Read Библи: Сыгъдӕг 4 Паддзахӕдтӕ 17 Bible Online

4 Паддзахӕдтӕ 17 - Библи: Сыгъдӕг bible

4 Паддзахӕдтӕ 17

¹Иудейаг паддзах Ахазы паддзахиуӕджы дыууадӕсӕм аз Самарийы сахары Израилӕн паддзах сси Елайы фырт Осиа. Йӕ паддзахиуӕг ахаста фараст азы.

²Йӕ размӕ чи уыди, Израилы уыцы паддзӕхтау, Дунедарӕджы зӕрдӕмӕ цы нӕ цӕуы, уыдӕттӕ кодта, фӕлӕ бынтон уыдоны хуызӕн нӕ.

³Ассирийы паддзах Салманесер ӕд ӕфсад Израилмӕ куы ӕрбабырста, уӕд Осиа йӕ дӕлбар ныллӕууыд, йӕ хъалондар сси.

⁴Иуахӕмы Салманесер бафиппайдта, Израилы паддзах йӕ ныхмӕ архайы, уый. Зӕгъӕм, Осиа йӕ минӕвӕртты ӕрвитын райдыдта Мысыры паддзах Со, зӕгъгӕ, уымӕ, Ассирийы паддзахӕн та ӕрвылазы хъалон нал фыста. Уӕд ӕй Салманесер ӕрцахсын кодта ӕмӕ йӕ ахӕстоны бакодта.

⁵Уӕд Ассирийы паддзах бабырста ӕгас Израилы зӕхмӕ, ӕрхъула кодта Самарийы сахарыл ӕмӕ йӕ ӕртӕ азы фӕстӕ,

⁶Осиайы паддзахиуӕджы фарӕстӕм аз, бацахста. Израилы адӕмы атардта Ассиримӕ ӕмӕ сӕ уым ӕрцӕрын кодта Халахы зӕххыл, Гозаны зӕххыл Хаворы доны былгӕрӕтты, стӕй Мидийы сахарты.

⁷Израилӕгтӕ сӕ Хуыцауы, Дунедарӕджы, раз тӕригъӕды цӕуын байдыдтой. Кӕддӕр сӕ Уый ракодта Мысыры зӕххӕй, суӕгъд сӕ кодта фараоны ӕфсондзы бынӕй. Фӕлӕ адон фӕзмын райдыдтой, кӕддӕр сын Дунедарӕг сӕ цурӕй цы адӕмты фӕсырдта, уыдоны ӕгъдӕуттӕ, стӕй Израилы паддзӕхты ӕнаккаг митӕ.

⁹Дунедарӕгӕн, сӕ Хуыцауӕн, ӕхсызгон цы нӕ уыд, уыдӕттӕ кодтой, се ’ппӕт сахарты, хъахъхъӕнӕн мӕсгуытӕй фидаргонд сахарты онг, кувӕн къуыбыртӕ арӕзтой сӕхицӕн.

¹⁰Алы бӕрзонд къуыбыр ӕмӕ алы къабузджын бӕласы бын табуйаг дуртӕ ӕмӕ Ашерӕйы номыл дурцӕджындзтӕ ӕвӕрдтой.

¹¹Буд сыгътой ӕппӕт кувӕн къуыбыртыл, Дунедарӕг сын сӕ цурӕй кӕй фӕсырдта, уыцы адӕмты фӕзмгӕйӕ. Дунедарӕгӕн масты хос чи уыд, ахӕм ӕнаккаг митӕ кодтой.

¹²Табу кодтой, Дунедарӕг сын тобӕ кӕй тыххӕй загъта, уыцы гуымирытӕн.

¹³Уӕд Дунедарӕг израилӕгтӕн дӕр ӕмӕ иудейӕгтӕн дӕр фӕдзӕхсын райдыдта Йӕ алы пехуымпар ӕмӕ йӕ алы зонынджыны уылты: «Ныууадзут уе ’наккаг хъуыддӕгтӕ ӕмӕ Мын ӕххӕст кӕнут Мӕ фӕдзӕхстытӕ, Мӕ уагӕвӕрдтӕ ӕмӕ Ме ’гъдӕуттӕ, кӕддӕр уӕ фыдӕлтӕн, ныр та сымахӕн дӕр Мӕ пехуымпарты фӕрцы кӕй бафӕдзӕхстон, уыдон».

¹⁴Фӕлӕ адон сӕ фыдӕлтау систы хиваст. Нӕ хъуыстой Дунедарӕгмӕ, сӕ Хуыцаумӕ, сӕ зӕрдӕ Йыл нӕ дардтой.

