Read Хуыцауы Дзырд иронау Фӕтӕгтӕ 7 Bible Online

Фӕтӕгтӕ 7 - Хуыцауы Дзырд иронау bible

Фӕтӕгтӕ 7

¹Райсомӕй раджы Иеруббаал, ома Гедеон, йе ’фсадимӕ Хароды суадоны был рӕсӕнуат скодта. Мидианӕгты рӕсӕнуат та уыдис цӕгатӕрдыгӕй, дӕлвӕзы, Морейы хохы цур.

²Дунедарӕг Гедеонӕн загъта: «Демӕ ӕгӕр бирӕ адӕм ис, мидианӕгты уын басӕттын нӕ бауадздзынӕн, уымӕн ӕмӕ уӕд израилӕгтӕ фестырзӕрдӕ уыдзысты, нӕхи хъарутӕй не знӕгтыл фӕуӕлахиз стӕм, зӕгъгӕ.

³Хӕстонтӕн фехъусын кӕн: тӕрсгӕ чи кӕны ӕмӕ ныфс кӕмӕ нӕй, уыдон Галаады хӕхтӕй ацӕуӕнт». Дыууӕ ӕмӕ ссӕдз мин лӕджы фӕстӕмӕ сӕ хӕдзӕрттӕм аздӕхтысты, дӕс мины та уым баззадысты.

⁴Дунедарӕг загъта Гедеонӕн: «Нырма дӕм уӕддӕр бирӕ адӕм ис. Суадоны былмӕ сӕ акӕн ӕмӕ дын уым Мӕхӕдӕг равзардзынӕн хӕстонтӕ. Кӕмӕй дын зӕгъон, уыдон демӕ ацӕудзысты, иннӕтӕ баззайдзысты».

⁵Гедеон йӕ хӕстонты суадоны былмӕ акодта, ӕмӕ Дунедарӕг загъта: «Дон нуазынмӕ зӕххыл чи адӕлгом уа ӕмӕ дон куыдзау йе ’взагӕй чи сдӕра, уыдоны-иу слӕууын кӕн иуӕрдыгӕй, йӕ уӕрджытыл лӕугӕйӕ, дон къухӕй чи нуаза, уыдоны та — иннӕрдыгӕй».

⁶Ӕртӕсӕдӕ лӕджы дон сдӕрдтой се ’взагӕй, иннӕтӕ иууылдӕр сӕ уӕрджытыл ӕрлӕууыдысты ӕмӕ дон къухӕй нуӕзтой.

⁷Дунедарӕг Гедеонӕн загъта: «Дон йе ’взагӕй чи сдӕрдта, уыцы ӕртӕсӕдӕ лӕджы хъаруйӕ уын мидианӕгты басӕттын кӕндзынӕн. Иннӕтӕ сӕ хӕдзӕрттӕм ацӕуӕнт».

⁸Израилӕгтӕн семӕ уыди хӕринаг ӕмӕ сыкъауадындзтӕ. Мидианӕгты рӕсӕнуат уыди дӕле, тъӕпӕны.

⁹Ӕхсӕвы Дунедарӕг Гедеонӕн загъта: «Ныццу дӕлӕмӕ ӕмӕ мидианӕгты рӕсӕнуатмӕ бабырс. Ӕз демӕ дӕн, фӕуӕлахиз сыл уыдзынӕ.

¹⁰Кӕд тӕрсыс, уӕд уал сӕм де ’ххуырст Пураимӕ ныццу

¹¹ӕмӕ сын байхъус сӕ ныхӕстӕм. Уӕд фӕныфсджындӕр уыдзынӕ ӕмӕ рӕсӕнуатмӕ бабырсдзынӕ». Гедеон ӕмӕ йе ’ххуырст Пура, мидианӕгты хъахъхъӕнджытӕ кӕм лӕууыдысты, уырдӕм ныццыдысты.

¹²Мидианӕгтӕ, амалекӕгтӕ ӕмӕ скӕсӕны адӕмтӕ ӕрбынат кодтой дӕлвӕзы. Мӕтыхтау бирӕ уыдысты, сӕ теуатӕ — денджызы змисау, ӕнӕнымӕц.

¹³Гедеон рӕсӕнуатмӕ хӕстӕгдӕр бацыд ӕмӕ фехъуыста дыууӕ лӕджы ныхас. Уыдонӕй иу иннӕмӕн дзырдта: «Ӕз фыны уыдтон, цыма мидианӕгты рӕсӕнуатыл тымбыл хъӕбӕрхоры кӕрдзын фӕцӕйтылди. Цатыры онг куы батылд, уӕд ын ахӕм цӕф ныккодта, ӕмӕ цатыр афӕлдӕхт».

