Read Библи: Сыгъдӕг 3 Паддзахӕдтӕ 8 Bible Online

3 Паддзахӕдтӕ 8 - Библи: Сыгъдӕг bible

3 Паддзахӕдтӕ 8

¹Иу цасдӕр рӕстӕджы фӕстӕ паддзах Соломон фӕсидти Израилы хистӕртӕм, Израилы хӕдзарвӕндӕгты ӕмӕ мыггӕгты хистӕртӕм. Фӕсидти сӕм Йерусалиммӕ, цӕмӕй сын Дунедарӕджы Фидыды Чырын Давиды сахарӕй (сахарӕн йӕ иннӕ ном — Сион) рахӕссын кӕна.

²Ӕмӕ ӕппӕт израилӕгтӕ паддзах Соломонмӕ ӕрӕмбырд сты Халагъудты бӕрӕгбоны рӕстӕг. Уый уыди етанимы мӕй, ӕвдӕм мӕй.

³Израилы хистӕртӕ куы ӕрӕмбырд сты, уӕд сауджынтӕ Фидыды Чырын се уӕхсчытӕм систой.

⁴Сауджынтӕ ӕмӕ левиттӕ ахастой Дунедарӕджы Фидыды Чырын ӕмӕ Фембӕлды Цатыр, стӕй, Цатыры цы уаз дзауматӕ уыди, уыдон иууылдӕр.

⁵Ныр паддзах Соломон ӕмӕ израилӕгты ӕппӕт дзыллӕ та ӕрӕмбырд сты Фидыды Чырыны размӕ ӕмӕ лыстӕг фос ӕмӕ стурвосӕй ӕрхастой ӕнӕнымӕц нывӕндтӕ.

⁶Уый фӕстӕ сауджынтӕ Кувӕндоны рӕбинаг уатмӕ, Рухсмонуатмӕ, бахастой Фидыды Чырын ӕмӕ йӕ ӕрӕвӕрдтой херувимты базырты бын.

⁷Херувимтӕн сӕ базыртӕ уыдысты Фидыды Чырыны сӕрмӕ тыгъд ӕмӕ йӕ ӕмбӕрзтой йӕ хӕссӕн хъилтимӕ.

⁸Уыцы хъилтӕ ахӕм даргъ уыдысты, ӕмӕ сын сӕ кӕрӕттӕ уыдта, Рухсмонуаты дуармӕ-иу чи ӕрлӕууыд, уый, фӕлӕ уымӕй ӕддӕдӕр нӕ зындысты. Фидыды Чырыны хуылфы ницы уыди, дыууӕ къӕйдуры йеддӕмӕ. Кӕддӕр Израилы адӕм Мысырӕй куы рацыдысты ӕмӕ Дунедарӕг семӕ куы бафидыдта, уӕд сӕ Хоревы хохыл Моисей нывӕрдта уыцы Чырыны. Ӕмӕ ныронг дӕр уым сты.

⁹

¹⁰Сауджынтӕ куыддӕр Кувӕндонӕй рацыдысты, афтӕ ӕврагъ байдзаг кодта Дунедарӕджы хӕдзар.

¹¹Кувӕндон Дунедарӕджы кады тӕмӕнӕй кӕй байдзаг, уымӕ гӕсгӕ сауджынтӕ нал фӕрӕзтой уым сӕ уаз лӕггад дарддӕр ӕххӕст кӕнын.

¹²Ӕмӕ Соломон скуывта: «О Дунедарӕг! Ды загътай, Ӕз цӕрын тар ӕврагъы мидӕг.

¹³Ныр Дын ӕз скодтон бӕрзонд ӕмӕ парахат Хӕдзар, цӕмӕй дзы цӕрай мыггагмӕ».

¹⁴Уый фӕстӕ паддзах йе ’ргом раздӕхта израилӕгты дзыллӕмӕ ӕмӕ се ’ппӕтӕн дӕр арфӕ ракодта.

¹⁵Стӕй загъта: — Арфӕгонд уӕд Дунедарӕг, Израилы Хуыцау! Абон Уый Йе стыр хъомысы фӕрцы сӕххӕст кодта, кӕддӕр мӕ фыд Давидӕн зӕрдӕ цӕмӕй бавӕрдта, уый. Афтӕ йын загъта:

¹⁶«Ӕз Мӕ адӕмы, Израилы, Мысырӕй куы ракодтон, уӕдӕй абонмӕ Израилы хӕдзарвӕндӕгтӕй иуы сахар дӕр нӕ равзӕрстон, цӕмӕй Мӕ номыл уым хӕдзар арӕзт ӕрцӕуа, фӕлӕ равзӕрстон Йерусалим, цӕмӕй дзы Мӕ ном цӕра, ӕмӕ равзӕрстон Давиды, цӕмӕй ӕрлӕууа Мӕ адӕмы сӕргъы».

