Read Хуыцауы Дзырд иронау 1 Паддзахӕдтӕ 17 Bible Online

1 Паддзахӕдтӕ 17 - Хуыцауы Дзырд иронау bible

1 Паддзахӕдтӕ 17

¹Филистимӕгтӕ хӕстмӕ рацыдысты, се ’фсӕдтӕ ӕрӕмбырд кодтой Иудӕйы зӕххыл, Сохойы. Рӕсӕнуат скодтой Эфес-Даммимы, Сохойӕ Азекайы ’хсӕн.

²Саул ӕмӕ Израилы ӕфсад дӕр ӕрӕмбырд сты. Ӕрбынат кодтой Теревинфы[1] дӕлвӕзы ӕмӕ филистимӕгтимӕ тохмӕ сӕхи ӕрцӕттӕ кодтой.

³Филистимӕгтӕ лӕууыдысты иу хохыл, израилӕгтӕ та — иннӕ хохыл. Се ’хсӕн уыди дӕлвӕз.

⁴Филистимаг ӕфсадӕй рацыд иу богал, йӕ ном — Голиаф, Гаты сахайраг. Йӕ ас — ӕхсӕз ӕлмӕрины ӕмӕ уылынг.

⁵Йӕ сӕрыл уыд ӕрхуы тахъа, йӕ уӕлӕ та — фондз мин шекелы чи ласта, ахӕм згъӕрхӕдон, ӕрхуы цӕгтӕй конд.

⁶Йӕ къӕхтыл уыд ӕрхуы зӕнгӕйттӕ, йӕ фӕсонтыл — ӕрхуы уарт.

⁷Йӕ арцы хъӕд — тынуафӕн хъилы йас, арцӕн йе ’фсӕйнаг бырынкъ ласта ӕхсӕзсӕдӕ шекелы. Йӕ разӕй цыд йӕ уартхӕссӕг.

⁸Голиаф ӕрлӕууыд ӕмӕ ныхъхъӕр кодта Израилы ӕфсады ’рдӕм: «Цӕмӕн рацыдыстут, хӕстӕргомӕй цы ’рлӕууыдыстут? Ӕз филистимаг куы дӕн, сымах та — Саулы цагъартӕ! Равзарут уе ’хсӕн иу лӕг, ӕмӕ мӕм ӕрхизӕд.

⁹Кӕд йӕ бон мемӕ рахӕцын суа ӕмӕ мӕ амара, уӕд уын мах уыдзыстӕм цагъартӕ. Ӕз ыл фӕтых дӕн ӕмӕ йӕ амардтон, зӕгъгӕ, уӕд та нын сымах уыдзыстут цагъартӕ ӕмӕ нын кӕндзыстут лӕггад».

¹⁰Ноджы ма филистимаг загъта: «Фидиссаг уӕ кӕндзынӕн абон, Израилы ӕфсад! Рарвитут мӕм иу хӕстон, ӕмӕ лӕгӕй-лӕгмӕ рахӕцӕм».

¹¹Саул ӕмӕ ӕппӕт израилӕгтӕ филистимагӕй уыцы ныхӕстӕ куы фехъуыстой, уӕд фӕудаист сты, стыр тас сӕ бацыди.

¹²Давид уыд ефрафаг, иудейаг Вифлеемы цӕрӕг Йессейы фырт. Йессейӕн аст фырты уыди. Саулы заман бацыд йӕ зӕронды кары.

¹³Йе ’ртӕ хистӕр фырты Саулы фӕдыл ацыдысты хӕцынмӕ. Сӕ нӕмттӕ уыдысты: хистӕрӕн — Елиав, дыккагӕн — Авинадав, ӕртыккагӕн та — Шамма.

¹⁴Давид уыди ӕфсымӕрты кӕстӕр. Ӕртӕ хистӕры ацыдысты Саулы фӕдыл,

¹⁵Давид та-иу Саулӕй ацыд Вифлееммӕ, йӕ фыды фыстӕ хизынмӕ, стӕй та-иу фӕстӕмӕ ӕрбаздӕхт.

