Read Библи: Сыгъдӕг 4 Паддзахӕдтӕ 19 Bible Online

4 Паддзахӕдтӕ 19 - Библи: Сыгъдӕг bible

4 Паддзахӕдтӕ 19

¹Езекиа уыцы ныхӕстӕ куы фехъуыста, уӕд йӕ дарӕс фӕйнӕрдӕм арӕдывта, йӕ уӕлӕ сӕхъис скодта ӕмӕ Дунедарӕджы Кувӕндонмӕ ацыди.

²Йӕ галуаны уагдар Елиаким, нымӕрдар Шевна ӕмӕ хистӕр сауджынты, сӕ уӕлӕ сӕхъистӕ, афтӕмӕй арвыста пехуымпар Исайамӕ, Амоцы фыртмӕ.

³Уыдон ын загътой: «Езекиа афтӕ зӕгъы: абон у фыдбылыз, ӕфхӕрд ӕмӕ худинаджы бон. Арын афон ралӕууыд, фӕлӕ ныййарынӕн хъару нӕй!

⁴Чи зоны, ӕмӕ Дунедарӕг, дӕ Хуыцау, Ассирийы паддзах нӕм цардӕгас Хуыцауы фауынмӕ кӕй ӕрбарвыста, уыцы сӕйраг дзагдары ныхӕстӕ фехъуса ӕмӕ йӕ Дунедарӕг, дӕ Хуыцау, уыцы ныхӕсты тыххӕй бафхӕра. Уӕдӕ скув, удӕгасӕй ма чи баззади, уыдоны тыххӕй».

⁵Паддзах Езекиайы дӕлдӕртӕ Исайамӕ ӕрбацыдысты.

⁶Исайа сын загъта: «Уӕ хицауӕн зӕгъут: Дунедарӕг афтӕ зӕгъы: Ассирийы паддзахы дӕлдӕртӕ Мӕ цы ныхӕстӕй фаудтой, уыдонӕй ма тӕрс.

⁷Ӕз дзы ахӕм мон бауадздзынӕн, ӕмӕ, куыддӕр уац фехъуса, афтӕ фӕстӕмӕ аздӕхдзӕни йӕ бӕстӕм, ӕмӕ йӕ Ӕз йӕхи зӕххыл карды амӕттаг бакӕндзынӕн».

⁸Ассирийы паддзахы дзагдар аздӕхт ӕмӕ йӕм фӕндагыл фӕхабар чындӕуыд, Санхериб Лахишы сахар ныууагъта, зӕгъгӕ. Йӕ паддзахы баййӕфта, Ливнӕйы сахарыл куы ӕрхъула кодта, уӕд.

⁹Санхерибӕн фехъусын кодтой, Эфиопийы паддзах Тирхака дӕ ныхмӕ рацыди, зӕгъгӕ. Ӕмӕ иудейаг паддзах Езекиамӕ ногӕй арвыста йӕ минӕвӕртты:

¹⁰«Иудейы паддзах Езекиайӕн фехъусын кӕнут: „Дӕ зӕрдӕ Кӕуыл дарыс, уыцы Хуыцау дӕ ма асайӕд, Йерусалим Ассирийы паддзахы къухтӕм нӕ бахаудзӕн, зӕгъгӕ дын кӕй зӕгъы, уымӕй.

¹¹Ды куы зоныс, Ассирийы паддзӕхтӕ ӕппӕт бӕстӕтӕн цытӕ бакодтой ӕмӕ сӕ куыд бабын кодтой, уыдӕттӕ. Ау, уӕд ды фервӕздзынӕ?

¹²Ау, иннӕ адӕмты сӕ хуыцӕуттӕ фервӕзын кодтой? Мӕ фыдӕлтӕ ныццагътой Гозан, Харан ӕмӕ Рецефы цӕрӕг адӕмты, стӕй Едены цӕрджыты, Телассары чи цардис, уыдоны.