¹⁷Мӕ фыд Давиды фӕндыди Кувӕндон саразын Дунедарӕджы, Израилы Хуыцауы, номыл.

¹⁸Дунедарӕг ын загъта: «Ӕхсызгон Мын у, Мӕ номыл Кувӕндон саразынмӕ кӕй хъавыс, уый,

¹⁹фӕлӕ ды нӕ уыдзынӕ йӕ аразӕг. Мӕ номыл Мын Кувӕндон сараздзӕни дӕ фырт, дӕ туг ӕмӕ де стӕг».

²⁰Ӕмӕ ныр Дунедарӕг сӕххӕст кодта Йӕ дзырд. Куыд загъта, афтӕ ӕз сбадтӕн мӕ фыд Давиды бынаты, Израилы паддзахы къӕлӕтджыны, ӕмӕ Дунедарӕгӕн, Израилы Хуыцауӕн, Йӕ номыл сарӕзтон Кувӕндон.

²¹Дунедарӕг нын нӕ фыдӕлты Мысырӕй куы ракодта, уӕд семӕ бафидыдта, ӕмӕ Йӕ фӕдзӕхстытӕ цы Фидыды Чырыны ӕвӕрд сты, уымӕн ацы Кувӕндоны скодтон бынат.

²²Соломон ӕрлӕууыди Дунедарӕджы нывондхӕссӕны раз, израилӕгты дзыллӕйӕн сӕ разӕй, йӕ къухтӕ арвмӕ сдардта

²³ӕмӕ скуывта: «О Дунедарӕг, Израилы Хуыцау! Ды дӕ, уӕларвы дӕр ӕмӕ зӕххыл дӕр ӕмбал Кӕмӕн нӕй, уыцы Хуыцау. Иудадзыг Дӕ лӕггадгӕнджытыл, зӕрдиагӕй Дын чи кусы, уыдоныл ӕнувыд дӕ. Хъахъхъӕныс, семӕ цы фидыд сарӕзтай, уый ӕмӕ сыл аудыс ӕдзухдӕр.

²⁴Ацы бон Де стыр хъомысы фӕрцы сӕххӕст кодтай, Дӕ лӕггадгӕнӕгӕн, мӕ фыд Давидӕн, Дӕхи дзыхӕй цы дзырд радтай, уый.

²⁵Ӕмӕ ныр, Дунедарӕг, Израилы Хуыцау, сӕххӕст кӕн, ноджы ма Дӕ цагъар Давидӕн, мӕ фыдӕн, зӕрдӕ цӕмӕй бавӕрдтай, уый дӕр: „Дӕ фырттӕ раст фӕндагыл куы лӕууой, дӕуау Мын иузӕрдион лӕггад куы кӕной, уӕд дӕ байзӕддӕгтӕ мыггагмӕ дӕр баддзысты Израилы паддзахы къӕлӕтджыны“.

²⁶Уӕдӕ ныр Дунедарӕг, Израилы Хуыцау! Кӕддӕр дӕ лӕггадгӕнӕг Давидӕн, мӕ фыдӕн, цы дзырд радтай, уый сӕххӕст кӕн!

²⁷Ӕниу Хуыцау зӕххыл куыд хъуамӕ ӕрцӕра? Уӕларв ӕмӕ уӕлдунетӕ дӕр Дын ӕгӕр къуындӕг куы сты, куы нӕ Дыл ӕххӕссынц, уӕд Дын ӕз цы Кувӕндон сарӕзтон, уым куыд бацӕудзынӕ?

²⁸О Дунедарӕг, мӕ Хуыцау! Абон ӕркӕс Дӕ цагъармӕ, Дӕ хъус ын ӕрдар йӕ куывдмӕ, фехъус ын йӕ лӕгъстӕ!

²⁹Ӕхсӕвӕй уа, бонӕй, Де ’ргом макуы аздах ацы Кувӕндонӕй, ацы бынатӕй, Мӕ ном дзы цӕрдзӕни, зӕгъгӕ, кӕмӕй загътай, уымӕй! Дӕ цагъар Дӕм кувы, ацы бынатмӕ йе ’ргом саразгӕйӕ, ӕмӕ йын айс йӕ куывд.

