Read Библи: Сыгъдӕг 1 Азфыстытӕ 15 Bible Online

1 Азфыстытӕ 15 - Библи: Сыгъдӕг bible

1 Азфыстытӕ 15

¹Давид йӕ сахары йӕхицӕн саразын кодта хӕдзӕрттӕ, Хуыцауы Фидыды Чырынӕн равзӕрста бынат ӕмӕ йын ныссагъта цатыр.

²Стӕй Давид загъта: «Ӕрмӕстдӕр левиттӕн ис Хуыцауы Фидыды Чырын хӕссыны бар, уымӕн ӕмӕ Дунедарӕг уыдоны равзӕрста Фидыды Чырын хӕссынӕн ӕмӕ Дунедарӕгӕн мыггагмӕ лӕггад кӕнынӕн».

³Давид ӕппӕт Израилы адӕммӕ дӕр фӕсидт Йерусалиммӕ, цӕмӕй Дунедарӕджы Фидыды Чырын ӕрбахӕссой, цы бынат ын равзӕрста, уырдӕм.

⁴Фӕдзырдта Аароны байзӕддӕгтӕм ӕмӕ левиттӕм:

⁵Кехаты мыггаджы раздзог Уриел ӕмӕ йе ’рвадӕлтӕм — ӕхсӕзыссӕдз лӕгмӕ;

⁶Мерарийы мыггаджы раздзог Асайа ӕмӕ йе ’рвадӕлтӕм — дыууӕсӕдӕ дыууын лӕгмӕ;

⁷Гершоны мыггаджы раздзог Иоел ӕмӕ йе ’рвадӕлтӕм — дӕс ӕмӕ ӕхсӕзыссӕдз лӕгмӕ;

⁸Елицафаны мыггаджы раздзог Шемайа ӕмӕ йе ’рвадӕлтӕм — дыууӕсӕдӕ лӕгмӕ;

⁹Хевроны мыггаджы раздзог Елиел ӕмӕ йе ’рвадӕлтӕм — цыппарыссӕдз лӕгмӕ;

¹⁰Уззиелы мыггаджы раздзог Аминадав ӕмӕ йе ’рвадӕлтӕм — дыууадӕс ӕмӕ фондзыссӕдз лӕгмӕ.

¹¹Давид фӕдзырдта сауджынтӕ Цадок ӕмӕ Авиафармӕ, левиттӕй — Уриел, Асайа, Иоел, Шемайа, Елиел ӕмӕ Аминадавмӕ

¹²ӕмӕ сын загъта: «Левитты мыггӕгты хистӕртӕ! Уӕхи ссыгъдӕг кӕнут, уӕхӕдӕг дӕр ӕмӕ уе ’фсымӕртӕ дӕр, ӕмӕ Дунедарӕджы, Израилы Хуыцауы, Фидыды Чырын ӕрбахӕссут, цы бынат ын равзӕрстон, уырдӕм.

¹³Амӕй размӕ Фидыды Чырын хӕсджытӕ сымахӕй кӕй нӕ уыдысты, куыд ӕмбӕлы, афтӕ ӕнувыд ыл кӕй нӕ уыдыстӕм, уый тыххӕй нӕ бафхӕрдта Дунедарӕг, нӕ Хуыцау».

¹⁴Уӕд сауджынтӕ ӕмӕ левиттӕ ссыгъдӕг кодтой сӕхи, цӕмӕй ӕрбахӕссой Дунедарӕджы, Израилы Хуыцауы, Фидыды Чырын.

¹⁵Ӕмӕ, Дунедарӕджы дзырдмӕ гӕсгӕ кӕддӕр Моисей куыд фӕдзӕхста, афтӕ левиттӕ Хуыцауы Фидыды Чырын хъилтыл ӕвӕрдӕй се уӕхсчытыл рахастой.

