Read Библи: Сыгъдӕг 2 Паддзахӕдтӕ 3 Bible Online

2 Паддзахӕдтӕ 3 - Библи: Сыгъдӕг bible

2 Паддзахӕдтӕ 3

¹Саулы хӕдзар ӕмӕ Давиды хӕдзары ’хсӕн хӕст ныддӕргъвӕтин. Давид тыхджынӕй-тыхджындӕр кодта, Саулы хӕдзар та заууатмӕ цыди.

²Давидӕн Хевроны райгуырди фырттӕ: хистӕр — Амнон, йӕ мад изреелаг Ахиноам,

³уый кӕстӕр — Килав, йӕ мад — кармелаг Навалы идӕдз Авигеа, ӕртыккаг — Авессалом, йӕ мад — Гешуры паддзах Талмайы чызг Мааха,

⁴цыппӕрӕм — Адониа, йӕ мад — Хагит, фӕндзӕм — Шефати, йӕ мад — Авитал,

⁵ӕхсӕзӕм — Итреам, йӕ мад Егла. Давидӕн уыдон сӕнтыстысты Хевроны.

⁶Цалынмӕ Саулы хӕдзар ӕмӕ Давиды хӕдзар кӕрӕдзиимӕ хӕцыдысты, уӕдмӕ Авнерӕн Саулы хӕдзарыл йӕ бар тынгӕй-тынгдӕр цыди.

⁷Саулӕн уыди номылус, йӕ ном — Рицпа, Айайы чызг. Иуахӕмы Йевосфет Авнерӕн загъта: «Мӕ фыды номылусмӕ цӕмӕн бацыдтӕ?»

⁸Уыцы ныхӕстӕм Авнер цӕхӕртӕ скалдта: «Ӕз дын куыдз дӕн, иудейӕгтимӕ ӕмдзӕхдон куыд хъуамӕ кӕнон? Кад ӕмӕ радӕй куы лӕггад кӕнын Саулы хӕдзарӕн дӕр, Саулы ӕфсымӕртӕн дӕр ӕмӕ йӕ хӕлӕрттӕн дӕр! Дӕу дӕр Давиды къухмӕ куы нӕ радтон! Уӕд мыл ныр ды сылгоймаджы тыххӕй тӕригъӕд мысыс?

⁹Хуыцау Авнерӕн афтӕтӕ ӕмӕ уфтӕтӕ, стӕй ноджы фыддӕртӕ бакӕнӕд, Дунедарӕг Давидӕн сомы цӕмӕй кодта, ӕз ын уый куынӕ саразон!

¹⁰Цӕмӕй Саулы хӕдзары паддзахдзинадӕн кӕрон ӕрцӕуа, ӕмӕ Давид паддзахиуӕг кӕна Израил ӕмӕ Иудӕйы, Данӕй суанг Беер-Шевӕйы онг».

¹¹Йевосфет ницыуал сфӕрӕзта Авнеры ныхмӕ сдзурын, уымӕн ӕмӕ дзы тӕрсгӕ кодта.

¹²Ныр Авнер та Давидмӕ лӕгтӕ арвыста, цӕмӕй йын зӕгъой: «Ацы зӕхх кӕй хъуамӕ уа, дӕу йеддӕмӕ? Фидыд сараз мемӕ, ӕмӕ дын баххуыс кӕндзынӕн, цӕмӕй ӕппӕт Израилы адӕм дӕ фарс фӕуой». —

¹³«Хорз, — дзуапп ын радта Давид, — сараздзынӕн. Ӕрмӕст дӕ иу хъуыддаг курын: дӕхи мын ма фенын кӕн, Саулы чызг Мелхолӕйы мын демӕ куынӕ ӕрбахонай, уӕд».

¹⁴Давид Саулы фырт Йевосфетмӕ лӕгтӕ арвыста, цӕмӕй йын зӕгъой: «Ратт мын мӕ ус Мелхолӕйы. Ӕз ууыл филистимӕгты сунӕты сӕдӕ лыггаджы бафыстон».

