Read Хуыцауы Дзырд иронау Фӕтӕгтӕ 21 Bible Online

Фӕтӕгтӕ 21 - Хуыцауы Дзырд иронау bible

Фӕтӕгтӕ 21

¹Израилӕгтӕ Мицпайы куы ӕрӕмбырд сты, уӕд ард бахордтой: «Нӕ чызджыты Бениамины мыггагӕн моймӕ нал ратдзыстӕм».

²Уый фӕстӕ адӕм ацыдысты Вефилмӕ ӕмӕ бон-изӕрмӕ Дунедарӕджы раз хъӕрӕй фӕкуыдтой. Уыдон дзырдтой:

³«О Дунедарӕг, Израилы Хуыцау! Ацы бӕллӕх ныл цӕй тыххӕй ӕрцыди? Ныр Израил йӕ иу мыггагӕй куы фӕцух!»

⁴Дыккаг бон райсомӕй израилӕгтӕ нывондхӕссӕн сарӕзтой, иууылсудзинаг нывӕндтӕ ӕмӕ фидыды нывӕндтӕ ӕрхастой.

⁵Адӕм фарстой кӕрӕдзийы: «Дунедарӕджы раз куы ӕрӕмбырд стӕм, уӕд Израилы хӕдзарвӕндӕгты ’хсӕн, чи не ’рбацыдис, ахӕм разынди?» Афтӕ та уымӕн фарстой, ӕмӕ стыр ард бахордтой, Мицпамӕ Дунедарӕджы раз ӕрлӕууынмӕ чи не ’рбацӕуа, уыдоны удӕгасӕй нӕ ныууадздзыстӕм, зӕгъгӕ.

⁶Израилӕгтӕ се ’фсымӕртыл, Бениамины мыггагыл, хъыг кодтой ӕмӕ дзырдтой: «Ныр Израил йӕ иу мыггагӕй куы фӕцух!

⁷Чи ма дзы аирвӕзт, уыдонӕн устытӕ кӕм ссардзыстӕм? Мах Дунедарӕджы раз сомы куы ракодтам, нӕ чызджыты сын моймӕ нал ратдзыстӕм, зӕгъгӕ!»

⁸Кӕрӕдзийы фарстой: «Израилы хӕдзарвӕндӕгты ’хсӕн, Мицпамӕ Дунедарӕджы раз ӕрлӕууынмӕ чи не ’рбацыди, ахӕм ис?» Фӕстагмӕ рабӕрӕг ис, уыцы ӕмбырды Галаадӕй, Иавешы сахарӕй, кӕй ничи уыди, уый.

⁹Ӕгас ӕфсад банымадтой, ӕмӕ дзы Галаадӕй, Иавешы сахарӕй, ничи разынди.

¹⁰Уӕд Израилы дзыллӕ уыцы сахармӕ дыууадӕс мин хӕстоны арвыстой ӕмӕ сын бафӕдзӕхстой: «Ацӕут ӕмӕ Галаадаг Иавешы цӕрджыты ныццӕгъдут, ӕд устытӕ ӕмӕ ӕд сывӕллӕттӕ.

¹¹Мӕнӕ уын бардзырд: нӕлгоймӕгты се ’ппӕты дӕр, стӕй мойгонд сылгоймӕгты иууылдӕр амарут ӕмӕ ӕлгъыстаг фӕкӕнут».

¹²Галаадаг Иавешы разынди цыппарсӕдӕ ӕнӕцыд чызджы. Израилӕгты рӕсӕнуат уыдис Ханааны, Силомы сахары, ӕмӕ чызджыты уырдӕм акодтой.

¹³Уый фӕстӕ Израилы дзыллӕ, Бениамины фӕдонтӕй Риммоны къӕдзӕхы цур чи бамбӕхсти, уыдонмӕ минӕвӕрттӕ арвыстой, бафидауӕм, зӕгъгӕ.

