Read Библи: Сыгъдӕг 4 Паддзахӕдтӕ 1 Bible Online

4 Паддзахӕдтӕ 1 - Библи: Сыгъдӕг bible

4 Паддзахӕдтӕ 1

¹Ахавы амӕлӕты фӕстӕ моавӕгтӕ Израилы ныхмӕ сыстадысты.

²Ахазиа иуахӕмы, Самарийы йын цы галуан уыди, уымӕн йӕ уӕлхӕдзары гӕрӕны сӕрты рахауд ӕмӕ фӕрынчын ис. Филистимаг сахар Екронмӕ йӕ минӕвӕртты арвыста ӕмӕ сын бафӕдзӕхста: «Бафӕрсут Екроны хуыцау Баал-Зевувы, сдзӕбӕх ма уыдзынӕн ӕви нӕ».

³Дунедарӕджы зӕд тишбийаг Илийайӕн загъта, цӕмӕй самариаг паддзахы минӕвӕрттӕн сӕ размӕ ацӕуа ӕмӕ сын зӕгъа: «Израилы зӕххыл Хуыцау нӕй, ӕви? Цӕмӕн цӕут Екроны хуыцау Баал-Зевувы фӕрсынмӕ?

⁴Уый тыххӕй Дунедарӕг афтӕ зӕгъы уӕ паддзахӕн: ды дӕ хуыссӕнӕй нал сыстдзынӕ, фӕлӕ амӕлдзынӕ». Илийа бакодта, Дунедарӕг ын куыд бафӕдзӕхста, афтӕ,

⁵ӕмӕ Ахазиайы минӕвӕрттӕ фӕстӕмӕ аздӕхтысты. Уый сӕ бафарста: «Фӕстӕмӕ цӕй тагъд ӕрбаздӕхтыстут?»

⁶Дзуапп ын радтой: «Нӕ размӕ рацыдис иу лӕг ӕмӕ нын загъта: „Цӕут ӕмӕ уӕ рарвитӕг паддзахӕн фехъусын кӕнут, Дунедарӕг ын цы зӕгъы уый: Израилы зӕххыл Хуыцау нал ис, ӕви? Дӕ минӕвӕртты цӕмӕн рарвыстай Екроны хуыцау Баал-Зевувы фӕрсынмӕ? Уый тыххӕй ды дӕ хуыссӕнӕй нал сыстдзынӕ, фӕлӕ амӕлдзынӕ“».

⁷Паддзах сӕ бафарста: «Уыцы ныхӕстӕ зӕгъынмӕ уӕ размӕ чи рацыд, уыцы лӕг ӕддаг бакастӕй цыхуызӕн уыд?»

⁸Дзуапп ын радтой: «Йӕ уӕлӕ уыди сӕгъы хъуынӕй пӕлӕз, йӕ астӕуыл — цӕрмын рон». — «Уый тишбийаг Илийа у», — загъта паддзах

⁹ӕмӕ йӕм арвыста фӕндзайыхицау йӕ фӕндзай хӕстонимӕ. Ныр Илийа та хохы сӕрыл бадти. Фӕндзайыхицау ӕм куы схӕццӕ ис, уӕд ын загъта: «Хуыцауы минӕвар, паддзах зӕгъы, цӕмӕй дӕлӕмӕ рацӕуай!»

¹⁰Илийа йын дзуапп радта: «Кӕд ӕз Хуыцауы минӕвар дӕн, уӕд арвӕй арт рацӕуӕд ӕмӕ дын дӕхи дӕр ӕмӕ дӕ фӕндзай хӕстоны дӕр бавзалы кӕнӕд!» Ӕмӕ арвӕй арт рацыди ӕмӕ йын бавзалы кодта йӕхи дӕр ӕмӕ йӕ фӕндзай хӕстоны дӕр.

¹¹Паддзах ӕм арвыста ӕндӕр фӕндзайыхицауы йӕ фӕндзай хӕстонимӕ. Ӕмӕ та уый дӕр Илийайӕн загъта: «Хуыцауы минӕвар, паддзах зӕгъы, цӕмӕй рӕвдз дӕлӕмӕ ӕрцӕуай!»

¹²Илийа йын дзуапп радта: «Кӕд ӕз Хуыцауы минӕвар дӕн, уӕд арвӕй арт ӕрцӕуӕд ӕмӕ дын дӕхи дӕр ӕмӕ дӕ фӕндзай хӕстоны дӕр бавзалы кӕнӕд!» Уыйадыл арвӕй арт ӕрцыди ӕмӕ бавзалы кодта фӕндзайыхицауы дӕр ӕмӕ йӕ фӕндзай хӕстоны дӕр.

¹³Паддзах арвыста ӕртыккаг фӕндзайыхицауы йӕ фӕндзай хӕстонимӕ. Уый Илийамӕ куы схӕццӕ ис, уӕд йӕ разы йӕ уӕрджытыл ӕрхауд ӕмӕ йын балӕгъстӕ кодта: «Хуыцауы минӕвар! Дӕ хорзӕхӕй, мӕн дӕр ӕмӕ дӕ цагъарты, мӕнӕ ацы фӕндзай хӕстоны дӕр, ма бабын кӕн.

¹⁴Арвӕй ӕрцыди арт ӕмӕ дыууӕ фӕндзайыхицауы ӕд хӕстонтӕ бавзалы кодта. Ӕз де уазӕг, ма мӕ бабын кӕн!»

¹⁵Ӕмӕ Дунедарӕджы зӕд Илийайӕн загъта: «Ацу йемӕ, ма дзы тӕрс!» Илийа сыстад ӕмӕ фӕндзайыхицауимӕ паддзахмӕ ацыди.

¹⁶Загъта йын: «Дунедарӕг афтӕ зӕгъы: „Цыма Израилы зӕххыл Хуыцау нал ис, уыйау дӕ минӕвӕртты Екроны хуыцау Баал-Зевувы бафӕрсынмӕ кӕй арвыстай, уый тыххӕй дӕ хуыссӕнӕй нал сыстдзынӕ, фӕлӕ амӕлдзынӕ“».

¹⁷Ӕмӕ Ахазиа амарди; Дунедарӕджы ныхас сӕххӕст, Илийа куыд загъта, афтӕ. Фырт ын нӕ баззад, ӕмӕ йӕ амӕлӕты фӕстӕ паддзах сси йе ’фсымӕр Йорам. (Уый уыдис, Иосафаты фырт Иорам Иудейы дыккаг аз паддзахиуӕг куы кодта, уыцы заман.)

¹⁸Ахазиайы иннӕ хабӕрттӕ фыст ӕрцыдысты «Израилаг паддзӕхты азфыстыты чиныджы».