¹⁶Филистимаг-иу райсомӕй дӕр ӕмӕ изӕрӕй дӕр рацыд ӕмӕ-иу израилӕгты раз хылӕргомӕй ӕрлӕууыд. Афтӕ кодта дыууиссӕдз боны дӕргъы.

¹⁷Йессей йӕ фырт Давидӕн бафӕдзӕхста: «Райс-ма де ’фсымӕртӕн мӕнӕ ацы цӕкуыты ефӕ ӕмӕ ацы дӕс дзулы ӕмӕ сын сӕ рӕвдз рӕсӕнуатмӕ фӕхӕццӕ кӕн.

¹⁸Ацы дӕс цыхты та ахӕсс миныхицауӕн. Фен, де ’фсымӕртӕ куыд сты, цы сты, уый ӕмӕ, ӕнӕфыдбылыз кӕй сты, уый нысанӕн сӕ исты ӕрбахӕсс.

¹⁹Де ’фсымӕртӕ Саул ӕмӕ иннӕ израилӕгтимӕ Теревинфы дӕлвӕзы филистимӕгтимӕ хӕцынц».

²⁰Давид райсомӕй раджы фысты дзуг уӕтӕргӕсы ӕвджид бакодта ӕмӕ аласта йӕ уаргъ, Йессей йын куыд бафӕдзӕхста, афтӕ. Куы бахӕццӕ, уӕд ӕфсӕдтӕ хӕстӕввонгӕй рацӕйцыдысты, тохы хъӕр систой, афтӕмӕй.

²¹Израилӕгтӕ ӕмӕ филистимӕгтӕн се ’фсӕдтӕ ныхӕй-ныхмӕ ӕрлӕууыдысты.

²²Давид йӕ уаргъ рӕсӕнуатгӕсмӕ фӕуагъта ӕмӕ ӕфсӕдты цурмӕ ауади. Куы бахӕццӕ, уӕд йе ’фсымӕртӕн салам радта.

²³Семӕ куыд ныхас кодта, афтӕ та дын мӕнӕ филистимӕгты ӕфсадӕй размӕ куы рацӕуид сӕ богал, йӕ ном — Голиаф, Гаты сахайраг. Йӕ фидистӕ та йӕ разӕй фесты, ӕмӕ йын сӕ Давид фехъуыста.

²⁴Израилӕгтӕ иууылдӕр, уыцы лӕджы фенгӕйӕ, фыр тӕссӕй лидзӕг фесты.

²⁵Дзырдтой: «Уынут, размӕ чи рацыд, уыцы лӕджы? Израилӕн фидистӕ кӕны. Чи йӕ амарид, уымӕн паддзах балӕвар кӕнид бирӕ исбон ӕмӕ йын раттид йӕ чызджы, стӕй йын йӕ бинонты суӕгъд кӕнид хъалон фидынӕй».

²⁶Давид йӕ цуры лӕуджыты бафарста: «Уыцы филистимаджы чи амара ӕмӕ Израилы фидистӕй чи бахиза, уымӕн цавӕр хорзы бацыдӕуыдзӕн? Чи у, чи, уыцы ӕнӕсунӕт филистимаг, цы фидистӕ кӕны удӕгас Хуыцауы ӕфсадӕн?»

²⁷Адӕм ын раздӕры ныхӕстӕ рафӕзмыдтой: «Ахӕм ӕмӕ ахӕм хӕрзтӕ ӕрцӕудзӕн, чи йӕ амара, уыцы лӕгыл».

²⁸Давид адӕмимӕ цы ныхӕстӕ кодта, уыдон фехъуыста йӕ хистӕр ӕфсымӕр Елиав. Йӕ маст ӕм рафыхт ӕмӕ йын загъта: «Ардӕм цӕмӕн ӕрбацыдтӕ? Ӕдзӕрӕг быдыры нӕ чысыл фысты дзуг кӕй ӕвджид бакодтай? Ӕз зонын, ды къӕйных ӕмӕ налат кӕй дӕ, уый. Дӕ зӕрдӕйы дзӕбӕхӕн хӕстмӕ бакӕсынмӕ ӕрбацыдтӕ».

²⁹Ӕмӕ загъта Давид: «Омӕ цы ракодтон? Бафӕрсын аипп у?»

