымӕр, мӕн фӕнды, Бардарӕг Йесоимӕ иу кӕй стӕм, уый фӕрцы дӕуӕй фӕпайда кӕнын; Чырыстийы сӕраппонд мын барухс кӕн мӕ зӕрдӕ.

²¹Ӕз дӕм ныффыстон, кӕй мӕм байхъусдзынӕ, ууыл фидарӕй ӕууӕндгӕйӕ. Цӕй тыххӕй дын зӕгъын, уымӕй фылдӕр кӕй сараздзынӕ, ӕз уый зонын.

²²Уыимӕ ма мын уат дӕр ӕрцӕттӕ кӕн. Уымӕн ӕмӕ мӕ зӕрдӕ дарын, Хуыцау уын уӕ куывд кӕй айсдзӕн ӕмӕ мын сымахимӕ ӕрыздӕхыны фадат кӕй балӕвар кӕндзӕн.

²³Саламтӕ дын ӕрвитынц, Йесо Чырыстийы сӕраппонд мемӕ ахӕстоны чи ис, уыцы Эпафрас,

²⁴ме ’мкусджытӕ Марк, Аристарх, Димас ӕмӕ Лука.

²⁵Нӕ Бардарӕг Йесо Чырыстийы хорзӕх уемӕ уӕд!