Read Хуыцауы Дзырд иронау 1 Паддзахӕдтӕ 23 Bible Online

1 Паддзахӕдтӕ 23 - Хуыцауы Дзырд иронау bible

1 Паддзахӕдтӕ 23

¹Давидмӕ хабаргӕнӕг фӕци: «Филистимӕгтӕ балӕбурдтой Кеилайы сахармӕ ӕмӕ мустыл хӕлоф кӕнынц».

²Уӕд Давид Дунедарӕджы бафарста: «Ацӕуон ӕмӕ уыцы филистимӕгты басӕттон?» Дунедарӕг ын дзуапп радта: «Ацу, филистимӕгты басӕтт ӕмӕ Кеилайы сахар ссӕрибар кӕн».

³Фӕлӕ Давидӕн йӕ адӕм загътой: «Мах мӕнӕ Иудейы дӕр тарст куы стӕм, уӕд куыд хъуамӕ ацӕуӕм Кеиламӕ, филистимаг ӕфсады ныхмӕ?»

⁴Давид та ногӕй бафарста Дунедарӕджы, ӕмӕ йын Дунедарӕг дзуапп радта: «Ныццу Кеиламӕ, филистимӕгты дын дӕ къухтӕм дӕттын».

⁵Давид йӕ адӕмимӕ Кеиламӕ ацыд ӕмӕ филистимӕгтимӕ схӕцыди, басаста сӕ ӕмӕ сын сӕ фос ратӕлӕт кодта. Афтӕмӕй Давид фервӕзын кодта Кеилайы цӕрджыты.

⁶Ахимелехы фырт Авиафар Давидмӕ куы ӕрбалыгъд, уӕд Кеиламӕ ахаста ефод дӕр.

⁷Саулӕн фехъусын кодтой, Давид Кеиламӕ кӕй ӕрцыд, уый. Ӕмӕ Саул загъта: «Хуыцау мын ӕй мӕ къухтӕм радта. Къӕппӕджы бахауд ӕмӕ, кулдуар ӕмӕ ӕхгӕнӕнтӕ цы сахарӕн ис, уымӕй йын раирвӕзӕн нал ис».

⁸Саул ӕппӕт адӕммӕ дӕр хӕстмӕ фӕсидти, Кеиламӕ ныццӕуӕм ӕмӕ Давид ӕмӕ йӕ адӕмыл ӕрхъула кӕнӕм, зӕгъгӕ.

⁹Давид Саулы фыдвӕнд куы базыдта, уӕд фӕдзырдта сауджын Авиафармӕ: «Рахӕсс-ма ефод».

¹⁰Давид загъта: «Дунедарӕг, Израилы Хуыцау! Дӕ цагъар фехъуыста, Саул Кеиламӕ ӕрцӕуинаг кӕй у ӕмӕ мӕн тыххӕй сахар ныггӕныстон кӕнынмӕ кӕй хъавы, уый.

¹¹Кеилайы цӕрджытӕ мӕ йӕ къухтӕм ратдзысты ӕви нӕ? Дӕ цагъар цы фехъуыста, уый раст у? Ӕрцӕудзӕни Саул? Дунедарӕг, Израилы Хуыцау, раргом ӕй кӕн Дӕ цагъарӕн». Дунедарӕг ын дзуапп радта: «Ӕрцӕудзӕн».

¹²Давид та бафарста: «Кеилайы цӕрджытӕ мӕн дӕр ӕмӕ мӕ адӕмы дӕр Саулы къухтӕм ратдзысты ӕви нӕ?» Дунедарӕг загъта: «Ратдзысты».

¹³Уӕд Давид ӕмӕ йӕ адӕм, иу-ӕхсӕзсӕдӕ лӕджы, ныууагътой Кеила ӕмӕ цыдысты, сӕ къах сӕ кӕдӕм хаста, уырдӕм. Саулмӕ фӕхабар чындӕуыд, Давид Кеилайӕ алыгъди, зӕгъгӕ, ӕмӕ уӕд йӕ фӕнд аивта стӕры ацӕуыны тыххӕй.

