Read Библи: Сыгъдӕг Райдиан 29 Bible Online

Райдиан 29 - Библи: Сыгъдӕг bible

Райдиан 29

¹Йаков араст ис дарддӕр ӕмӕ скӕсӕйнаг адӕмы бӕстӕм бахӕццӕ ис.

²Иу ран, быдыры, федта цъай, цъайӕн йӕ цуры ривӕд кодтой фысты ӕртӕ дзуджы. Дон-иу сын дардтой ам. Цъайы сӕрыл — стыр къӕй фӕлдӕхт,

³ӕмӕ-иу фыстӕ уырдӕм куы ’рбамбырд сты, уӕд-иу фыййӕуттӕ уыцы къӕй иуварс ассыдтой ӕмӕ-иу сын дон бадардтой, стӕй та-иу къӕй фӕстӕмӕ йӕ бынаты сӕвӕрдтой.

⁴Йаков фыййӕутты бафарста: «Кӕцӕй стут, ме ’фсымӕртӕ?» Дзуапп ын радтой: «Харанӕй».

⁵Йаков та сӕ бафарста: «Нахоры байзӕддаг Лаваны зонут?» Загътой: «Зонӕм ӕй».

⁶Бафарста ма сӕ: «Дзӕбӕх, ӕнӕниз у?» Дзуапп та йын радтой: «Дзӕбӕх у. Уартӕ йӕ чызг Рахел фосимӕ ӕрбацӕуы».

⁷Йаков сын загъта: «Изӕрмӕ ма бирӕ рӕстӕг ис, фос ӕмбырд кӕныны афон нӕма у. Дон сын бадарут ӕмӕ сӕ хизынмӕ аскъӕрут».

⁸Фӕлӕ йын уыдон загътой: «Цалынмӕ дзугтӕ иууылдӕр ӕрӕмбырд уой, уӕдмӕ нӕ бон нӕу. Стӕй цъайы сӕрӕй къӕй ассондзыстӕм ӕмӕ фыстӕн дон бадардзыстӕм».

⁹Йаков ма семӕ куыд ныхас кодта, афтӕ йӕ фыды фысвосимӕ ӕрбахӕццӕ ис Рахел дӕр — уый сӕ хызта.

¹⁰Йаков йӕ мады ’фсымӕр Лаваны чызджы куы ауыдта фыстимӕ, уӕд цъаймӕ бауад, къӕй иуварс ассыдта ӕмӕ Лаваны фосӕн дон бадардта.

¹¹Уый фӕстӕ Йаков Рахелӕн аба кодта ӕмӕ хъӕрӕй ныккуыдта.

¹²Стӕй Йаков загъта Рахелӕн, дӕ фыды хион дӕн, зӕгъгӕ, Ревеккӕйы фырт. Чызг азгъордта ӕмӕ хабар йӕ фыдӕн фехъусын кодта.

¹³Лаваны хъустыл йӕ хойы лӕппу Йаковы кой куы ’рцыди, уӕд разгъордта йӕ размӕ, ахъӕбыс, аба йын кодта ӕмӕ йӕ сӕхимӕ бахуыдта. Йаков ын йӕ хабӕрттӕ иууылдӕр радзырдта,

¹⁴ӕмӕ йын Лаван загъта: «Ды мӕ туг, ме стӕг куы дӕ ӕцӕгдӕр!» Йаков Лаванмӕ иу мӕй куы ацарди,

¹⁵уӕд ын Лаван афтӕ: «Хион мын дӕ, зӕгъгӕ, уӕд мын лӕвар хъуамӕ кусай? Цас мызд дӕ хъӕуы, уый мын зӕгъ!»

¹⁶Ныр Лаванӕн та уыди дыууӕ чызджы, хистӕр — Леа, кӕстӕр та — Рахел.

¹⁷Леайы зӕрдӕмӕдзӕугӕ ничи рахуыдтаид, Рахелмӕ та фыр рӕсугъдӕй бакӕсӕнтӕ нӕ уыд.