¹⁵Йевосфет Мелхолӕмӕ адӕмы арвыста, цӕмӕй йӕ ракӕной йӕ мойӕ, Лаишы фырт Палтиелӕй.

¹⁶Йӕ мой йӕ фӕдыл Бахуримы онг дзыназгӕ фӕцыди. Авнер ын загъта: «Аздӕх фӕстӕмӕ». Ӕмӕ аздӕхти.

¹⁷Авнер Израилы хистӕрты раз раныхас кодта: «Сымах Давиды уӕхицӕн паддзахӕн рагӕй агуырдтат.

¹⁸Гъеныр уӕ фӕнд сӕххӕст кӕнут, уымӕн ӕмӕ Дунедарӕг афтӕ загъта Давиды тыххӕй: „Мӕ цагъар Давиды фӕрцы Мӕ адӕмы, Израилы, филистимӕгтӕ ӕмӕ се ’ппӕт иннӕ знӕгтӕй фервӕзын кӕндзынӕн“».

¹⁹Афтӕ загъта Авнер Бениамины байзӕддӕгтӕн дӕр. Уый фӕстӕ араст ис Хевронмӕ, Израил ӕмӕ Бениамины хӕдзарвӕндаджы фӕндон Давидӕн радзурынмӕ.

²⁰Ссӕдз лӕджы йемӕ, афтӕмӕй схӕццӕ ис Давидмӕ, Хевронмӕ, ӕмӕ сын Давид куывд скодта.

²¹Авнер Давидӕн загъта: «Цӕй, ӕз ныр ацӕуон ӕмӕ мӕ бардарӕгмӕ, мӕ паддзахмӕ, ӕппӕт Израилы адӕмы дӕр ӕрхонон, цӕмӕй демӕ фидыд саразой, ӕмӕ ды паддзах уай, кӕмӕн дӕ фӕнды, уыдонӕн се ’ппӕтӕн дӕр». Давид сразы ис Авнеры ныхасыл, ӕмӕ уый фарнимӕ араст ис.

²²Уыцы рӕстӕг Давиды хӕстонтӕ, Йоав сӕ сӕргъы, афтӕмӕй дзӕвгар ӕфтиагимӕ хӕстон балцӕй ӕрбаздӕхтысты. Авнеры Давидмӕ нал баййӕфтой Хевроны, уымӕн ӕмӕ йӕ уый уӕдмӕ ауагъта, ӕмӕ фарнимӕ ацыди.

²³Йоав куыддӕр Давиды хӕстонтимӕ ӕрхӕццӕ ис, афтӕ йӕм хабаргӕнӕг фӕци, Неры фырт Авнер паддзахмӕ уыди ӕмӕ йӕ уый фарнимӕ ауагъта, зӕгъгӕ.

²⁴Йоав паддзахмӕ бацыди ӕмӕ йын загъта: «Уый цы бакодтай? Авнер дӕм йӕхи къахӕй куы ӕрбацыди, уӕд ма йӕ цӕмӕн ауагътай?

²⁵Зонгӕ йӕ куы кӕныс, Неры фырт Авнер дӕ афӕливынмӕ хъавы, хъуамӕ дын дӕ ацыд ӕмӕ ӕрбацыд сбӕлвырд кӕна, дӕ фӕндтӕ дын базона».

²⁶Йоав Давиды разӕй куы рацыди, уӕд йе ’вастӕй Авнеры фӕстӕ йӕ адӕмы арвыста, ӕмӕ йӕ уыдон Сирайы донуаты цурӕй фӕстӕмӕ раздӕхтой.

²⁷Авнер Хевронмӕ фӕстӕмӕ куы баздӕхти, уӕд ӕй Йоав кулдуарӕй фӕмидӕг кодта, цыма йын аивӕй цыдӕр зӕгъынмӕ хъавыд, уый хуызӕн ӕмӕ йын уым йӕ гуыбын барӕхуыста, йе ’фсымӕр Асаелы туг дзы райста.

