Read Библи: Сыгъдӕг Райдиан 2 Bible Online

Райдиан 2 - Библи: Сыгъдӕг bible

Райдиан 2

¹Афтӕ сӕнтысти дуне.

²Ӕвдӕм бонмӕ Хуыцау арӕзт фӕци Йе ’ппӕт хъуыддӕгтӕ ӕмӕ уыцы бон ӕрӕнцади Йӕ алы куыстӕй.

³Хуыцау арфӕ ракодта ӕвдӕм бонӕн ӕмӕ йӕ скодта уаз, уымӕн ӕмӕ уыцы бон Йе ’ппӕт хъуыддӕгтӕй ӕрулӕфыди.

⁴Гъе ахӕм у арв ӕмӕ зӕхх сфӕлдисыны таурӕгъ. Дунедарӕг Хуыцау зӕхх ӕмӕ арв куы сфӕлдыста,

⁵уӕд зӕххыл нӕма уыди нӕдӕр къудзи, нӕдӕр зайӕгхал, уымӕн ӕмӕ Дунедарӕг Хуыцау зӕхмӕ доны ’ртах нӕма ӕруагъта, зӕххыл кусынмӕ адӕймаг дӕр нӕма уыд,

⁶фӕлӕ зӕххӕй уӕлӕмӕ хъардта дон ӕмӕ йын ӕфсӕста йе ’ппӕт уӕлцъар.

⁷Дунедарӕг Хуыцау зӕххы рыгӕй сфӕлдыста адӕймаджы, царды комулӕфт дзы бауагъта, ӕмӕ адӕймаг сси удгоймаг.

⁸Дунедарӕг Хуыцау скӕсӕны, Едемы, скодта дыргъдон ӕмӕ дзы ӕрцӕрын кодта Йе сфӕлдыст адӕймаджы, Адамы[1].

⁹Дунедарӕг Хуыцау зӕххӕй сзайын кодта, йӕ уынд зӕрдӕмӕдзӕугӕ, йӕ дыргъ та хӕрынӕн бӕзгӕ кӕмӕн у, алы ахӕм бӕлӕстӕ, дыргъдоны астӕу — царды бӕлас, стӕй хорз ӕмӕ ӕвзӕр базоныны бӕлас.

¹⁰Едемӕй калди цӕугӕдон, донӕй ӕфсӕста дыргъдон ӕмӕ цыппар къабазӕй згъордта дарддӕр.

¹¹Цӕугӕдӕттӕй сӕ иуӕн йӕ ном — Пишон. Уый кӕлы сыгъзӕринарӕх Хавилайы зӕххыл, кӕрӕй-кӕронмӕ.

¹²Уыцы зӕххӕн йӕ сыгъзӕрины хъӕд хорз у, ноджы ма дзы ис хӕрздӕфгӕнӕн чъиу бдолах ӕмӕ зынаргъ дур оникс.

¹³Иннӕ — Гихон, кӕлы Кушы ӕппӕт зӕххыл.

¹⁴Ӕртыккаг — Тигр, кӕлы Ассирийы скӕсӕйнаг фӕрсты. Цыппӕрӕм у Евфрат.

¹⁵Дунедарӕг Хуыцау Адамы ӕрцӕрын кодта Едемы дыргъдоны, цӕмӕй дзы змӕла, зила йӕм.

¹⁶Ноджы ма йын бафӕдзӕхста: «Дыргъдоны бӕлӕстӕй кӕцыфӕндыйы дыргътӕй дӕр хӕр,

¹⁷ӕрмӕст хорз ӕмӕ ӕвзӕр базоныны бӕласмӕ ма бавнал. Йӕ дыргътӕй йын куы фӕхъӕстӕ уай, уӕд уыцы бон ӕрбамӕлдзынӕ».

¹⁸Дунедарӕг Хуыцау загъта: «Адамӕн хорз нӕу иунӕгӕй цӕрын. Сфӕлдисон ын йӕхи аккаг ӕххуысгӕнӕг».

¹⁹Дунедарӕг Хуыцау зӕххӕй сӕнтысын кодта алы сырд ӕмӕ алы маргъ, ӕрбакодта сӕ Адаммӕ, цы нӕмттӕ сын ратдзӕни, уый фенынмӕ. Алы цӕрӕгойыл дӕр хъуамӕ баззадаид, адӕймаг ын цы ном ратта, уый.

²⁰Адам радта нӕмттӕ алы фос, алы уӕларвон маргъ ӕмӕ алы зӕххон цӕрӕгойӕн. Фӕлӕ уыдоны ’хсӕн адӕймагӕн аккаг ӕххуысгӕнӕг нӕ разынд.

²¹Ӕмӕ уӕд Дунедарӕг Хуыцау Адамыл бафтыдта тарф фынӕй. Куы бафынӕй ис, уӕд ын йӕ фӕрсчытӕй иу систа ӕмӕ фӕрсчы бынат сӕхгӕдта буарӕй.

²²Адамӕй цы фӕрск систа, уымӕй Дунедарӕг Хуыцау сфӕлдыста сылгоймаджы ӕмӕ йӕ ӕрбакодта Адаммӕ.

²³Нӕлгоймаг загъта: «Мӕнӕ гъе, ай у мӕ туг, ме стӕгӕй; уый хуындзӕни сылгоймаг, уымӕн ӕмӕ нӕлгоймагӕй ист у».

²⁴Уымӕ гӕсгӕ адӕймаг ныууадздзӕни йӕ фыд ӕмӕ йӕ мады, баиу уыдзӕн йӕ усимӕ, ӕмӕ суыдзысты иу буар.

²⁵Сӕ дыууӕ дӕр, нӕлгоймаг ӕмӕ йӕ ус, уыдысты мадард бӕгънӕг, фӕлӕ сӕм уый худинаг нӕ касти.