¹³Кӕм сты ныр Хамат ӕмӕ Арпады паддзӕхтӕ? Цы фесты Сефарваим, Хена ӕмӕ Иввайы паддзӕхтӕ?“»

¹⁴Езекиа минӕвӕртты къухӕй фыстӕг райста ӕмӕ йӕ бакасти. Уый фӕстӕ Дунедарӕджы Кувӕндонмӕ бацыд ӕмӕ фыстӕг Дунедарӕджы раз райхӕлдта.

¹⁵Езекиа Дунедарӕгмӕ скуывта: «О Дунедарӕг, Израилы Хуыцау, херувимтыл Ӕнцайӕг! Ды — дунейы ӕппӕт паддзахӕдты иунӕг Хуыцау! Ды сфӕлдыстай арв ӕмӕ зӕхх.

¹⁶О Дунедарӕг, Дӕ хъус нӕм ӕрдар ӕмӕ нӕ фехъус! Байгом кӕн Дӕ цӕстытӕ, ӕркӕс нӕм! Цардӕгас Хуыцауы фауынмӕ йӕ минӕвӕртты чи ӕрбарвыста, уыцы Санхерибы ныхӕстӕ фехъус.

¹⁷Ӕцӕгдӕр, Дунедарӕг, Ассирийы паддзӕхтӕ ныггӕныстон кодтой ӕппӕт адӕмты ӕмӕ бӕстӕтӕ,

¹⁸басыгътой сын сӕ хуыцӕутты. Фӕлӕ уыдон уыдысты хуыцӕуттӕ нӕ, фӕлӕ адӕймаджы къухӕй конд хъӕдтӕ ӕмӕ дуртӕ, ӕмӕ сӕ уымӕн бабын кодтой.

¹⁹О Дунедарӕг, нӕ Хуыцау, фервӕзын нӕ кӕн знагӕй! Уадз ӕмӕ ӕппӕт зӕххон паддзахӕдтӕ дӕр базоной, Ды, Дунедарӕг, иунӕг Хуыцау кӕй дӕ, уый».

²⁰Амоцы фырт Исайа арвыста Езекиамӕ, цӕмӕй йын фехъусын кӕной: «Афтӕ зӕгъы Дунедарӕг, Израилы Хуыцау: ды мӕм ӕххуысагур скуывтай, Ассирийы паддзах Санхерибӕй хъастгӕнгӕйӕ, ӕмӕ дӕ Ӕз фехъуыстон».

²¹Мӕнӕ цы зӕгъы Дунедарӕг уый тыххӕй: «Ӕлгъ дыл кӕны, худы дыл Сионы чызг. Йӕ сӕр банкъусы Йерусалимы чызг, дӕ фӕдыл кӕсгӕйӕ.

²²Кӕй фауыс ды, фидистӕ кӕмӕн кӕныс? Кӕуыл хъӕр кӕныс, кӕмӕ кӕсыс сӕрбӕрзондӕй? Израилы Уаз Хуыцаумӕ!

²³Дӕ минӕвӕртты дзыхӕй Дунедарӕджы фауыс. Ды зӕгъыс: „Ӕфсӕнуӕрдӕттӕ мӕм бирӕ ис, ӕз уыдонимӕ схызтӕн хӕхты бӕрзӕндтӕм, Ливаны рӕгътӕм. Ныццагътон ын йӕ бӕрзонд кедртӕ, йӕ хуыздӕр кипаристӕ. Йӕ бӕрзонддӕр хохмӕ йын схызтӕн, йӕ хуыздӕр хъӕдтӕм ын бацыдтӕн.

²⁴Ӕцӕгӕлон бӕстӕты-иу ӕз скъахтон цъайтӕ, сӕ донӕй-иу сын банызтон. Мысыры дӕттӕ байсыстысты мӕ къӕхты бын“.

²⁵Ау, дӕ хъустыл никуы ӕрцыд, Ӕз уыдӕттӕ раджы кӕй снысан кодтон, уый? Рагзаманы цы сфӕнд кодтон, уый ныр сӕххӕст кодтон: фидаргонд сахартӕ дурты кӕритӕ фестадысты.

