Read Библи: Сыгъдӕг 4 Паддзахӕдтӕ 13 Bible Online

4 Паддзахӕдтӕ 13 - Библи: Сыгъдӕг bible

4 Паддзахӕдтӕ 13

¹Иудейаг паддзах Иоасы, Ахазиайы фырты, паддзахиуӕджы дыууын ӕртыккӕгӕм аз Самарийы сахары Израилӕн паддзах сси Йегуйы фырт Йоахаз. Йӕ паддзахиуӕг ахаста ӕвддӕс азы.

²Йоахаз, Дунедарӕгӕн ӕнӕуынон цы у, уыдӕттӕ кодта, Наваты фырт Йоровамы фӕзмыдта, фӕсте нӕ зади, Израилы адӕмы Йоровам цы тӕригъӕдты бафтыдта, уыдонӕй.

³Дунедарӕгӕн Йӕ маст ссыгъд Израилы адӕммӕ ӕмӕ сӕ Йоахазы заман Арамы паддзах Хазаелы къухмӕ радта, фӕстӕдӕр та сыл Хазаелы фырт Бен-Хадады ӕфсондз сӕвӕрдта.

⁴Фӕлӕ Йоахаз Дунедарӕгӕн балӕгъстӕ кодта, ӕмӕ йӕм Дунедарӕг байхъуыста, уымӕн ӕмӕ федта, Арамы паддзах израилӕгты куыд ӕфхӕрдта, уый.

⁵Дунедарӕг Израилы адӕмӕн ирвӕзынгӕнӕджы радта, ӕмӕ арамейӕгты ӕфсондзы бынӕй суӕгъд сты. Сӕ цӕрӕнты ӕдасӕй цӕрын райдыдтой, уымӕй размӕ куыд уыдис, афтӕ.

⁶Ӕцӕг, Израилы адӕмы тӕригъӕды чи бафтыдта, уыцы Йоровамы ӕнаккаг митӕ фӕзмыдтой, фӕсте дзы нӕ задысты. Ашерӕйы цӕджындз дӕр лӕууыди Самарийы.

⁷Йоахазмӕ ма ӕдӕппӕтӕй баззади дӕс хӕстон уӕрдоны, дӕс ӕмӕ дыууиссӕдз уӕрдонджыны, стӕй дӕс мин фистӕг хӕстоны, уымӕн ӕмӕ сӕ Арамы паддзах ныддӕрӕн кодта.

⁸Йоахазы иннӕ хъуыддӕгтӕ ӕмӕ йе сгуыхтытӕ иууылдӕр фыст ӕрцыдысты «Израилаг паддзӕхты азфыстыты чиныджы».

⁹Йоахаз куы амарди, уӕд ӕй бавӕрдтой йӕ фыдӕлты зӕппадзы, Самарийы. Йӕ фӕстӕ паддзах сси йӕ фырт Йоаш.

¹⁰Иудейы паддзах Иоасы паддзахиуӕджы ӕртын ӕвдӕм аз Самарийы сахары Израилӕн паддзах сси Йоахазы фырт Йоаш. Йӕ паддзахиуӕг ахаста ӕхсӕрдӕс азы.

¹¹Дунедарӕгӕн ӕнӕуынон цы у, уыдӕттӕ кодта, фӕсте нӕ зади Наваты фырт Йоровамӕй, Израилы тӕригъӕдты амӕттаг чи бакодта, уымӕй; уый дӕр уыцы тӕригъӕдтыл бафтыд.

¹²Йоашы иннӕ хъуыддӕгтӕ, йе сгуыхтытӕ ӕмӕ йӕ хӕстон хабӕрттӕ, иудейаг паддзах Амациаимӕ куыд хӕцыд, уыдӕттӕ, фыст ӕрцыдысты «Израилаг паддзӕхты азфыстыты чиныджы».

¹³Куы амарди, уӕд Израилӕн паддзах сси Йеровоам. Йоашӕн та йӕ мард бавӕрдтой Израилы паддзӕхты зӕппадзы, Самарийы.