¹⁴Уӕд ын йе ’мбал афтӕ зӕгъы: «Уый израилаг Гедеоны, Иоасы фырты, хъама у. Дунедарӕг ын уӕлахиз радта, ӕмӕ ацы мидианӕгты рӕсӕнуат бацахсдзӕн».

¹⁵Гедеон, фын цы амоны, уый куы фехъуыста, уӕд йӕ зонгуытыл ӕрхауд ӕмӕ Дунедарӕгӕн арфӕ ракодта. Уый фӕстӕ израилӕгты рӕсӕнуатмӕ раздӕхт ӕмӕ ныхъхъӕр кодта: «Сыстут! Дунедарӕг уын мидианӕгты рӕсӕнуат уӕ къухмӕ радта!»

¹⁶Гедеон йе ’ртӕсӕдӕ хӕстоны ӕртӕ къордыл адих кодта, алкӕмӕ дӕр дзы радта сыкъауадындз ӕмӕ афтид хъуырауы ӕмбӕхст цырагъ.

¹⁷Бафӕдзӕхста сын: «Ӕз-иу цы кӕнон, сымах дӕр — уый. Мидианӕгты рӕсӕнуатмӕ куы бацӕуӕм, уӕд-иу мӕн бафӕзмут.

¹⁸Ӕз ӕмӕ, мемӕ цы къорд цӕуы, уыдон сӕ сыкъаудындзтӕй куы ныууасой, уӕд-иу сымах дӕр сӕ рӕсӕнуаты алыварс сыкъауадындзтӕй ныууасут ӕмӕ хъӕр кӕнут: „Дунедарӕг ӕмӕ Гедеоны сӕраппонд!“»

¹⁹Ӕмбисӕхсӕв мидианӕгты хъахъхъӕнджытӕ кӕрӕдзийы куы баивтой, уӕд Гедеон ӕмӕ, йемӕ цы сӕдӕ хӕстоны уыди, уыдон мидианӕгты рӕсӕнуаты размӕ бацыдысты, сыкъауадындзтӕй ныууасыдысты ӕмӕ сӕ хъуырӕуттӕ ныппырх кодтой.

²⁰Уӕд иннӕ къордты цы хӕстонтӕ уыди, уыдон дӕр сыкъауадындзтӕй ныууасыдысты ӕмӕ сӕ хъуырӕуттӕ ныппырх кодтой. Галиу къухтӕй хӕцыдысты цырӕгътыл, рахизтӕй та — сыкъауадындзтыл, рӕсӕнуаты алыварс сыкъауадындзтӕй уасыдысты ӕмӕ хъӕр кодтой: «Дунедарӕг ӕмӕ Гедеоны сӕраппонд!»

²¹Хӕстонтӕ рӕсӕнуаты алыварс лӕууыдысты, фӕлӕ сӕ бынӕттӕй не змӕлыдысты. Рӕсӕнуаты цы адӕм уыди, уыдон схъомпал сты, хъӕр-хъӕлӕба систой ӕмӕ лидзӕг фесты.

²²Ӕртӕсӕдӕ хӕстоны сыкъауадындзтӕй куы ныууасыдысты, уӕд Дунедарӕг афтӕ бакодта, ӕмӕ мидианӕгтӕ сӕ хъаматӕ кӕрӕдзийы ныхмӕ систой. Сӕ хӕстонтӕ фӕлыгъдысты суанг Бет-Шиттӕйы онг, Церерӕйы ’рдӕм, Таббатмӕ хӕстӕг сахар Авел-Мехолӕмӕ.

²³Гедеон фӕсидти Неффалим, Асир ӕмӕ Менассиайы хӕдзарвӕндӕгтӕм, ӕмӕ мидианӕгты фӕсте асырдтой.

²⁴Ефремы хӕхтӕм дӕр Гедеон фӕдисӕттӕ арвыста: «Хӕхтӕй ӕрхизут ӕмӕ мидианӕгтӕн цӕугӕдонмӕ фӕндаг сӕхгӕнут! Иорданы былгӕрон суанг Бет-Барыйы онг бацахсут!» Ефремы байзӕддӕгтӕ ӕрбамбырд сты ӕмӕ цӕугӕдонмӕ фӕндаг сӕхгӕдтой, Иорданы былгӕрон Бет-Барыйы онг бацахстой.

²⁵Мидианӕгты дыууӕ фӕтӕджы, Зеев ӕмӕ Оревы ӕрцахстой. Зеевы амардтой Зеевы сахары, Оревы та — Оревы сахары. Израилӕгтӕ дарддӕр зылдысты мидианӕгты фӕдыл. Гедеонӕн Иорданы фалейӕ Зеев ӕмӕ Оревы сӕртӕ ӕрбахастой.