¹⁸Йаков бауарзта Рахелы ӕмӕ Лаванӕн загъта: «Дӕ кӕстӕр чызг Рахелы тыххӕй дын бакусдзынӕн авд азы».

¹⁹Лаван ын загъта: «Ӕндӕр искӕмӕн раттыны бӕсты йӕ дӕуӕн ратдзынӕн. Ам баззай».

²⁰Йаков Рахелы тыххӕй бакуыста авд азы, ӕмӕ йӕм фӕкастысты цалдӕр боны хуызӕн, уымӕн ӕмӕ Рахелы уарзгӕ кодта.

²¹Йаков Лаванӕн загъта: «Мӕ усаджы мын ратт — ныр афон у, ӕмӕ йемӕ бацӕрон».

²²Лаван ӕрхуыдта ӕппӕт сыхбӕсты дӕр ӕмӕ куывд скодта.

²³Ӕцӕг, ӕхсӕвы Йаковмӕ бакодта йӕ чызг Леайы, ӕмӕ уый йемӕ ӕмуат ӕрцыди.

²⁴Йӕ чызг Леайӕн лӕггад кӕнынӕн Лаван радта йӕ унӕут Зилпайы.

²⁵Райсомӕй Йаков кӕсы, ӕмӕ дын мӕнӕ йӕ фарсмӕ Леа! Лаванӕн бауайдзӕф кодта: «Уый мын цы бакуыстай? Ӕз дӕм Рахелы тыххӕй куы фӕфыдӕбон кодтон! Цӕмӕн мӕ афӕлывтай?»

²⁶Лаван ын загъта: «Махмӕ афтӕ нӕ фӕкӕнынц, кӕстӕр чызджы хистӕры разӕй моймӕ нӕ фӕдӕттынц.

²⁷Аимӕ уал уӕ чындзӕхсӕвы къуыри ахицӕн уӕд, стӕй дын иннӕйы дӕр ратдзыстӕм, ӕрмӕст мӕм уый тыххӕй дӕр авд азы бакус».

²⁸Йаков сразы ис, ӕмӕ чындзӕхсӕвы къуыри куы ахицӕн ис, уӕд ын Лаван радта йӕ чызг Рахелы.

²⁹Лаван йӕ чызг Рахелӕн лӕггад кӕнынӕн радта йӕ унӕут Билхайы.

³⁰Афтӕмӕй Йаков ӕмуат ӕрцыди Рахелимӕ дӕр ӕмӕ йӕ фылдӕр уарзта Леайӕ. Лаванмӕ ма бакуыста ноджыдӕр авд азы.

³¹Дунедарӕг федта, Йаковӕн Леа ӕнад кӕй у, уый ӕмӕ йын радта зӕнӕджы амонд, Рахел та разынд ӕнӕзӕнӕг.

³²Леа банхъӕлцау ис, ныййардта лӕппу ӕмӕ йыл сӕвӕрдта ном Рувим. «Дунедарӕг мын федта мӕ маст, — загъта уый, — ныр мӕ, ӕнӕмӕнг, бауарздзӕни мӕ мой».

³³Банхъӕлцау та ис, ӕмӕ та йын райгуырди лӕппу. Загъта: «Дунедарӕг федта, мӕ мойӕн ӕнад кӕй дӕн, уый ӕмӕ ма мын радта ацы лӕппуйы дӕр». Сӕвӕрдта йыл ном Симеон.

³⁴Банхъӕлцау та ис, ӕмӕ та йын райгуырди лӕппу. Загъта: «Ацы хатт мӕ мой ӕрӕмуд уыдзӕни мемӕ, уымӕн ӕмӕ йын ӕртӕ фырты ныййардтон». Уымӕ гӕсгӕ йыл ӕвӕрд ӕрцыди ном Левий.

³⁵Ногӕй та банхъӕлцау ис, ӕмӕ та йын райгуырди лӕппу. Загъта: «Ныр стаудзынӕн Дунедарӕджы!» Уымӕ гӕсгӕ йыл сӕвӕрдта ном Иудӕ. Уый фӕстӕ Леайӕн цот нал цыди.