Read Библи: Сыгъдӕг 2 Паддзахӕдтӕ 20 Bible Online

2 Паддзахӕдтӕ 20 - Библи: Сыгъдӕг bible

2 Паддзахӕдтӕ 20

¹Уыцы рӕстӕг се ’хсӕн фӕци иу ӕнаккаг лӕг, Бениамины мыггагӕй, Бихрийы фырт Савей. Сыкъауадындзӕй ныууасыди уый ӕмӕ ныхъхъӕр кодта: «Махӕн та ма ныр Давид чи у? Йессейы фыртимӕ мах цы хъуыддаг ис? Гъӕй кӕнут уӕ цатыртӕм, израилӕгтӕ!»

²Израилӕгтӕ дӕр Давиды фӕуагътой ӕмӕ Бихрийы фырт Савейы фӕдыл фӕраст сты. Иудейӕгтӕ та сӕ паддзахимӕ баззадысты ӕмӕ Иорданӕй суанг Йерусалимы онг йемӕ фӕцыдысты.

³Паддзах Давид Йерусалиммӕ йӕ галуанмӕ куы ӕрбаздӕхт, уӕд, хӕдзаргӕс кӕй ныууагъта, йӕ уыцы дӕс номылусы ӕрцӕрын кодта, хъахъхъӕнджытӕ сын кӕм уыд, ахӕм хӕдзары. Хъуаг сӕ ницӕмӕй уагъта, фӕлӕ сӕм цӕугӕ нӕ кодта. Ӕмӕ уыдон идӕдз устытау, ӕхгӕд цард кӕнгӕйӕ, цардысты уым сӕ амӕлӕты онг.

⁴Паддзах Амасайӕн загъта: «Ӕртӕ боны дын ӕмгъуыд дӕттын, ӕмӕ мын фӕдзур ӕппӕт иудейӕгтӕм дӕр, стӕй дӕхӕдӕг дӕр ам куыд уай, афтӕ».

⁵Амаса ацыд иудейӕгтӕм фӕдзурынмӕ, фӕлӕ ӕмгъуыды бонмӕ уый йӕ къухы нӕ бафтыди.

⁶Давид загъта Авишайӕн: «Ныр нын Бихрийы фырт Савей, гӕнӕн ис ӕмӕ Авессаломӕй дӕр фыддӕр фыдбылызтӕ сараза. Гъемӕ дӕ паддзахы хӕстонты демӕ акӕн ӕмӕ йӕ фӕсте асур, цалынмӕ йӕхицӕн фидар сахартӕ не ссардта ӕмӕ нӕ йӕхи нӕ фӕтылиф кодта, уӕдмӕ».

⁷Йоавы адӕм, керетӕгтӕ ӕмӕ пелетӕгтӕ, се ’ппӕт дӕр — гуыппырсартӕ, Авишай сӕ сӕргъы, афтӕмӕй феггуырстысты Йерусалимӕй ӕмӕ Бихрийы фырт Савейы фӕдыл афӕдис кодтой.

⁸Гивоны цур цы стыр дур ис, уымӕ куы баввахс сты, уӕд Амаса сӕ размӕ фӕци. Йоав — йӕ хотыхты, йӕ цирхъ — йӕ астӕуыл баст, ӕмӕ йын цӕугӕ-цӕуын кӕрддзӕмӕй ӕрхауд.

⁹Йоав Амасайы фӕрсы: «Куыд дӕ, ме ’фсымӕр?» — ӕмӕ йын рахиз къухӕй йӕ боцъомӕ бавнӕлдта, цыма йын ба кодта, афтӕ.

¹⁰Амаса йын йӕ иннӕ къухы кард нӕ фӕхъуыды кодта, ӕмӕ йын ӕй Йоав йӕ гуыбыны ныссагъта. Амасайӕн йӕ хуылфыдзаумӕттӕ зӕхмӕ ӕркалдысты ӕмӕ амарди, дыккаг цӕфы сӕр ӕй нал бахъуыд. Йоав ӕмӕ йе ’фсымӕр Авишай дарддӕр атындзыдтой Бихрийы фырт Савейы фӕдыл.

¹¹Йоавы хӕстонтӕй иу Амасайы марды уӕлхъус ӕрлӕууыд ӕмӕ дзырдта: «Йоавы чи нымайы ӕмӕ Давиды фарс чи хӕцы, уый Йоавы фӕдыл рацӕуӕд!»