³⁰Фехъус Дӕ цагъары ӕмӕ Дӕ адӕм Израилы куывд! Ацы бынатмӕ не ’ргом саразгӕйӕ-иу Дӕм куы скувӕм, уӕд-иу нын Дӕ цӕрӕнбынатӕй, уӕлӕрвтӕй, фехъус нӕ куывд ӕмӕ-иу нын нӕ азым ныббар!

³¹Иу иннӕйы азымджын куы кӕна, мӕ разы фӕтӕригъӕдджын ис, зӕгъгӕ, ӕмӕ йын Дӕ Кувӕндоны нывондхӕссӕны раз ард куы бахӕрын кӕна,

³²уӕд ын уӕларвӕй фехъус йӕ ардбахӕрд ӕмӕ йын Дӕ раст тӕрхон рахӕсс: азымджын у — бафхӕр ӕй, ӕназым у — йӕ маст ын райс ӕмӕ цас раст у, уымӕ гӕсгӕ йӕ Дӕ хорзӕхӕй барӕвдау!

³³Дӕ адӕм, Израил, Дӕ разы фӕтӕригъӕдджын сты ӕмӕ уый тыххӕй фыдгулы амӕттаг баисты, зӕгъгӕ, уӕд куы ӕрфӕсмон кӕной, се ’ргом Дӕм куы раздахой ӕмӕ Дын ацы Кувӕндоны Дӕ номӕн кад куы скӕной, кувын, лӕгъстӕ кӕнын Дӕм куы райдайой,

³⁴уӕд-иу сӕ уӕларвӕй фехъус, ныббар-иу Дӕ адӕмы, Израилы, тӕригъӕд ӕмӕ-иу сӕ фӕстӕмӕ ӕрбаздах сӕ зӕхмӕ, кӕддӕр сын сӕ фыдӕлтӕн кӕй радтай, уырдӕм!

³⁵Дӕ разы фӕтӕригъӕдджын сты ӕмӕ сын уый тыххӕй арв йе ’ртах нал дӕтты, зӕгъгӕ, уӕд Дын Дӕ къухы цӕф куы бамбарой ӕмӕ сӕ тӕригъӕдыл куы ӕрфӕсмон кӕной ӕмӕ Дын, ацы Кувӕндонмӕ се ’ргом саразгӕйӕ, Дӕ номӕн кад куы скӕной ӕмӕ Дӕм куы скувой,

³⁶уӕд-иу уӕларвӕй фехъус Дӕ лӕггадгӕнджыты, Израилы адӕмы, ӕмӕ-иу сын ныббар сӕ азым, раст фӕндагыл-иу сӕ сараз, фыдӕй-фыртмӕйы исбонӕн сын цы зӕхх радтай, ууыл та-иу къӕвдайы ’ртах ӕруадз!

³⁷Зӕххыл хус дымгӕ, зайӕгойты низ, мӕтыхтӕ ӕмӕ къуыдыргалм тыллӕг куы бабын кӕной ӕмӕ стонг заман куы скӕна, ноджы ма адӕм емынӕ ӕмӕ ӕндӕр низты амӕттаг куы бауой кӕнӕ сӕм фыдгул куы бабырса,

³⁸уӕд-иу Дӕ адӕмӕй, Израилӕй, искӕмӕн йӕ зӕрдӕ фыдохы азарӕй ныррызти ӕмӕ Дӕм, ацы Кувӕндонмӕ йӕ къухтӕ ныттындзгӕйӕ, скуывта, балӕгъстӕ Дын кодта, зӕгъгӕ —

³⁹фехъус-иу ӕй уӕларвӕй, Дӕ цӕрӕнбынатӕй, ӕмӕ-иу ныббар Дӕ адӕмы азым! Алкӕмӕн дӕр-иу йӕ хъуыддӕгтӕм гӕсгӕ стӕрхон кӕн, уымӕн ӕмӕ Ды зоныс, йӕ зӕрдӕйы кӕмӕн цы ис, уый, ӕрмӕстдӕр Ды зоныс адӕмы зӕрдӕтӕ.

⁴⁰Уӕд Дын кад кӕндзысты ӕмӕ Дӕ нымайдзысты цӕргӕ-цӕрӕнбонты, цалынмӕ, кӕддӕр нын нӕ фыдӕлтӕн цы зӕхх радтай, ууыл цӕрой, уӕдмӕ.