¹⁴Давид йӕхи бааууон кодта ӕдзӕрӕг быдыры. Царди Иудейы хӕхты, Зифы хохрӕбын ӕдзӕрӕг быдыры. Иудадзыг Саул йӕ фӕдыл зылди, фӕлӕ йын ӕй Хуыцау йӕ къухтӕм нӕ лӕвӕрдта.

¹⁵Давид базыдта, Саул йӕ агурӕг кӕй рацыд, уый. Уӕд Давид уыди Зифы ӕдзӕрӕг быдыры, Хорешы.

¹⁶Уыцы рӕстӕг Саулы фырт Ионатан араст ис Хорешмӕ, Давидмӕ. Хуыцауыл дӕ зӕрдӕ дар, зӕгъгӕ дзы ныфс бауагъта.

¹⁷Загъта йын: «Ма тӕрс, нӕ дӕм баххӕсдзӕни мӕ фыд Саулы къух. Ды паддзахиуӕг кӕндзынӕ Израилӕн, ӕз та дӕ фӕстӕ дыккаг лӕг уыдзынӕн. Уый мӕ фыд Саул дӕр зоны».

¹⁸Дунедарӕджы раз та кӕрӕдзийӕ ногӕй ӕрдхӕрдтӕ загътой. Ӕмӕ Давид баззади Хорешы, Ионатан та йӕ хӕдзармӕ раздӕхт.

¹⁹Зифӕгтӕ ссыдысты Гевӕмӕ, Саулмӕ, ӕмӕ йын радзырдтой: «Давид махмӕ ис, Хорешы фидӕртты бады — Йешимоны хуссарварс Хакилайы къуыбырыл.

²⁰Ӕмӕ дӕ куыддӕр бафӕнда, паддзах, афтӕ-иу рацу. Паддзахы къухмӕ йӕ раттын та мах бар уадз».

²¹Саул сын загъта: «Дунедарӕджы арфӕ уыл сӕмбӕлӕд — фӕтӕригъӕд мын кодтат.

²²Цӕут ӕмӕ ноджы бӕстондӕр базонут, кӕцы ран ис, уый, стӕй сбӕлвырд кӕнут, уым ӕй чи федта, уый дӕр. Куыд мын загъдӕуыд, афтӕмӕй хин ӕмӕ кӕлӕн у.

²³Сбӕрӕг кӕнут, кӕм фембӕхсы, ӕппӕт уыцы бынӕттӕ ӕмӕ-иу мӕм бӕлвырд хабаримӕ ӕрбаздӕхут. Уӕд ӕз дӕр ацӕудзынӕн уемӕ, ӕмӕ кӕд ацы зӕххыл ис, уӕд ӕй Иудӕйы ӕппӕт мыггӕгты ’хсӕнӕй дӕр скъахдзынӕн».

²⁴Ӕмӕ зифӕгтӕ Саулы разӕй ацыдысты сӕ сахармӕ. Давид ӕмӕ йӕ адӕм уыдысты Йешимоны хуссарварс, Маоны ӕдзӕрӕг быдыры, дӕлвӕзы.

²⁵Саул йӕ адӕмимӕ ацыди Давиды агурынмӕ. Давидмӕ фӕхабар кодтой, ӕмӕ Маоны ӕдзӕрӕг быдыры къӕдзӕхтӕм йӕхи байста ӕмӕ уым бамбӕхсти. Уый фехъуыста Саул, ӕмӕ Давиды фӕдыл зилын райдыдта Маоны ӕдзӕрӕг быдыры.

²⁶Саул цыди хохӕн йӕ иу фахсыл, Давид ӕмӕ йӕ адӕм — хохӕн йӕ иннӕ фахсыл. Сӕхи хъардтой Саулӕй алидзыныл, фӕлӕ сӕм Саул йӕ адӕмимӕ хӕстӕгӕй-хӕстӕгдӕр кодта.

²⁷Уыцы заман Саулмӕ фӕзынд уацхӕссӕг ӕмӕ йын загъта: «Фӕтагъд кӕн, филистимӕгтӕ нын нӕ зӕхмӕ ӕрбабырстой».

²⁸Уӕд Саул ныууагъта Давиды сурын ӕмӕ араст ис филистимӕгты ныхмӕ хӕцынмӕ. Уӕдӕй фӕстӕмӕ ацы бынат хонынц Селӕ-Махлекот[1].