Read Библи: Сыгъдӕг 1 Азфыстытӕ 12 Bible Online

1 Азфыстытӕ 12 - Библи: Сыгъдӕг bible

1 Азфыстытӕ 12

¹Ацы ӕхсарджынтӕ Давидмӕ ӕрцыдысты Циклагмӕ, уый ма Кишы фырт Саулӕй йӕхи куы ’мбӕхста, уӕд. Хӕсты заман-иу ӕрбалӕууыдысты йӕ фарсмӕ —

²сӕ рахиз ӕмӕ сӕ галиу къухтӕй дурадзагъд самадтой, фӕттӕ ӕхстой ӕрдынтӕй. Уыдон уыдысты Саулы ӕрвадӕлтӕй, Бениамины хӕдзарвӕндагӕй:

³сӕ хистӕр — Ахиезер, стӕй Йоаш, гевӕйаг Шемайы фырттӕ; Йезиел ӕмӕ Пелет, Азмаветы фырттӕ; Бераха, анатотаг Йегу;

⁴гивонаг Ишмайа, дӕс ӕмӕ ссӕдз ӕхсарджынӕй иу, сӕ хистӕр; Йеремиа, Йахазиел, Йоханан, гедерайаг Йозавад,

⁵Елузай, Йеримот, Беалиа, Шемариа, харуфаг Шефати;

⁶Елкана, Ишшиа, Азарел, Иоезер ӕмӕ Йашовам — Корахы мыггагӕй;

⁷гедораг Йерохамы фырттӕ Иоела ӕмӕ Зевадиа.

⁸Гады хӕдзарвӕндагӕй Давидимӕ ӕдзӕрӕг быдыры фидары баиу сты ӕхсарджын, тохвӕлтӕрд хӕстонтӕ, арц ӕмӕ уартӕй ифтонг, домбӕйттау — сӕ бакаст, сычъитау хӕхтыл уадысты цӕрдӕг.

⁹Сӕ хистӕр — Езер, дыккаг — Овади, ӕртыккаг — Елиав,

¹⁰цыппӕрӕм — Мишманна, фӕндзӕм — Йеремиа,

¹¹ӕхсӕзӕм — Аттай, ӕвдӕм — Елиел,

¹²ӕстӕм — Йоханан, фарӕстӕм — Елзавад,

¹³дӕсӕм — Йеремиа, иуӕндӕсӕм — Махбанай.

¹⁴Адон — Гады байзӕддӕгтӕ — уыдысты ӕфсады хицӕуттӕ. Сӕ лӕмӕгъдӕр-иу сыстади сӕдӕйы ныхмӕ, сӕ тыхджындӕр та — мины ныхмӕ.

¹⁵Уыдон сты, афӕдзы фыццаг мӕй, Иорданы раивылды афон, донӕн йӕ фаллаг фарсмӕ чи бахызти, уыдон. Уӕд донивылды тасӕй алыгъдысты, Иорданӕй скӕсӕнӕрдӕм ӕмӕ ныгуылӕнӕрдӕм дӕлвӕзты чидӕриддӕр царди, уыдон.

¹⁶Бениамины ӕмӕ Иудӕйы байзӕддӕгтӕй Давиды фидармӕ ӕрцыдис иу къорд лӕджы.

¹⁷Давид сӕ размӕ рацыд ӕмӕ сын загъта: «Кӕд мӕм фарнимӕ ӕрбацыдыстут, баххуыс кӕнынмӕ, уӕд уын мӕнӕ мӕ Хуыцауы къух. Кӕд ӕмӕ мӕ, ӕназым дӕн, афтӕмӕй ме знӕгтӕн банымудзинаг стут, уӕд та нӕ фыдӕлты Хуыцау ӕркӕсӕд ӕмӕ уын тӕрхонгӕнӕг фӕуӕд!»

¹⁸Уӕд Хуыцауы Уд ӕртыхсти, фӕстӕдӕр дӕс ӕмӕ ссӕдз ӕхсарджыны хистӕр чи сси, уыцы Амасайыл, ӕмӕ уый загъта: «Мах дӕу стӕм, Давид! Мах демӕ стӕм, Йессейы фырт! Фарн дӕм бадзурӕд, фарн бадзурӕд де ’ххуысгӕнджытӕм, — ауды дыл дӕ Хуыцау». Давидӕн йӕ зӕрдӕмӕ фӕцыдысты ӕмӕ сӕ йе ’фсадӕн хицӕуттӕй баурӕдта.

¹⁹Менассиайы хӕдзарвӕндагӕй дӕр Давидимӕ баиу ис иу къорд, уый филистимӕгтимӕ Саулы ныхмӕ схӕцынмӕ куы цыди, уӕд. Ӕцӕг сын нӕ баххуыс кодта, уымӕн ӕмӕ филистимаг ӕлдӕрттӕ ауынаффӕ кодтой ӕмӕ йӕ фӕстӕмӕ раздӕхтой. Загътой: «Йӕ хицау Саулы фарс фӕуыдзӕн ӕмӕ нӕ ныхмӕ рацӕудзӕн».

²⁰Давид Циклагмӕ куы здӕхт, уӕд Менассиайы хӕдзарвӕндагӕй йемӕ баиу сты Аднах, Йозавад, Йедиаел, Михаел, Йозавад, Елигу ӕмӕ Циллетай — Менассиайы хӕдзарвӕндаджы миныхицӕуттӕ.

