Read Библи: Сыгъдӕг 1 Азфыстытӕ 20 Bible Online

1 Азфыстытӕ 20 - Библи: Сыгъдӕг bible

1 Азфыстытӕ 20

¹Иннӕ уалдзӕг, паддзӕхты хӕстон балцыты афон, Йоав ӕфсадимӕ ацыд аммонӕгты бӕстӕм ӕмӕ йӕ ныддӕрӕн кодта, стӕй сын ӕртыхсти сӕ сӕйраг сахар Раввайыл. Давид уыцы рӕстӕг уыди Йерусалимы. Йоав балӕбурдта Раввайы сахармӕ ӕмӕ йӕ ныппырх кодта.

²Давид сын сӕ паддзахы сӕрӕй, ӕрмӕст йӕ сыгъзӕрин дӕр иу таланты уӕзӕн кӕмӕн уыд, йӕ уыцы налхъуыт-налмасӕй фӕлыст кады худ фелвӕста ӕмӕ йӕ йӕхи сӕрыл ӕркодта. Сахарӕй тынг бирӕ ӕфтиаг рахаста.

³Адӕмӕй дзы чи уыди, уыдоны та ракодта ӕмӕ сӕ дурфадӕн хырхытӕ, ӕфсӕйнаг дурсӕттӕнтӕ ӕмӕ фӕрӕттӕй кусыныл бафтыдта. Афтӕ бакодта ӕппӕт аммонаг сахартӕн. Уый фӕстӕ Давид йе ’фсадимӕ раздӕхт Йерусалиммӕ.

⁴Фӕстӕдӕр ма Гезеры дӕр филистимӕгтимӕ ногӕй схӕцыдысты. Хушайаг Сибехай амардта Сиппайы, рефаимты байзӕддӕгтӕй иуы, ӕмӕ филистимӕгтӕ саст ӕрцыдысты.

⁵Филистимӕгтимӕ ма ноджыдӕр иу хӕст уыди, ӕмӕ уым Елханан, Иаиры фырт, амардта гатаг Лахмийы, Голиафы ӕфсымӕры, йӕ арцы хъӕд тынуафӕн хъилы йас кӕмӕн уыди, уыцы Голиафы ӕфсымӕры.

⁶Иу ахӕм хӕст ма уыди Гаты дӕр. Уым иу уӕйыгӕнгӕс лӕг, уый дӕр рефаимты байзӕддӕгтӕй, йӕ къухтӕ ӕмӕ йӕ къӕхтыл — ӕхсӕзгай ӕнгуылдзтӕ, ӕдӕппӕтӕй — цыппар ӕмӕ ссӕдз ӕнгуылдзы,

⁷фидистӕ кодта израилӕгтӕн, ӕмӕ йӕ Йонатан, Давиды ӕфсымӕр Шимайы фырт, амардта.

⁸Ацы уӕйыгӕнгӕс лӕгтӕ уыдысты рефаимты байзӕддӕгтӕ, гатӕгтӕ, ӕмӕ Давид ӕмӕ йӕ хӕстонты къухӕй мӕрдтӕм бацыдысты.