¹⁴Бениамины байзӕддӕгтӕ сӕ хӕдзӕрттӕм ӕрыздӕхтысты, ӕмӕ сын Галаады, Иавешы сахары, удӕгасӕй кӕй ныууагътой, уыцы ӕнӕцыд чызджыты моймӕ радтой. Фӕлӕ чызджытӕ се ’ппӕты фаг нӕ уыдысты.

¹⁵Адӕм хъыг кодтой Бениамины мыггагыл. Дунедарӕг сӕ Израилы иу мыггагӕй фӕцух кодта,

¹⁶ӕмӕ адӕмы хистӕртӕ сагъӕсы бацыдысты: «Бениамины мыггагӕй ма чи аирвӕзти, уыдонӕн устытӕ цы хуызы ссарӕм, сӕ хӕдзарвӕндаджы иу сылгоймаг дӕр куынӕуал баззад, уӕд?»

¹⁷Ӕмӕ загътой: «Бениамины фӕдонтӕй ма чи аирвӕзт, уыдонӕн сӕ зӕхх хъуамӕ сӕ хӕдзарвӕндаджы къухы баззайа, Израилы хӕдзарвӕндӕгтӕй хъуамӕ иунӕг дӕр ма фесӕфа.

¹⁸Нӕ чызджыты сын моймӕ раттын махӕн нӕ бон нӕу, уымӕн ӕмӕ израилӕгтӕ сомы ракодтой, йӕ чызджы Бениамины мыггагӕй искӕмӕн чи радта, уый ӕлгъыст уыдзӕни, зӕгъгӕ».

¹⁹Уый фӕстӕ сӕ зӕрдыл ӕрлӕууыди, Силомы ӕрвылаз Дунедарӕджы номыл куывд кӕй фӕкӕнынц, уый. Уыцы сахар ис Вефилӕй цӕгатӕрдӕм, Левонайы сахарӕн йӕ хуссарварс, Вефил ӕмӕ Шехемы астӕу цы фӕндаг ис, уымӕй та — скӕсӕны ’рдӕм.

²⁰Адӕмы хистӕртӕ Бениамины фӕдонтӕн бафӕдзӕхстой: «Ацӕут Силоммӕ ӕмӕ сӕндӕтты бамбӕхсут.

²¹Силомаг чызджыты кафгӕ куы фенат, уӕд-иу разгъорут ӕмӕ-иу сӕм фӕлӕбурут. Алчидӕр дзы йӕхицӕн фӕйнӕ иуы ракӕнӕд, ӕмӕ-иу уый фӕстӕ Бениамины зӕхмӕ раздӕхут.

²²Сӕ ныййарӕг фыдтӕ ӕмӕ нӕм се ’фсымӕртӕ хъаст кӕнынмӕ куы ’рбацӕуой, уӕд сын зӕгъдзыстӕм: „Батӕригъӕд нын кӕнут, ныууадзут нын уӕ чызджыты. Хӕсты рӕстӕг нӕ алкӕмӕн ус ссарын нӕ бантысти. Стӕй кӕд уӕ чызджытӕ сӕ къухы уӕхи фӕндонӕй нӕ бафтыдысты, уӕд тӕригъӕдджын не стут“».

²³Бениамины байзӕддӕгтӕ, куыд сын загътой, афтӕ бакодтой. Алчидӕр дзы йӕхицӕн скъӕфт чызджытӕй, кафгӕ чи кодта, уыдонӕй, иуы ракодта ӕмӕ сӕ зӕххы хаймӕ аздӕхтысты. Сӕ хъӕутӕ ногӕй рацарӕзтой ӕмӕ дзы ӕрцардысты.

²⁴Израилӕгтӕ дӕр сӕ хӕдзӕрттӕм фӕцыдысты. Алчидӕр раздӕхти йӕ хӕдзарвӕндагмӕ, йӕ мыггагмӕ. Иууылдӕр сӕ зӕххы хӕйттӕм фӕцыдысты.

²⁵Уыцы заман Израилӕн паддзах нӕ уыди ӕмӕ алчидӕр, раст ӕм куыд касти, афтӕ кодта.