¹⁵Суӕлӕхох Ын сты Йӕ уагӕвӕрдтыл, кӕддӕр сын сӕ фыдӕлтимӕ цы фидыд сарӕзта, ууыл, Йӕ уынаффӕтыл. Табу кӕнын байдыдтой ницӕйаг гуымирытӕн. Сӕ ницӕйаг хъуыддӕгтӕй фӕзмыдтой, Дунедарӕг сын кӕй тыххӕй фӕдзӕхста, ма сӕ бафӕзмут, зӕгъгӕ, уыдоны — сӕ алыварс цӕрӕг адӕмты.

¹⁶Сӕхи атигъ кодтой Дунедарӕджы, сӕ Хуыцауы, фӕдзӕхстытыл ӕмӕ сӕхицӕн скодтой джиппыуагъд дыууӕ уӕныджы, стӕй Ашерӕйы цӕджындз. Кувын райдыдтой арвы стъалытӕм ӕмӕ табу кодтой Баалӕн.

¹⁷Арты нывондӕн хастой сӕ фыртты ӕмӕ сӕ чызджыты, дӕсны фарстой ӕмӕ кӕлӕнтӕ кодтой. Дунедарӕджы зӕрдӕмӕ цы нӕ цӕуы, уыдӕттыл бафтыдысты, ӕмӕ Йӕ мӕсты кодтой.

¹⁸Дунедарӕгӕн Йӕ маст ссыгъд Израилы адӕммӕ ӕмӕ сыл хъоды бакодта. Сӕ зӕххыл ма цӕргӕйӕ ныууагъта ӕрмӕст Иудӕйы хӕдзарвӕндаджы.

¹⁹Фӕлӕ иудейӕгтӕ дӕр не ’ххӕст кодтой Дунедарӕджы, сӕ Хуыцауы, фӕдзӕхстытӕ. Сӕ хъуыддӕгтӕй фӕзмыдтой израилӕгты.

²⁰Ӕмӕ Дунедарӕг Йӕхи атигъ кодта Израилы ӕппӕт байзӕддагыл дӕр. Ӕрӕлхъывта сӕ, ӕцӕгӕлон адӕмтӕн-иу сӕ бастигъын кодта. Ӕппынфӕстаг сӕ фӕсырдта Йӕ цурӕй.

²¹Израилӕгтӕ Давиды хӕдзарвӕндагимӕ байуӕрстой ӕмӕ сӕхицӕн паддзахӕй равзӕрстой Наваты фырт Йоровамы. Уый сын се ’ргом аздӕхта Дунедарӕгӕй ӕмӕ сӕ баппӕрста стыр тӕригъӕды.

²²Ӕмӕ израилӕгтӕ фӕзмыдтой Йоровамы тӕригъӕдджын митӕ, фӕсте дзы нӕ задысты.

²³Ӕппӕт уыдӕтты тыххӕй сӕ Дунедарӕг фӕсырдта Йӕ цурӕй, Йӕ лӕггадгӕнӕг пехуымпарты уылты рагацау куыд дзырдта, афтӕ. Израилы адӕм сӕ зӕххӕй хаст ӕрцыдысты Ассиримӕ, ӕмӕ ныронг дӕр ма уым сты.

²⁴Ассирийы паддзах израилӕгты бӕсты Самаримӕ ӕрбакодта ӕндӕр адӕмты йӕ бӕстӕйы сахартӕй: Вавилонӕй, Кутайӕ, Аввайӕ, Хаматӕй ӕмӕ Сефарваимӕй. Уыдон бацахстой Самарийы зӕхх ӕмӕ йын йӕ сахарты ӕрцардысты.

²⁵Фӕлӕ уым се ’рцӕрыны райдиан Дунедарӕгӕй нӕ тарстысты, ӕмӕ сыл Уый домбӕйтты сардыдта, ӕмӕ сӕ уыдон мардтой.

²⁶Уый тыххӕй фӕхабар кодтой Ассирийы паддзахмӕ. Загътой йын: «Самарийы сахарты цы адӕмты ӕрцӕрын кодтай, уыдон, уыцы зӕххы Хуыцауӕн кад кӕнын куыд хъӕуы, уый нӕ зонынц, ӕмӕ сыл Уый домбӕйтты бафтыдта; уыдон сӕ цӕгъдынц, уымӕн уыцы бӕстӕйы Хуыцауы ӕгъдау нӕ зонынц».