⁴¹Дӕ адӕмӕй, Израилӕй, чи нӕ уа, ахӕм исчи, ӕддагон, дард бӕстӕй Дӕ номы сӕраппонд куы ӕрбацӕуа, —

⁴²уымӕн ӕмӕ Дын фехъуыста Дӕ цытджын ном ӕмӕ Де стыр хъомысы кой — ӕмӕ Дӕм, Дӕ Кувӕндонмӕ йе ’ргом саразгӕйӕ, куы скува,

⁴³уӕд-иу ӕй фехъус уӕларвӕй, Дӕ цӕрӕнбынатӕй, ӕмӕ-иу ын сӕххӕст кӕн, цӕй тыххӕй Дӕм скува, уый, цӕмӕй Дын ӕппӕт адӕмтӕ базоной Дӕ ном, аргъуыц Дын кӕной, Дӕ адӕмау, Израилау, цӕмӕй базоной, кӕй Дын сарӕзтон, уыцы Кувӕндон Дӕ ном кӕй хӕссы, уый.

⁴⁴Дӕ адӕм Дӕ амынд фӕндагыл фыдгулимӕ схӕцынмӕ куы рацӕуой ӕмӕ, Дӕхицӕн цы сахар равзӕрстай ӕмӕ Дын ӕз цы Кувӕндон сарӕзтон, уыдонмӕ се ’ргом раздахгӕйӕ, Дӕумӕ куы скувой, Дунедарӕг,

⁴⁵уӕд-иу сын уӕларвӕй фехъус сӕ куывд, сӕ лӕгъстӕ ӕмӕ-иу сын ахъаз бакӕн!

⁴⁶Гӕнӕн ис, ӕмӕ Дӕ адӕм Дӕ разы фӕтӕригъӕдджын уой, уымӕн ӕмӕ ӕнӕтӕригъӕд ничи у. Ды сӕм смӕсты уыдзынӕ, фыдгулты амӕттаг сӕ бакӕндзынӕ, ӕмӕ сӕ уыдон уацары акӕндзысты дард кӕнӕ ӕввахс бӕстӕмӕ.

⁴⁷Гӕнӕн ис, ӕмӕ Дӕ адӕм уым ӕрфӕсмон кӕной, се ’ргом Дӕм раздахой ӕмӕ Дӕм скувой, фӕтӕригъӕдджын стӕм, фӕазымджын стӕм, фыдми ракодтам, зӕгъгӕ.

⁴⁸Гъемӕ сӕ уацары чи акодта, уыцы фыдгулты зӕххыл Дын сӕ уд, сӕ зӕрдӕ куы снывонд кӕной, се ’ргом куы саразой, кӕддӕр сын сӕ фыдӕлтӕн цы зӕхх саккаг кодтай, Дӕхицӕн цы сахар равзӕрстай ӕмӕ ӕз Дӕ номыл цы Кувӕндон сарӕзтон, уыдонмӕ,

⁴⁹уӕд-иу сын Ды уӕларвӕй, Дӕ цӕрӕнбынатӕй, фехъус сӕ куывд, сӕ лӕгъстӕ ӕмӕ-иу сын ахъаз бакӕн!

⁵⁰Дӕ разы цӕмӕйдӕриддӕр фӕтӕригъӕдджын ӕмӕ фӕазымджын сты, уый сын ныббар, уацары сӕ чи акодта, уыдоны зӕрдӕ сӕм фӕфӕлмӕн кӕн, цӕмӕй сын фӕтӕригъӕд кӕной.

⁵¹Уымӕн ӕмӕ уыдон Дӕ адӕм сты, Дӕ исбон; Ды сӕ ракодтай Мысырӕй — згъӕртайынгӕнӕн куынцгомӕй.

⁵²Дӕ лӕггадгӕнӕг ӕмӕ Дӕ адӕм Израил Дӕм куы кувой, уӕд-иу сӕ кӕддӕриддӕр фехъус, цӕстуарзонӕй-иу сӕм ракӕс!

⁵³Ды сӕ Дӕхицӕн исбон скӕныны охыл рахицӕн кодтай дунейы адӕмтӕй, Дӕ цагъар Моисейы дзыхӕй сын ныфс куыд бавӕрдтай, афтӕ, кӕддӕр нын Мысырӕй нӕ фыдӕлты куы ракодтай, уӕд, о Дунедарӕг Хуыцау!»

