Read Библи: Сыгъдӕг 2 Паддзахӕдтӕ 16 Bible Online

2 Паддзахӕдтӕ 16 - Библи: Сыгъдӕг bible

2 Паддзахӕдтӕ 16

¹Давид хохы сӕрӕй иу чысыл ӕруад, афтӕ ӕдуаргъ дыууӕ хӕрӕгимӕ йӕ размӕ фӕци Мефивошеты фӕсдзӕуин Цива. Хӕрджыты уаргъ — дыууӕсӕдӕ дзулы, чисмисы сӕдӕ халы, легъуиты сӕдӕ халы ӕмӕ сӕны лалым.

²Паддзах Цивайы фӕрсы: «Адон дӕ цӕмӕн хъӕуынц?» Цива дзуапп радта: «Хӕрджытӕ — цӕмӕй сыл паддзахы хӕдзаронтӕ цӕуой, дзул ӕмӕ дыргътӕ — дӕ дӕлдӕртӕн хойрагӕн, сӕн та — ӕдзӕрӕг быдыры чи бастайа, уыдонӕн нуазынӕн».

³Паддзах та йӕ бафарста: «Ӕмӕ дӕ хицауы фырт кӕм ис?» Цива йын дзуапп радта: «Уый Йерусалимы баззад — афтӕ ӕнхъӕлы, ӕмӕ йын израилӕгтӕ ныр йӕ фыды паддзахад фӕстӕмӕ ратдзысты».

⁴Паддзах Цивайӕн загъта: «Уӕдӕ Мефивошеты мулк иууылдӕр дӕу фӕуӕд». Цива йын дзуапп радта: «Ныллӕг дын кувын. Дӕ хорзӕх мӕ уӕд, мӕ бардарӕг, паддзах!»

⁵Паддзах Давид Бахуримы сахармӕ куыддӕр бахӕццӕ, афтӕ уырдыгӕй рацыд иу лӕг Саулы мыггагӕй, йӕ ном — Шими, Герайы фырт. Цӕугӕ-цӕуын ӕлгъыста,

⁶Давид ӕмӕ паддзахы дӕлдӕртыл дуртӕ ӕхста, кӕд паддзах Давидӕн йӕ адӕм ӕмӕ йӕ гуыппырсартӕ йӕ фӕйнӕфарс цыдысты, уӕддӕр.

⁷Шими афтӕ ӕлгъыста паддзахы: «Фесӕф мӕ разӕй, лӕгмар, ӕнаккаг!

⁸Кӕй паддзахы бадӕн байстай, уыцы Саулы хӕдзары туг дӕ исы Дунедарӕг. Дӕ паддзахад дӕр дын дӕ фырт Авессаломӕн радта. Ды фыдбылызы бахаудтӕ, уымӕн ӕмӕ дӕ къухтӕ тугӕйдзаг сты».

⁹Церуайы фырт Авишай паддзахӕн загъта: «Ацы хӕдмӕл куыдз мын мӕ хицауы, паддзахы, цӕмӕн ӕлгъиты? Ныртӕккӕ йын йӕ сӕр атӕхын кӕндзынӕн!»

¹⁰Паддзах загъта: «Цы уӕ фӕнды, Церуайы фырттӕ! Уымӕн мӕ ӕлгъиты, ӕмӕ йын Дунедарӕг афтӕ загъта. Уӕд ын кӕй бон у, афтӕ цӕмӕн кӕныс, зӕгъгӕ, бауайдзӕф кӕнын?»

¹¹Ноджы ма Давид загъта Авишай ӕмӕ йӕ иннӕ дӕлдӕртӕн: «Мӕхи фырт мӕ марынвӕнд куы кӕны, уӕд ма Бениамины мыггагӕй та цы бадомон? Ныууадзут ӕй. Уадз ӕмӕ ӕлгъита, уымӕн ӕмӕ йын Дунедарӕгӕй афтӕ фӕдзӕхст у.

¹²Кӕд Дунедарӕг ӕркӕсид, къӕхты бын мӕ куыд кӕнынц, уымӕ, ӕмӕ мын абоны ӕлгъыст хорзӕн фӕкӕнид».

¹³Давид йӕ адӕмимӕ фӕндагыл цыдысты, Шими та — хохы фахсыл. Давиды ӕлгъыста, дуртӕ ӕмӕ йыл сыджыты къуыбӕрттӕ ӕхста.

¹⁴Паддзах ӕмӕ йӕ адӕм фӕлладӕй бахӕццӕ сты Иорданы былгӕронмӕ ӕмӕ ӕрулӕфынмӕ уым ӕрлӕууыдысты.

¹⁵Ныр Авессалом та ӕппӕт израилӕгтимӕ бацыд Йерусалиммӕ. Ахитофел дӕр уыди йемӕ.

¹⁶Аркаг Хушай, Давиды лымӕн, Авессаломмӕ бацыд ӕмӕ йын загъта: «Ӕгас цӕуӕд паддзах! Ӕгас цӕуӕд паддзах!»

¹⁷Авессалом Хушайӕн зӕгъы: «Афтӕ ӕнувыд дзы куынӕ уай дӕ лымӕныл! Цӕуылнӕ ацыдтӕ йемӕ?»

¹⁸Хушай йын дзуапп радта: «Нӕ! Дунедарӕг, стӕй мӕнӕ ацы адӕм ӕмӕ ӕппӕт Израил кӕй равзӕрстой, уый цагъар дӕн ӕз дӕр ӕмӕ йемӕ баззайдзынӕн.

¹⁹Стӕй Давиды фыртӕй хуыздӕр кӕмӕн хъуамӕ балӕггад кӕнон? Дӕ фыдӕн цы лӕггад кодтон, уыцы лӕггад кӕндзынӕн дӕуӕн дӕр».

²⁰Авессалом Ахитофелӕн бафӕдзӕхста: «Цӕй ӕмӕ бауынаффӕ кӕнӕм, дарддӕр нын цы гӕнгӕ у, уый тыххӕй».

²¹Ахитофел ын загъта: «Ӕрӕмуат у дӕ фыды номылустытимӕ, хӕдзаргӕс кӕй ныууагъта, уыдонимӕ. Ӕппӕт Израил фехъусдзӕни, дӕ фыдӕн мыггагмӕ дӕр кӕй фенӕуынон дӕ, уый, ӕмӕ демӕ чидӕриддӕр ис, уыдон ӕнгомдӕр ӕрбалӕудзысты дӕ фарсмӕ».

²²Авессаломӕн уӕлхӕдзар цатыр айтыгътой, ӕмӕ уый ӕгас Израилы раз ӕмуат ӕрцыди йӕ фыды номылустытимӕ.

²³Ахитофелы уынаффӕтӕ уыцы заман нымад уыдысты, цыма исчи зондамынд Хуыцауӕй куырдта, уыйау. Ахӕм кад ын кодтой йӕ алы уынаффӕйӕн Давид дӕр ӕмӕ Авессалом дӕр.