¹⁴Елисей мӕлӕтдзаг низӕй фӕрынчын ис. Куы ӕруатон, уӕд ӕй Израилы паддзах Йоаш бабӕрӕг кодта ӕмӕ йӕ сӕрмӕ фӕкуыдта: «Мӕ фыд, мӕ фыд! Ды куы дӕ Израилӕн йӕ хӕстон уӕрдон дӕр ӕмӕ йӕ бӕхтӕрӕг дӕр!»

¹⁵Елисей йын загъта: «Райс-ма фӕттӕ ӕмӕ ӕрдын!» Уый сӕ райста.

¹⁶Елисей та Израилы паддзахӕн ногӕй загъта: «Скӕсӕнӕрдӕм цы рудзынг кӕсы, уый байгом кӕн, ӕрдынбос айваз ӕмӕ фехс!» Йоаш ӕрдынбос куы айвӕзта, уӕд ын Елисей йӕ къухтыл йӕхи къухтӕ ӕрӕвӕрдта. Йоаш фехста фат, ӕмӕ йын Елисей загъта: «Ацы фат у, Дунедарӕг уын кӕй баххуыс кӕндзӕн, уый нысан. Дунедарӕг лӕудзӕни уӕ фарсмӕ, арамейӕгты ныхмӕ куы схӕцат, уӕд, ӕмӕ сӕ бынтон ныццӕгъддзыстут Афекы».

¹⁸Уый фӕстӕ Елисей загъта Израилы паддзахӕн: «Райс-ма иннӕ фӕттӕ дӕр!» Уый сӕ райста, ӕмӕ йын Елисей загъта: «Зӕхх сӕ ӕрцӕв!» Уый сӕ ӕртӕ хатты зӕхх ӕрцавта ӕмӕ ӕрлӕууыд.

¹⁹Ууыл ӕм Хуыцауы ӕвзӕрст лӕг смӕсты ӕмӕ йын загъта: «Фондз кӕнӕ ӕхсӕз цӕфы куы фӕкодтаис зӕххӕн, уӕд бынтондӕр ныццагътаис сириӕгты. Ныр сӕ ӕрмӕст ӕртӕ хатты ныддӕрӕн кӕндзынӕ».

²⁰Елисей амарди, ӕмӕ йӕ зӕппадзы бавӕрдтой. Иннӕ аз Израилмӕ ӕрбалӕбурдтой моавӕгты ӕрдонгтӕ.

²¹Ӕмӕ иуахӕмы израилӕгтӕ иу лӕджы куы ныгӕдтой, уӕд ауыдтой моавӕгты ӕфсад. Фыр тӕссӕй сӕ марды тагъд-тагъд Елисейы зӕппадзмӕ баппӕрстой. Марды буар хаугӕ-хауын Елисейы стджытыл андзӕвыд ӕмӕ райгас ис, йӕ дыууӕ къахыл слӕууыд.

²²Йоахазы заман Арамы паддзах Хазаел ссӕста израилӕгты.

²³Фӕлӕ сӕм уӕддӕр Дунедарӕджы зӕрдӕ фӕсасти ӕмӕ сын фӕтӕригъӕд кодта, Авраам, Исаак ӕмӕ Йаковимӕ цы фидыд сарӕзта, ууыл хъуыдыгӕнгӕйӕ. Нал Ӕй бафӕндыд сӕ фесафын ӕмӕ сӕ нал аздӕхта Йе ’ргом.

²⁴Арамы паддзах Хазаел куы амард, уӕд йӕ бӕсты паддзах сси йӕ фырт Бен-Хадад.

²⁵Уӕд Йоахазы фырт Йоашӕн бантыст, йӕ заманы йын Бен-Хадады фыд Хазаел йӕ фыдӕй кӕй байста, уыцы сахартӕ фӕстӕмӕ йӕхи бакӕнын. Ӕртӕ хатты ныддӕрӕн кодта Бен-Хадады ӕфсӕдты ӕмӕ Израилы сахартӕ фӕстӕмӕ байста.