⁵⁴Соломон Дунедарӕгмӕ куы скуывта, йӕ куывд ӕмӕ йӕ курдиӕттӕ дзырд куы фӕци, йӕ къухтӕ арвмӕ тыгъдӕй Дунедарӕджы нывондхӕссӕны раз йӕ зонгуытыл фӕлӕууыди, афтӕмӕй, уӕд сыстад

⁵⁵ӕмӕ Израилы дзыллӕйӕн хъӕрӕй раарфӕ кодта:

⁵⁶«Арфӕгонд уӕд Дунедарӕг! Йӕ адӕмӕн, Израилӕн, зӕрдӕ куыд бавӕрдта, афтӕ сын радта ӕдас цард. Йӕ цагъар Моисейы дзыхӕй фӕрнджын ныхасӕй цыдӕриддӕр загъта, уыдонӕй иу дӕр ӕнӕ сӕххӕстгӕнгӕ нӕ ныууагъта.

⁵⁷Кӕддӕр нын Дунедарӕг, нӕ Хуыцау, нӕ фыдӕлтыл куыд аудыдта, афтӕ аудӕд махыл дӕр, йӕхи ныл ма атигъ кӕнӕд ӕмӕ нӕ дзӕгъӕлӕй ма ныууадзӕд.

⁵⁸Раттӕд нын коммӕгӕс зӕрдӕ, цӕмӕй, нӕ фыдӕлтӕн куыд бафӕдзӕхста, афтӕ цӕуӕм Йӕ амынд фӕндӕгтыл, ӕххӕст Ын кӕнӕм Йӕ фӕдзӕхстытӕ, Йӕ уагӕвӕрдтӕ ӕмӕ Йӕ амындтытӕ.

⁵⁹Абон цы скуывтон ӕмӕ Дунедарӕгӕй цы ракуырдтон, уый та Дунедарӕг Хуыцауӕй ӕхсӕвӕй-бонӕй рох ма уӕд. Ӕрвылбон алы хъуыддаджы дӕр ахъаз кӕнӕд Йӕ цагъарӕн дӕр ӕмӕ Йӕ адӕм Израилӕн дӕр.

⁶⁰Уӕд ӕппӕт адӕмтӕ дӕр базондзысты, Дунедарӕг, ӕмбал кӕмӕн нӕй, уыцы иунӕг Хуыцау кӕй у, уый.

⁶¹Уымӕ гӕсгӕ тынг ӕнувыд ут Дунедарӕгыл, нӕ Хуыцауыл, ӕмӕ Йын абонау ӕдзухдӕр ӕххӕст кӕнут Йӕ уагӕвӕрдтӕ ӕмӕ Йӕ фӕдзӕхстытӕ».

⁶²Паддзах Соломон ӕмӕ Израилы адӕм сарӕзтой Дунедарӕджы Кувӕндон срухс скӕныны стыр бӕрӕгбон ӕмӕ ӕрхастой нывӕндтӕ. Фидыды нывӕндты номыл стурвосӕй акусарт кодтой дыууӕ ӕмӕ ссӕдз мин сӕры, лыстӕг фосӕй та — ӕхсӕзыссӕдз мин сӕры.

⁶³

⁶⁴Дунедарӕджы Кувӕндоны раз цы ӕрхуы нывондхӕссӕн уыди, уый утӕппӕт нывӕндтӕ ӕрхӕссынӕн ӕгӕр гыццыл кӕй уыд, уымӕ гӕсгӕ Соломон тӕккӕ уыцы бон срухс кодта, Кувӕндоны раз цы кӕрт уыд, уымӕн йӕ астӕуккаг хай, ӕмӕ уым ӕрхаста иууылсудзинаг нывӕндтӕ, стӕй хойраджы хуынтӕ ӕмӕ фидыды нывӕндты фиу.

⁶⁵Соломон Дунедарӕджы раз куывд скодта. Ӕгас Израил, Лево-Хаматӕй суанг Мысыры арӕны раз цы цӕугӕдон калд, уый онг чи царди, уыдон иууылдӕр — тынг бирӕ дзыллӕ — ӕрӕмбырд сты уыцы куывдмӕ ӕмӕ фӕминас кодтой иннабонӕй иннабонмӕ.

⁶⁶Ӕстӕм бон паддзах Соломон адӕмы ауагъта. Уыдон ын арфӕ ракодтой ӕмӕ сӕ хӕдзӕрттӕм араст сты, Дунедарӕг Йӕ лӕггадгӕнӕг Давидӕн ӕмӕ Йӕ адӕм Израилӕн цы бирӕ хӕрзты бацыд, уыдоныл цингӕнгӕйӕ ӕмӕ райгӕйӕ.