Read Хуыцауы Дзырд иронау Руф 4 Bible Online

Руф 4 - Хуыцауы Дзырд иронау bible

Руф 4

¹Боаз сахары кулдуары цурмӕ рацыд ӕмӕ уым сбадти. Кӕй кой кодта, уыцы ӕрвад иуафон йӕ рӕзты фӕцӕйцыд. Боаз ӕм сдзырдта: «Раздӕх ӕмӕ сбад мӕ фарсмӕ». Уый ӕрбаздӕхт ӕмӕ ӕрбадт.

²Боаз сахары хистӕртӕй дӕс лӕгмӕ фӕдзырдта ӕмӕ сын загъта: «Ам ӕрбадут». Уыдон ӕрбадтысты.

³Уӕд Боаз йӕ хӕстӕгӕн загъта: «Моавы бӕстӕй чи ӕрбаздӕхт, уыцы Наоми не ’рвад Елимелехы зӕххы хай уӕй кӕны.

⁴Хабар дӕуӕн зӕгъинагыл банымадтон: балхӕн ӕй — ам чи бады, уыдон ӕмӕ дын мӕ адӕмы хистӕртӕ ӕвдисӕн уыдзысты. Кӕд дӕхимӕ ӕрвады хӕс исыс, уӕд ӕй балхӕн. Кӕд разы нӕ дӕ, уӕд мын ӕй зӕгъ, ӕмӕ йӕ зонон; уымӕн ӕмӕ йӕ иннӕты разӕй дӕуӕн ӕмбӕлы балхӕнын, дӕ фӕстӕ та — мӕнӕн». Уый йын дзуапп радта: «Ӕз ӕй балхӕндзынӕн».

⁵Боаз дарддӕр дзырдта: «Наомийӕ зӕхх куы балхӕнай, уӕд моаваг Руф дӕр дӕуӕн кургӕ у, йӕ мард лӕджы исбон йӕ фӕдонтӕн куыд баззайа, афтӕ».

⁶Уӕд ын йӕ хӕстӕг дзуапп радта: «Ӕрвады хӕс мӕхимӕ райсын нӕу мӕ бон — уӕд мӕхи мулк хӕлӕттаг фӕуыдзӕн. Ды райс уыцы хӕс дӕхимӕ, мӕнӕн мӕ бон нӕу».

⁷Ӕрвады хӕс исыны, науӕд исты ивыны рӕстӕг Израилы кӕддӕр уыди ахӕм ӕгъдау: иу адӕймаг-иу хъуамӕ йӕ дзабыр раластаид ӕмӕ йӕ иннӕмӕ раттаид. Уый Израилмӕ нымад уыди фидыды ӕвдисӕйнагыл.

⁸Ӕмӕ Боазӕн йе ’рвад загъта: «Дӕхӕдӕг ӕй балхӕн». Уыйадыл раласта йӕ дзабыр ӕмӕ йӕм ӕй балӕвӕрдта.

⁹Боаз хистӕртӕн ӕмӕ, уым чи уыди, уыцы ӕппӕт адӕмӕн загъта: «Ныр сымах ӕвдисӕнтӕ стут, Елимелехы мулк ӕнӕхъӕнӕй, стӕй Килеон ӕмӕ Махлоны исбон ӕнӕхъӕнӕй Наомийӕ кӕй балхӕдтон, уымӕн.

¹⁰Ноджы ма курын Махлоны усы, моаваг Руфы, дӕр, йӕ мард лӕджы исбон йӕ фӕдонтӕн куыд баззайа, йӕ ном та йе ’рвадӕлты ӕмӕ сахары цӕрджыты ’хсӕн куыннӕ фесӕфа, афтӕ; абон мын сымах ӕвдисӕнтӕ фӕут».

¹¹Кулдуары цур цы адӕм уыди, уыдон, стӕй хистӕртӕ иууылдӕр иумӕ дзуапп радтой: «Ӕвдисӕнтӕ стӕм! Дӕ къӕсӕрыл цы сылгоймаг бахиздзӕн, уый, ӕгас Израил кӕмӕй рантысти, уыцы Рахел ӕмӕ Леайы фарнӕй схайджын кӕнӕд Дунедарӕг! Ефрафӕйы дын бирӕ бантысӕд, дӕ ном нӕрӕд Вифлеемы!

¹²Дунедарӕг дын ацы ӕрыгон сылгоймагӕй цы байзӕддаг ратдзӕн, уымӕй дӕ хӕдзар, Тамар Иудӕйӕн кӕй ныййардта, уыцы Парецы хӕдзары хуызӕн суӕд».

¹³Боаз ракуырдта Руфы. Ӕмуат ӕрцыдысты, ӕмӕ Дунедарӕджы фӕндӕй Руф банхъӕлцау, лӕппу йын райгуырди.

¹⁴Ӕмӕ сылгоймӕгтӕ Наомийӕн дзырдтой: «Арфӕгонд уӕд Дунедарӕг, ӕгайтма дӕ ӕнӕ бындарӕй нӕ ныууагъта! Йӕ ном скадджын уӕд Израилы!

¹⁵Зӕрдӕрухсы хос дын уыдзӕн, дӕ зӕронды бонты та ӕнӕ дарӕгӕй нӕ баззайдзынӕ, уымӕн ӕмӕ йӕ дӕ чындз, чи дӕ уарзы, уыцы чындз ныййардта — авд фыртӕй дӕр дын хуыздӕр чи у!»

¹⁶Наоми сабийы йӕ хъӕбысмӕ райста ӕмӕ йӕ хъомыл кодта.

¹⁷Сыхы сылгоймӕгтӕ йыл ном сӕвӕрдтой — Овед. Уыдон дзырдтой: «Наомийӕн лӕппу райгуырди». Овед у Йессейы, Давиды фыды, фыд.

¹⁸Мӕнӕ уын Парецы хӕдзарвӕндаг: Парецӕй райгуырд Есром;

¹⁹Есромӕй райгуырд Рам; Рамӕй райгуырд Аминадав;

²⁰Аминадавӕй райгуырди Нахшон; Нахшонӕй райгуырди Салмон;

²¹Салмонӕй райгуырди Боаз; Боазӕй райгуырд Овед;

²²Оведӕй райгуырд Йессей; Йессейӕ райгуырди Давид.