³⁰Йе ’ргом ӕндӕрӕрдӕм аздӕхта ӕмӕ та ногӕй бафарста. Адӕм та йын раздӕры дзуапп радтой.

³¹Давиды ныхӕстӕ фехъуыстӕуыд, ӕмӕ сӕ рафӕзмыдтой Саулӕн. Уый йӕм фӕсидти.

³²Давид Саулӕн загъта: «Уыцы филистимаг йӕ ныфс макӕмӕн асӕттӕд. Дӕ цагъар ацӕудзӕн ӕмӕ рахӕцдзӕн йемӕ».

³³Саул Давидӕн загъта: «Нӕ бафӕраздзынӕ ды йемӕ хӕцын. Ды нырма лӕппу дӕ, уый та йе ’взонджы бонтӕй нырмӕ — фӕлтӕрд хӕстон».

³⁴Фӕлӕ Давид Саулӕн загъта: «Дӕ цагъар хызта йӕ фыды фыстӕ. Домбай кӕнӕ-иу арс куы ’рбацыд ӕмӕ-иу фыстӕй куы аскъӕфта,

³⁵уӕд-иу ӕй ӕз асырдтон, мӕхи-иу ыл ныццавтон ӕмӕ-иу ын фысы йӕ дзыхӕй скъахтон. Йӕхи-иу мыл куы ӕрбаппӕрста, уӕд та йын-иу йӕ бинаг ӕфсӕрыл фӕхӕст дӕн, ӕрцӕфтӕ-иу ӕй кодтон ӕмӕ-иу ӕй ӕрбамардтон.

³⁶Домбайы дӕр ӕмӕ-иу арсы дӕр амардта дӕ цагъар, ӕмӕ ацы ӕнӕсунӕт филистимаг дӕр ахӕрдзӕн уыдоны хал, уымӕн ӕмӕ фидис кӕны удӕгас Хуыцауы ӕфсадӕн».

³⁷Ноджы ма загъта Давид: «Домбай ӕмӕ-иу мӕ арсы дзӕмбыйӕ цы Дунедарӕг бахызта, Уый мӕ ацы филистимаджы къухӕй дӕр бахиздзӕни». Саул Давидӕн загъта: «Цу уӕдӕ, ӕмӕ дын Дунедарӕг ӕххуысгӕнӕг уӕд».

³⁸Саул йӕ хотыхтӕ скодта Давидыл. Йӕ сӕрыл ын ӕркодта ӕрхуы тахъа, йӕ уӕлӕ йын скодта згъӕрхӕдон,

³⁹стӕй йӕ кард Давиды астӕуыл ӕрбаста. Давид афӕлвӕрдта арацу-бацу кӕнын, фӕлӕ ахӕм хотыхтыл ахуыр нӕ уыд ӕмӕ Саулӕн загъта: «Адонимӕ цӕуын мӕ бон нӕу, ахуыр сыл нӕ дӕн». Ӕмӕ сӕ раласта,

⁴⁰райста йӕ лӕдзӕг, тӕрфы бын бацагуырдта фондз лӕгъз дуры ӕмӕ сӕ йӕ фыййауы хызыны нывӕрдта. Стӕй, йӕ къухы зилгӕ дурӕхсӕн, афтӕмӕй филистимаджы ныхмӕ рацыди.

⁴¹Филистимаг дӕр рацыд, йӕ уартхӕссӕг — йӕ разӕй, афтӕмӕй хӕстӕгӕй-хӕстӕгдӕр кодта Давидмӕ.

⁴²Филистимаг ӕй куы федта, уӕд ыл бабылысчъил, уымӕн ӕмӕ Давид уыдис ӕрыгон лӕппу, сырхуадул ӕмӕ рӕсугъд.

⁴³Филистимаг ын загъта: «Лӕдзӕгимӕ мӕм цы рацыдтӕ? Ӕви дын куыдз дӕн?» Ӕмӕ йӕ хуыцӕуттӕй ралгъыста Давиды,

⁴⁴стӕй йын афтӕ: «Рауай-ма, ӕз дын дӕ мард тугдзых мӕргътӕ ӕмӕ сырдтӕн раттон».

