Read Библи: Сыгъдӕг 3 Паддзахӕдтӕ 6 Bible Online

3 Паддзахӕдтӕ 6 - Библи: Сыгъдӕг bible

3 Паддзахӕдтӕ 6

¹Израилӕгтӕн Мысыры цагъарадӕй се ссӕрибарыл цыппарсӕдӕ ӕстай азы куы рацыд, уӕд Соломон йӕ паддзахиуӕджы цыппӕрӕм азы дыккаг мӕйы, зивы мӕйы, Дунедарӕгӕн Кувӕндон аразын райдыдта.

²Соломон Дунедарӕгӕн цы Кувӕндон саразын кодта, уымӕн йӕ дӕргъ уыдис ӕртиссӕдз ӕлмӕрины, йӕ уӕрх — ссӕдз ӕлмӕрины, йӕ бӕрзӕнд та — дӕс ӕмӕ ссӕдз ӕлмӕрины.

³Кувӕндонӕн йӕ тыргъы дӕргъ уыди сӕйраг агъуыстӕн йӕ уӕрхы йас — ссӕдз ӕлмӕрины, йӕ уӕрх та — дӕс ӕлмӕрины.

⁴Соломон Кувӕндонӕн скодта ӕмырӕхгӕд рудзгуытӕ куыд мидӕмӕ фӕтӕндӕргӕнгӕ фӕлгуыртимӕ.

⁵Кувӕндон ӕмӕ Рухсмонуаты алыварс быруйӕн йе ’мкъул скодта ӕфтуанагъуыст фӕрссаг хатӕнтимӕ.

⁶Цӕмӕй ӕфтуанагъуыст Кувӕндоны къултыл ма ӕндзӕва, уый тыххӕй быру ӕддӕрдыгӕй кӕрӕй-кӕронмӕ конд ӕрцыди къӕпхӕнты хуызы; агъуыстӕн йӕ бинаг уӕладзыджы уӕрх уыди фондз ӕлмӕрины, дыккаг уӕладзыджы уӕрх — ӕхсӕз ӕлмӕрины, ӕртыккаджы уӕрх та — авд ӕлмӕрины.

⁷Кувӕндон арӕзт цыди цӕттӕкарст дуртӕй, ӕмӕ дзы уымӕ гӕсгӕ нӕдӕр дзӕбуджы, нӕдӕр сарты, нӕдӕр ӕндӕр исты ӕфсӕн кусӕнгарзы хъӕр хъуыст.

⁸Ӕфтуанагъуыстӕн йӕ бинаг уӕладзыгмӕ Кувӕндоны хуссарварсӕрдыгӕй уыди дуар. Бинаг уӕладзыгӕй дыккагмӕ, дыккагӕй та ӕртыккагмӕ цыди здыхсгӕ асин.

⁹Кувӕндоны къултӕ амад куы фесты, уӕд ын Соломон йӕ уӕлхӕдзар скӕнын кодта кедр хъайвантӕ ӕмӕ фӕйнӕгӕй.

¹⁰Ӕфтуанагъуысты уӕлхӕдзар дӕр конд ӕрцыди кедры хъӕдӕрмӕгӕй. Кувӕндоны къултимӕ йӕ бастой кедры хъӕдӕй конд аххӕрджытӕ. Ӕфтуанагъуысты уӕладзгуытӕн сӕ бӕрзӕнд дӕр уыди фӕйнӕ фондз ӕлмӕрины.

¹¹Дунедарӕг Соломонӕн загъта:

¹²«Мӕ уагӕвӕрдтӕ ӕмӕ Мын Мӕ амындтытӕм гӕсгӕ куы цӕрай, Мӕ фӕдзӕхстытӕ Мын иууылдӕр куы ӕххӕст кӕнай, уӕд Ӕз сӕххӕст кӕндзынӕн, дӕу тыххӕй дӕ фыд Давидӕн цы дзырд радтон, уый: цы Кувӕндон Мын аразыс, уым, израилӕгты ’хсӕн, цӕрдзынӕн, Мӕ адӕмы ӕвӕгӕсӕгӕй нӕ ныууадздзынӕн».

¹⁴Соломон дарддӕр дӕр архайдта Кувӕндон аразыныл. Йӕ къултӕ ӕмӕ йӕ сӕр куы сцӕттӕ сты,

¹⁵уӕд паддзах бавнӕлдта мидагъуысты куыстытӕм. Йӕ къултыл ын астӕрдӕй цары онг бахуыдта кедр фӕйнӕг, йӕ астӕрдыл та кипарис фӕйнӕг.

¹⁶Фӕстаг къулӕй размӕ ссӕдз ӕлмӕрины ранымадта ӕмӕ уыцы ран кедры хъӕдӕй цӕхгӕрмӕ суагъта ног къул, цӕмӕй йын йӕ фӕстӕ сараза Рухсмонуат.

¹⁷Кувӕндоны раззаг хайӕн йӕ дӕргъ уыди дыууиссӕдз ӕлмӕрины.

¹⁸Кувӕндон мидӕджырдыгӕй иууылдӕр ӕмбӕрзт ӕрцыди кедрӕй, уый уӕлӕ та — алы дидинджытӕ ӕмӕ насӕнгӕс нывӕфтыдтӕ. Алцыдӕр уыди кедры хъӕдӕрмӕгӕй конд, дуртӕ никуыцӕй зындысты.