²¹Уыдон Давиды фарс хӕцыдысты абырджыты ныхмӕ, уымӕн ӕмӕ се ’ппӕт дӕр уыдысты ӕхсарджын хӕстонтӕ. Фӕстӕдӕр систы ӕфсады хицӕуттӕ.

²²Гъе афтӕ ӕрвылбон дӕр цыдысты Давиды фарс рахӕцынмӕ, ӕмӕ йе ’фсад сбирӕ ис, растдӕр Хуыцауы ӕфсадау.

²³Мӕнӕ, Давидмӕ Хевроны сахармӕ цы хӕстифтонг къордтӕ ӕрцыд, уыдоны хыгъд. Ӕрцыдысты йӕм, цӕмӕй йӕ Саулы бӕсты сӕвӕрой паддзахӕй, Дунедарӕг куыд бафӕдзӕхста, афтӕ.

²⁴Иудӕйы хӕдзарвӕндагӕй йӕм уарт ӕмӕ арцифтонгӕй ӕрцыд ӕхсӕз мин астсӕдӕ хӕстоны.

²⁵Симеоны хӕдзарвӕндагӕй — авд мин сӕдӕ ӕхсарджын хӕстоны.

²⁶Левийы хӕдзарвӕндагӕй — цыппар мин ӕхсӕзсӕдӕ лӕджы.

²⁷Аароны мыггаджы хистӕр Йехода йӕм ӕрцыд ӕртӕ мин авдсӕдӕ лӕгимӕ.

²⁸Ӕхсарджын хӕстон лӕппу Цадок ӕм ӕрцыд йӕ мыггагӕй дыууын дыууӕ хицауимӕ.

²⁹Бениамины хӕдзарвӕндагӕй, Саулы ӕрвадӕлтӕй, ӕрцыд ӕртӕ мины. Уӕды онг адонӕн сӕ фылдӕр Саулы хӕдзары фарсхӕцджытӕ уыдысты.

³⁰Ефремы хӕдзарвӕндагӕй ӕрцыди ссӕдз мин астсӕдӕ ӕхсарджын хӕстоны, сӕ мыггӕгты номдзыд лӕгтӕ.

³¹Менассиайы хӕдзарвӕндаджы ӕмбисӕй ӕрцыди ӕстдӕс мины. Уыдонӕн фӕдзӕхст уыди, цӕмӕй Давидмӕ ацӕуой ӕмӕ йӕ паддзахӕй сӕвӕрой.

³²Иссахары хӕдзарвӕндагӕй ӕрцыди дыууӕсӕдӕ хистӕры. Уыдон зыдтой, Израилы адӕмы кӕд цы кӕнын хъуыди, уыдӕттӕ. Семӕ-иу сразы сты се ’ппӕт ӕрвадӕлтӕ дӕр.

³³Зевулоны хӕдзарвӕндагӕй ӕрцыди фӕндзай мин хӕстхъом лӕджы — алы хотыхтӕй ифтонг; уыдон уыдысты Давиды иузӕрдион фарсхӕцджытӕ.

³⁴Неффалимы хӕдзарвӕндагӕй ӕрцыди мин хицауы, семӕ ӕртын авд мин лӕджы уартытӕ ӕмӕ ӕрцытимӕ.

³⁵Даны хӕдзарвӕндагӕй ӕрцыд дыууын аст мин ӕхсӕзсӕдӕ хӕстифтонг лӕджы.

³⁶Асиры хӕдзарвӕндагӕй ӕрцыди цыппор мин хӕстхъом лӕджы.

³⁷Иорданы фале цӕрджытӕй — Рувим ӕмӕ Гады хӕдзарвӕндӕгтӕй, стӕй Менассиайы хӕдзарвӕндаджы ӕмбисӕй ӕрцыд сӕдӕ дыууын мин лӕджы, алы хотыхтӕй ифтонг.

³⁸Ацы ӕфсӕддонтӕ се ’ппӕт дӕр хӕстифтонгӕй ӕрцыдысты Хевронмӕ, Давиды ӕппӕт Израилӕн паддзахӕй сӕвӕрыны фӕндимӕ. Уымӕ ӕмзӕрдӕйӕ бӕллыдысты иннӕ изрӕилӕгтӕ дӕр.

³⁹Уым Давидмӕ фесты ӕртӕ боны. Хӕрд ӕмӕ нозтхъуаг нӕ баййӕфтой, уымӕн ӕмӕ сын се ’рвадӕлтӕ алцыдӕр ӕрцӕттӕ кодтой.

⁴⁰Иннӕ рӕттӕй дӕр — хӕстӕг рӕттӕй райдай ӕмӕ Иссахары, Зевулоны ӕмӕ Неффалимы зӕххытӕй фӕу — хӕрджытыл, теуатыл, хӕргӕфсытыл ӕмӕ галтыл ластой хойраг: ссад, легъуийы цъӕрттӕ, чисмисы цъӕрттӕ, сӕн ӕмӕ сой, тардтой бирӕ стурвос ӕмӕ лыстӕг фос, уымӕн ӕмӕ Израилы адӕмыл цин ӕрцыд.