²⁷Паддзах бафӕдзӕхста: «Уырдыгӕй Ассиримӕ хаст чи ӕрцыд, уыцы сауджынтӕй иуы фӕстӕмӕ ӕрбакӕнут. Уадз ӕмӕ уым цӕра ӕмӕ сӕ, уыцы бӕстӕйы Хуыцауӕн кад кӕнын куыд хъӕуы, ууыл сахуыр кӕна».

²⁸Самарийӕ уацары кӕй акодтой, уыцы сауджынтӕй иу фӕстӕмӕ ӕрбаздӕхт ӕмӕ Вефилы ӕрцарди. Адӕмӕн амыдта, Дунедарӕгӕн кад кӕнын куыд хъӕуы, уыдӕттӕ.

²⁹Фӕлӕ ма уыимӕ адӕмтӕ сӕхи хуыцаугӕндты дӕр сарӕзтой ӕмӕ сӕ, кӕм ӕрцардысты, уыцы сахарты сӕвӕрдтой — самариӕгтӕ къуыбыртыл кӕй сарӕзтой, уыцы куывддонты.

³⁰Вавилойнӕгтӕ сарӕзтой Суккот-Беноты, Куты цӕрджытӕ — Нергалы, хаматӕгтӕ — Ашимайы,

³¹аввайӕгтӕ — Нивхаз ӕмӕ Тартакы. Сефарваимӕгтӕ сӕ мӕнгхуыцӕуттӕ Адрамелех ӕмӕ Анамелехӕн арты нывондӕн хастой сӕ фыртты.

³²Уыцы иу рӕстӕг кад кодтой Дунедарӕгӕн дӕр. Сӕхи ӕхсӕнӕй равзӕрстой сауджынты, ӕмӕ сын уыдон кувӕн къуыбыртыл — сӕ куывддонты — лӕггад кодтой.

³³Дунедарӕгӕн дӕр куывтой ӕмӕ сӕхи хуыцӕуттӕн дӕр лӕггад кодтой — сӕ фыдызӕххыл цы ’гъдау уыдис, уымӕ гӕсгӕ.

³⁴Ныронг дӕр Самарийы цӕрджытӕ ӕххӕст кӕнынц сӕ рагон ӕгъдӕуттӕ. Дунедарӕгӕй нӕ тӕрсынц. Нӕ Йын ӕххӕст кӕнынц Йӕ уагӕвӕрдтӕ ӕмӕ Йӕ амындтытӕ, Йе ’гъдӕуттӕ ӕмӕ Йӕ фӕдзӕхстытӕ, Уый кӕддӕр Израил ном кӕуыл сӕвӕрдта, уыцы Йаковӕн кӕй бафӕдзӕхста, уыдон.

³⁵Уыцы заман Дунедарӕг Йаковы байзӕддагимӕ сарӕзта фидыд ӕмӕ сын загъта: «Ӕндӕр хуыцӕуттӕн ма табу кӕнут, ма сын лӕггад кӕнут ӕмӕ сын ма хӕссут нывӕндтӕ.

³⁶Кад кӕнут Мӕнӕн, сымах Йе стыр хъомысы фӕрцы ӕмӕ Йӕ хъомысджын къухӕй Мысыры зӕххӕй Чи ракодта, уыцы Дунедарӕгӕн, — Уымӕн кувут ӕмӕ Йын хӕссут нывӕндтӕ.

³⁷Цы уагӕвӕрдтӕ ӕмӕ амындтытӕ, цы ’гъдӕуттӕ ӕмӕ уын цы фӕдзӕхстытӕ радтон, уыдон ӕххӕст кӕныныл уӕхи хъарут цӕрӕнбонты. Уемӕ цы фидыд сарӕзтон, уый ма рох кӕнут. Ма табу кӕнут ӕндӕр хуыцӕуттӕн.

³⁹Кад кӕнут ӕрмӕстдӕр Дунедарӕгӕн, уӕ Хуыцауӕн, ӕмӕ уӕ Уый алы фыдгулы къухӕй дӕр фервӕзын кӕндзӕн».

⁴⁰Фӕлӕ Йӕм уыдон нӕ байхъуыстой, дарддӕр дӕр хӕццӕ кодтой сӕ рагон ӕгъдӕуттӕ.

⁴¹Дунедарӕгӕн кад кодтой, фӕлӕ сӕхи гуымирытӕн дӕр кодтой лӕггад. Суанг сӕ байзӕддӕгтӕ ӕмӕ уыдоны байзӕддӕгтӕ дӕр ныронг дӕр фӕзмынц сӕ фыдӕлты.