¹⁹Рухсмонуат Соломон уый тыххӕй скодта, цӕмӕй дзы Дунедарӕджы Фидыды Чырын сӕвӕра.

²⁰Рухсмонуатӕн йӕ дӕргъ, йӕ уӕрх ӕмӕ йӕ бӕрзӕнд уыдысты ӕмиӕстӕ — ссӕдзгай ӕлмӕринтӕ. Соломон ӕй иууылдӕр састӕрдта сыгъдӕг сыгъзӕринӕй. Стӕй, кедр хъӕдӕй цы нывондхӕссӕн скодта, уый дӕр састӕрдта сыгъдӕг сыгъзӕринӕй.

²¹Кувӕндоны раззаг уат дӕр Соломон иууылдӕр састӕрдта сыгъдӕг сыгъзӕринӕй, уыимӕ — Рухсмонуаты къул, ӕмӕ уыцы къулыл цӕхгӕрмӕ айвӕзта сызгъӕрин рӕхыстӕ. Сызгъӕринӕй састӕрдта, Рухсмонуаты раз цы нывондхӕссӕн лӕууыд, уый дӕр.

²³Рухсмонуаты мидӕг оливӕ бӕласы хъӕдӕй скодта дыууӕ херувимы, сӕ бӕрзӕнд уыди фӕйнӕ дӕс ӕлмӕрины.

²⁴Сӕ иуӕн дӕр ӕмӕ иннӕмӕн дӕр йӕ базыртӕ уыдысты фӕндзгай ӕлмӕринты дӕргъӕн, афтӕмӕй базыртыгъд херувимтӕй алкӕцыйӕн дӕр йӕ иу базыры кӕронӕй йӕ иннӕ базыры кӕронмӕ уыди дӕс ӕлмӕрины. Сӕ дыууӕ дӕр уыдысты ӕмиӕстӕ, ӕмхуызӕттӕ.

²⁷Соломон базыртыгъд херувимты сӕвӕрдта Рухсмонуаты мидӕг, кӕрӕдзийы фарсмӕ. Сӕ кӕройнаг базырты кӕрӕттӕ ӕндзӕвыдысты Кувӕндоны фӕйнӕ къулыл, сӕ иннӕ базырты кӕрӕттӕ та — кӕрӕдзиуыл.

²⁸Херувимты дӕр Соломон састӕрдта сыгъзӕринӕй.

²⁹Кувӕндоны ӕппӕт къултыл, мидӕггаг агъуысты дӕр ӕмӕ ӕддаг агъуысты дӕр, скъахта херувимты, пальмӕты ӕмӕ дидинджыты нывӕфтыдтӕ.

³⁰Кувӕндонӕн йӕ астӕрдыл дӕр скодта сыгъзӕрин цъар — рӕбинаг уаты дӕр ӕмӕ раззаг уаты дӕр.

³¹Рухсмонуатмӕ бацӕуӕны скодта дывӕлдах дуар оливӕ бӕласы хъӕдӕй, Уыдис ын фондзкъӕпхӕнон тарвӕзтӕ, иу тарваз — иннӕйы мидӕг.

³²Соломон дуарӕн йӕ дыууӕ хайыл дӕр скъахта херувимты, пальмӕты ӕмӕ дидинджыты нывӕфтыдтӕ, ӕмӕ херувимтӕ ӕмӕ пальмӕты састӕрдта сыгъзӕринӕй.

³³Кувӕндонмӕ бацӕуӕны дӕр Соломон оливӕ бӕласы хъӕдӕй скодта дывӕлдах дуар, уыдис ын цыппаркъӕпхӕнон тарвӕзтӕ, иу тарваз — иннӕйы мидӕг.

³⁴Кипарис хъӕдӕй йын скодта дыууӕ дывӕлдах дуары, алы дуарӕн йӕ дыууӕ ӕрдӕджы дӕр кодтой гом.

³⁵Уыцы дуӕрттыл дӕр Соломон скъахта херувимты, пальмӕты ӕмӕ дидинджыты нывӕфтыдтӕ ӕмӕ сӕ нывӕфтыдты уӕле биноныг састӕрдта сыгъзӕринӕй.

³⁶Мидӕггаг кӕрты, ома сауджынты кӕрты, астӕрд скодта карст дуртӕ ӕртӕ фӕлтӕры ӕвӕрдӕй. Сӕрӕй ма сыл иу фӕлтӕр бафтыдта кедрӕй конд амадхъӕдтӕ.

³⁷Афтӕмӕй, Соломон Дунедарӕджы Кувӕндонӕн бындур ӕрӕвӕрдта йӕ паддзахиуӕджы цыппӕрӕм азы дыккаг мӕйы, зивы мӕйы,

³⁸арӕзт та йӕ фӕци иуӕндӕсӕм азы ӕстӕм мӕйы, булы мӕйы. Кувӕндон арӕзт фӕци йе ’ппӕт агъуыстытимӕ, куыд хъуыди, афтӕ. Соломон ӕй фӕцарӕзта ӕнӕхъӕн авд азы.