²⁸Хабар фехъусгӕйӕ, Давид загъта: «Дунедарӕджы раз ӕнустӕм сыгъдӕг дӕн ӕз, ӕмӕ мӕ паддзахад дӕр сыгъдӕг у: мӕ азым нӕй Неры фырт Авнеры тугныккалды.

²⁹Уыцы туджы азар Йоавы сӕрыл ӕмӕ йӕ мыггаджы фӕдыл ӕфтыд фӕуӕд! Йоавы хӕдзар макуы схицӕн уӕд нӕлгоймаджы низтӕ ӕмӕ хъотырӕй, йӕ байзӕддӕгтӕ лӕдзӕджы ӕнцӕйтты цӕуӕнт, кардылӕфтыд фӕуӕнт ӕмӕ къӕбӕрӕй хъуаг ӕййафӕнт!».

³⁰Йоав ӕмӕ йе ’фсымӕр Авишай та Авнеры, се ’фсымӕр Асаелы сын кӕй амардта Гивоны хӕсты, уый тыххӕй амардтой.

³¹Йоав ӕмӕ, йемӕ чи уыди, ӕппӕт уыцы адӕмӕн Давид загъта: «Уӕ дарӕс арӕдувут фӕйнӕрдӕм, сӕхъистӕ скӕнут уӕ уӕлӕ ӕмӕ Авнерыл уӕ цӕссыг калут». Паддзах Давид йӕхӕдӕг дӕр Авнеры сынты фӕдыл цыди.

³²Хевроны йӕ бавӕрдтой, ӕмӕ йыл паддзах йӕ зӕппадзы цур хъӕлӕсы дзагӕй куыдта. Йемӕ куыдтой ӕппӕт дзыллӕ дӕр.

³³Авнерыл паддзах ахӕм хъарӕг скодта: «Ӕнаккаджы адзал цӕмӕн каст уӕддӕр Авнермӕ?

³⁴Дӕ къухтӕ баст дӕр куы нӕ уыдысты, дӕ къӕхтыл хъадамантӕ дӕр куы нӕ уыд; фыдгӕнджыты къухӕй чи амӕлы, уыйау куыд бабын дӕ!» Ӕмӕ йыл дзыллӕ ноджы тынгдӕр ныккуыдтой.

³⁵Фӕстӕдӕр, рухс ма уыди, афтӕмӕй адӕм иууылдӕр Давидмӕ хатыдысты, цӕмӕй исты скомдзаг кӕна. Фӕлӕ Давид ард бахордта: «Афтӕтӕ ӕмӕ уфтӕтӕ, стӕй мын ноджы фыддӕртӕ бакӕнӕд Хуыцау, ӕз хуры аныгуылдмӕ мӕ дзыхмӕ исты куы схӕссон, уӕд!»

³⁶Адӕм уый куы федтой, уӕд сын ӕхсызгон уыди, паддзахы алы хъуыддаг дӕр-иу сын куыд ӕхсызгон уыд, афтӕ.

³⁷Уыцы бон ӕппӕт ӕфсад, стӕй Израилы адӕм иууылдӕр, базыдтой, Неры фырт Авнеры мӕлӕтмӕ паддзах кӕй ницы бар дары, уый.

³⁸Паддзах йӕ дӕлдӕртӕн загъта: «Абон Израилы стыр ӕфсады хицау кӕй амарди, уый зонут.

³⁹Кӕд мӕ паддзахӕй байсӕрстой, уӕддӕр мӕнмӕ нырма уый бӕрц тых нӕй, ацы Церуайы фырттӕ та ӕгӕр ӕгъатыр сты. Фӕлӕ сын Дунедарӕг схос кӕнӕд сӕ фыдракӕнды тыххӕй!»