¹²Ныр Амасайы мард та фӕндаджы астӕу йӕ туджы мӕцыд, ӕмӕ уыцы лӕг куы федта, адӕм йӕ уӕлхъус ӕмбырд кӕнынц, уӕд ӕй фӕндагӕй иуварсмӕ раласта ӕмӕ йыл дарӕс баппӕрста.

¹³Марды фӕсвӕдмӕ айстой фӕндагӕй, ӕмӕ адӕм Йоавы фӕдыл фӕраст сты Бихрийы фырт Савейы агурӕг.

¹⁴Савей ахызти Израилы хӕдзарвӕндӕгты зӕххытыл ӕмӕ Авел-Бет-Маахайы сахармӕ бахӕццӕ ис. Бихрийы байзӕддӕгтӕ ӕмткӕй йемӕ бамбал сты ӕмӕ сахармӕ йӕ фӕдыл бацыдысты.

¹⁵Йоавы ӕфсад дӕр бахӕццӕ ис Авел-Бет-Маахамӕ ӕмӕ йыл ӕрхъула кодта. Сахары сисрӕбын сыджытбыру скодтой ӕмӕ сахары сис ракалыныл архайын райдыдтой.

¹⁶Уӕд иу зонынджын сылгоймаг сисы сӕрӕй ӕрдзырдта: «Байхъусут-ма, байхъусут-ма! Зӕгъут-ма Йоавӕн, ӕмӕ ардӕм ӕввахс ӕрбацӕуа, ӕз ын цыдӕр зӕгъон!»

¹⁷Йоав ӕрбацыди, ӕмӕ йӕ сылгоймаг бафарста: «Уый ды дӕ, Йоав?» Уый дзуапп радта: «Ӕз». Сылгоймаг загъта: «Уӕдӕ дӕ цагъары ныхӕстӕм байхъус». Уый йын дзуапп радта: «Хъусын».

¹⁸Сылгоймаг дзурын райдыдта: «Раздӕр-иу афтӕ загътой, ӕнӕмӕнг Авелы сахары бафӕрсут, зӕгъгӕ, ӕмӕ-иу алы хъуыддаг дӕр афтӕмӕй сарӕзтой.

¹⁹Мах Израилимӕ хъӕрмудӕй цӕрӕм, ӕнувыд ыл стӕм, ды та израилаг сахар ныддӕрӕн кӕнынмӕ хъавыс, уыимӕ — стыр сахар. Цӕмӕн дӕ фӕнды Дунедарӕджы бӕстыхай фехалын?»

²⁰Йоав ын дзуапп радта: «Уый нӕ уыдзӕн! Ӕлгъыст фӕуон, ӕз исты куы бабын кӕнон ӕмӕ куы фехалон!

²¹Хъуыддаг уый мидӕг нӕй. Ефремы хӕхбӕстаг, йӕ ном — Савей, Бихрийы фырт, йӕ къух систа паддзах Давидмӕ. Ӕрмӕстдӕр мын уый раттут, ӕмӕ уын уӕ сахар ӕнцад ныууадздзынӕн». Сылгоймаг загъта Йоавӕн: «Сисы сӕрӕй дын йӕ сӕр ӕрӕппардзысты».

²²Сылгоймаг дзыллӕйы раз ӕрлӕууыди ӕмӕ сын йӕ хъуыды загъта. Уыдон ын йӕ зондмӕ байхъуыстой, Бихрийы фырт Савейӕн йӕ сӕр акъуырдтой ӕмӕ йӕ Йоавмӕ ӕрӕппӕрстой. Уӕд Йоав сыкъауадындзӕй ныууасын кодта, ӕмӕ уыйадыл йӕ адӕм сахары разӕй сӕхи айстой ӕмӕ сӕ хӕдзӕрттӕм ацыдысты, Йоав йӕхӕдӕг та йӕ паддзахмӕ аздӕхт Йерусалиммӕ.

²³Йоав уыди ӕгас Израилы ӕфсады хицау, Йеходайы фырт Бенайа — керетӕгтӕ ӕмӕ пелетӕгты хицау,

²⁴Адорам — цагъайрӕгты хицау, Ахилуды фырт Йошафат — азфыссӕг,

²⁵Шева — нымӕрдар, Цадок ӕмӕ Авиафар — сауджынтӕ;

²⁶иаираг Ира дӕр уыди Давиды сауджын.