⁴⁵Давид та филистимагӕн ахӕм дзуапп радта: «Ды мӕм кард, арц ӕмӕ ӕхсаргардимӕ рацыдтӕ, ӕз та дӕ ныхмӕ цӕуын Дунедарӕджы, Уӕларвӕфсады Бардарӕджы, фаугӕ кӕй кодтай, уыцы израилаг ӕфсады Хуыцауы номимӕ.

⁴⁶Абон дӕ Дунедарӕг мӕ къухмӕ дӕтты. Амардзынӕн дӕ, дӕ сӕр дын ракӕндзынӕн ӕмӕ дӕ мард дӕр ӕмӕ филистимаг ӕфсады мӕрдтӕ дӕр тугдзых мӕргътӕ ӕмӕ сырдтӕн ратдзынӕн. Уадз ӕмӕ ӕппӕт дуне дӕр базона, Израилӕн Хуыцау кӕй ис, уый.

⁴⁷Уадз ӕмӕ мӕнӕ ацы дзыллӕ дӕр, Израилы адӕм, базоной, Дунедарӕг кард ӕмӕ арцы руаджы кӕй нӕ дӕтты уӕлахиз, уый. Ныр Дунедарӕг Йӕхӕдӕг хӕцы ӕмӕ уӕ ратдзӕни нӕ къухтӕм».

⁴⁸Филистимаг куыддӕр Давиды ’рдӕм рацӕйцыдис, афтӕ Давид хӕстӕргомӕй йӕ размӕ базгъордта,

⁴⁹йӕ къух йӕ хызыны фӕцавта, фелвӕста дур ӕмӕ йӕ дурӕхсӕнӕй фехста. Дур филистимаджы ныхыл сӕмбӕлд ӕмӕ йӕ батыдта. Лӕг зӕххыл дӕлгоммӕ ахауди.

⁵⁰Афтӕмӕй Давид филистимагыл фӕуӕлахиз — ӕнӕ кардӕй, ӕрмӕст дурӕхсӕн ӕмӕ дурӕй. Мӕлӕтдзаг цӕф ын ныккодта.

⁵¹Стӕй Давид базгъордта филистимагмӕ, йӕ кардыл ын ныххӕцыд ӕмӕ йӕ кӕрддзӕмӕй сласта, ӕрцавта дзы филистимаджы ӕмӕ йын йӕ сӕр ралыг кодта. Филистимӕгтӕ сӕ богалы мардӕй куы федтой, уӕд лидзӕг фесты.

⁵²Израилаг ӕмӕ иудейаг хӕстонтӕ уӕлахизы хъӕр ныккодтой ӕмӕ сӕ Гат ӕмӕ Екроны кулдуӕрттӕм сӕ разӕй айстой. Филистимӕгты мӕрдтӕй нал зынди Шаараимы фӕндаг суанг Гат ӕмӕ Екроны онг.

⁵³Израилӕгтӕ фӕстӕмӕ куы раздӕхтысты, уӕд филистимӕгты рӕсӕнуаты хорзӕй цыдӕриддӕр ссардтой, уый рахастой.

⁵⁴Давид филистимаджы сӕр систа ӕмӕ йӕ Йерусалиммӕ ахаста, йӕ хотыхтӕ та йын йӕхи цатыры сӕвӕрдта.

⁵⁵Саул филистимаджы ныхмӕ рацӕугӕ куы федта Давиды, уӕд йе ’фсады хицау Авнеры бафарста: «Авнер, кӕй фырт у уыцы лӕппу?» Авнер ын дзуапп радта: «Паддзах цӕра, нӕ йӕ зонын».

⁵⁶Паддзах загъта: «Базон уӕдӕ, ацы лӕппу кӕй фырт у, уый».

⁵⁷Давид филистимаджы куы амардта, уӕд ӕй, филистимаджы сӕр йӕ къухы, афтӕмӕй Авнер ӕрбахуыдта Саулмӕ.

⁵⁸Саул бафарста: «Кӕй фырт дӕ, лӕппу?» Давид ын дзуапп радта: «Дӕ цагъар вифлеемаг Йессейы фырт».