²⁶Сӕ цӕрджытӕм хъару нал ис, стыр тас сыл бахӕцыд, фӕхудинаг сты. Уыдон систы быдыры кӕрдӕгау, уыгӕрдӕны цъӕх талатау, уӕлхӕдзарыл цы пыхс фӕзыны, уыйау, — куыддӕр схӕцынц, афтӕ бахус вӕййынц.

²⁷Ӕз дын зонын дӕ алы къахдзӕф дӕр — де ’рбадт, дӕ рацыд ӕмӕ де ’рбацыд, зонын ӕй, Мӕ ныхмӕ кӕй сыстадтӕ, уый.

²⁸Мӕ ныхмӕ кӕй рацыдтӕ, стӕй Мӕм де ’нӕнымӕц ӕфсӕдты уынӕр кӕй сыхъуыст, уый тыххӕй дын Ӕз дӕ фындзыл бакӕндзынӕн цӕг, дӕ дзыхы та — уидоны къӕбӕлтӕ ӕмӕ, кӕуылты ӕрбацыдтӕ, ууылты дӕ фӕстӕмӕ аздахдзынӕн.

²⁹Дӕуӕн та, Езекиа, дӕттын нысан: ацы аз хӕрут, хауӕггаг нӕмыгӕй цы хор ӕрзад, уый, иннӕ аз — йӕхигъӕдӕй цы хор ӕрзайа, уый, ӕртыккаг аз та-иу байтаут ӕмӕ бафснайут уӕ хортӕ, ныссадзут сӕнӕфсиртӕ ӕмӕ сын хӕрут сӕ дыргътӕ.

³⁰Иудӕйы байзӕддӕгтӕй чи фервӕза, уыдон арф уидӕгтӕ ауадздзысты ӕмӕ тыллӕг ратдзысты.

³¹Уыцы байзӕддӕгтӕ рацӕудзысты Йерусалимӕй, Сионы хохӕй. Уыцы хъуыддаг ӕрцӕудзӕн, Уӕларвӕфсады Бардарӕг уыл ӕнувыд кӕй у, уый фӕрцы.

³²Уымӕ гӕсгӕ дын Дунедарӕг Ассирийы паддзахы тыххӕй афтӕ зӕгъы: уый ацы сахармӕ нӕ бацӕудзӕн, иу фат дӕр ыл не суадздзӕн, нӕ йӕм ӕрбаввахс уыдзӕн уартимӕ, йӕ ныхмӕ хӕцынмӕ сыджытбыру нӕ самайдзӕн.

³³Ардӕм кӕуылты ӕрбацыд, ууылты аздӕхдзӕни фӕстӕмӕ. Нӕ йын бантысдзӕн ацы сахармӕ ӕрбабырсын, — зӕгъы Дунедарӕг.

³⁴— Ӕз бахъахъхъӕндзынӕн ацы сахар, фервӕзын ӕй кӕндзынӕн Мӕхи ӕмӕ Мӕ цагъар Давиды сӕраппонд».

³⁵Тӕккӕ уыцы ӕхсӕв фӕзынди Дунедарӕджы зӕд ӕмӕ ассириӕгты рӕсӕнуаты ныццагъта сӕдӕ ӕстай фондз мин хӕстоны. Сбон ис, ӕмӕ мӕнӕ алырдыгӕй — мӕрдтӕ.

³⁶Ӕмӕ уӕд Ассирийы паддзах Санхериб фӕстӕмӕ аздӕхт ӕмӕ баззади Ниневийы.

³⁷Иуахӕмы йӕ хуыцау Нисрохы кувӕндоны куы куывта, уӕд ӕй йӕ фырттӕ Адрамелех ӕмӕ Сарецер кардӕй амардтой ӕмӕ Арараты бӕстӕм алыгъдысты. Йӕ фӕстӕ паддзах сси йӕ фырт Есар-Хаддон.