¹⁶Давид левитты хистӕртӕн бафӕдзӕхста, цӕмӕй зарӕггӕнджытӕ сӕвӕрой се ’рвадӕлтӕй, уа сӕм алы цӕгъдӕнтӕ: дыууадӕстӕнонтӕ, хъисфӕндыртӕ, ӕмдзӕгъдгӕнӕнтӕ, ӕмӕ дардыл азӕлой цины зарджытӕ.

¹⁷Левиттӕ сӕвӕрдтой Иоелы фырт Хеманы ӕмӕ уый ӕрвад Асафы, Варахийы фырты; адонӕн се ’рвадӕлтӕй та, Мерарийы байзӕддӕгтӕй — Кушаиайы фырт Етаны.

¹⁸Уыдонимӕ — сӕ иннӕ ӕрвадӕлты, левитты куысты дӕлдӕр къӕпхӕныл чи лӕууыд, уыдон: Захариа, Йаазиел, Шемирамот, Йехиел, Унни, Елиав, Бенайа, Маасеа, Маттитиа, Елифле, Микнеа, Овед-Едом ӕмӕ Йеиелы.

¹⁹Зарӕггӕнджытӕ Хеман, Асаф ӕмӕ Етан цагътой ӕрхуы ӕмдзӕгъдгӕнӕнтӕй;

²⁰Захариа, Азиел, Шемирамот, Йехиел, Унни, Елиав, Маасеа ӕмӕ Бенайа — дыууадӕстӕнонтӕй, цъӕхснаг хъӕлӕсӕй;

²¹Маттитиа, Елифле, Микнеа, Овед-Едом, Йеиел ӕмӕ Азазиа та цагътой хъисфӕндыртӕй, бӕзджын хъӕлӕсӕй.

²²Зарӕг амыдта левитты зарӕггӕнджыты разамонӕг Кенаниа, уымӕн ӕмӕ уыцы курдиатӕй хайджын уыд.

²³Варахи ӕмӕ Елкана Фидыды Чырынӕн хъахъхъӕнджытӕ уыдысты.

²⁴Сауджынтӕ Шеваниа, Иосафат, Нетанел, Амасай, Захариа, Бенайа ӕмӕ Елиезер, Хуыцауы Фидыды Чырыны разӕй цӕугӕйӕ, цагътой хӕтӕлтӕй. Овед-Едом ӕмӕ Йехиа дӕр хъахъхъӕнджытӕ уыдысты Фидыды Чырынӕн.

²⁵Давид, Израилы хистӕртӕ ӕмӕ миныхицӕуттӕ ацыдысты ӕмӕ Овед-Едомы хӕдзарӕй Дунедарӕджы Фидыды Чырын ӕрбахастой.

²⁶Хуыцау баххуыс кодта, Дунедарӕджы Фидыды Чырын чи хаста, уыцы левиттӕн, ӕмӕ Йын авд галы ӕмӕ авд фыры нывондӕн ӕрхастой.

²⁷Давидӕн йӕ уӕлӕ уыди пӕлӕз, лыстӕг гӕнӕй уафт хъуымацӕй; ахӕм пӕлӕзтӕ уыди Фидыды Чырын хӕссӕг левиттӕн се ’ппӕтыл дӕр, стӕй ма зарӕггӕнджытӕ ӕмӕ сӕ разамонӕг Кенаниайыл. Давидыл ма ноджы уыди гӕн хъуымацӕй ефод дӕр.

²⁸Афтӕ, цины хъӕртӕ, сыкъауадындзтӕ, хӕтӕлтӕ, дыууадӕстӕнонтӕ ӕмӕ хъисфӕндырты цагъд ӕмӕ ӕмдзӕгъдгӕнӕнты къӕрцц-къӕрццимӕ, ӕрбахастой Дунедарӕджы Фидыды Чырын ӕгас Израил.

²⁹Дунедарӕджы Фидыды Чырын Давиды сахары къӕсӕрӕй куы бахызти, уӕд Саулы чызг Мелхолӕ рудзынгӕй ракаст, паддзах Давиды фыр цинӕй гӕппытӕгӕнгӕ ӕмӕ кафгӕ федта ӕмӕ йыл йӕ мидзӕрдӕйы бабылысчъил.