Read Библи: Сыгъдӕг 1 Азфыстытӕ 21 Bible Online

1 Азфыстытӕ 21 - Библи: Сыгъдӕг bible

1 Азфыстытӕ 21

¹Сайтан Израилы ныхмӕ сыстад ӕмӕ Давиды сардыдта Израилы банымайыныл.

²Давид бафӕдзӕхста Йоав ӕмӕ иннӕ балхонтӕн: «Цӕугӕут ӕмӕ Беер-Шевӕйӕ суанг Даны онг банымайут израилӕгты, цӕмӕй мӕ адӕмы нымӕц зонон».

³Йоав ын загъта: «Дунедарӕгӕн Йӕ адӕм цас сты, сӕдӕ ахӕмы ма сыл бафтауӕд. Уыдон се ’ппӕт дӕр, мӕ бардарӕг, мӕ паддзах, дӕ цагъартӕ не сты, мыййаг? Мӕ паддзах ма цӕй тыххӕй домы ацы хъуыддаг? Азымы цӕмӕн ӕппары Израилы?»

⁴Паддзах цӕхгӕр ныллӕууыд йӕ фӕндыл, ӕмӕ Йоавӕн ӕндӕр гӕнӕн нал уыд ӕмӕ ӕрзылд ӕппӕт Израилыл дӕр, стӕй фӕстӕмӕ ӕрбаздӕхт Йерусалиммӕ

⁵Йоав ӕмӕ адӕмы сфысты хыгъд Давидмӕ радта. Израилӕгтӕм кардӕй хӕцынхъом лӕгтӕ разынди милуан ӕмӕ сӕдӕ мины, иудейӕгтӕм та — цыппарсӕдӕ ӕвдай мины.

⁶Ӕцӕг, Йоав уыдоны хыгъдмӕ нӕ бахаста левитты ӕмӕ Бениамины мыггаг, уымӕн ӕмӕ паддзахы фӕдзӕхст йӕ зӕрдӕмӕ нӕ цыди.

⁷Уыцы сфыст ӕхцон нӕ уыди Хуыцауӕн, ӕмӕ Йӕ азары хай бакодта Израилы.

⁸Давид Хуыцауӕн загъта: «Тынг фӕтӕригъӕдджын дӕн, ахӕм ӕнӕрхъуыды ми кӕй бакодтон, уый тыххӕй ӕмӕ Дӕ курын, ныббар Дӕ цагъарӕн йӕ тӕригъӕд».

⁹Дунедарӕг раргом ис Гадмӕ, Давиды зонынджынмӕ:

¹⁰«Цу ӕмӕ зӕгъ Давидӕн: „Афтӕ зӕгъы Дунедарӕг: мӕнӕ дын ӕртӕ хуызы ӕфхӕрды ӕмӕ дӕ уыдонӕй кӕцыйы амӕттаг бакӕнон, уый равзар дӕхӕдӕг“».

¹¹Гад бацыди Давидмӕ ӕмӕ йын загъта: «Афтӕ зӕгъы Дунедарӕг: „Равзар, цы хуызы дӕ бафхӕрон, уый:

¹²ӕртӕ стонг азы дӕ бӕстӕйы? Ӕви дӕ ӕртӕ мӕйы дӕргъы де знӕгтӕ сӕ уӕлныхты исой ӕмӕ сӕ разӕй лидзай? Ӕви ӕртӕ боны дӕргъы Дунедарӕджы азарӕй емынӕ сыста дӕ бӕстӕйы, ӕмӕ Йӕ азары зӕд куынӕггӕнгӕ ацӕуа ӕгас Израилы зӕххыл?“ Ахъуыды кӕн, Чи мӕ ӕрбарвыста, уымӕн цы дзуапп раттон, ууыл».

¹³Давид Гадӕн зӕгъы: «Тынг уӕззау уавӕры дӕн, фӕлӕ, адӕмы къухмӕ бахауыны фӕлтау, уадз ӕмӕ Дунедарӕджы къухмӕ бахауон, — Уый бирӕбараг у».

¹⁴Дунедарӕг израилӕгтыл емынӕ бафтыдта, ӕмӕ дзы ӕвдай мин адӕймаджы бабын ис.

¹⁵Хуыцау мӕлӕтхӕссӕг зӕд арвыста Йерусалим бабын кӕнынмӕ, фӕлӕ уый адӕмы цӕгъдын куы райдыдта, уӕд Дунедарӕг ӕркаст ӕмӕ фӕтӕригъӕд кодта сахарӕн, нал Ӕй бафӕндыди бӕллӕх ӕруадзын. Зӕдӕн загъта: «Ӕгъгъӕд фӕуӕд! Ӕруадз дӕ къух». Уыцы уысм мӕлӕтхӕссӕг зӕд уыди йевусаг Орнаны мусы сӕрмӕ.

¹⁶Давид йӕ цӕстытӕ хӕрдмӕ систа, ӕмӕ арвӕй зӕххы астӕу кардӕлвӕстӕй федта Дунедарӕджы зӕды, йӕ кард арӕзт уыди Йерусалимы ’рдӕм. Давид ӕмӕ йӕ адӕмы хистӕртӕ, сӕ уӕлӕ сӕхъистӕ, афтӕмӕй, зӕххыл ныддӕлгом сты.

¹⁷Давид Хуыцауӕн загъта: «Адӕмы ӕз нӕ банымайын кодтон? Тӕригъӕдджын ӕз куы фӕдӕн, фыд ӕз куы ракодтон, уӕд ацы фыстӕ цы азымджын сты? О Дунедарӕг, мӕ Хуыцау! Дӕ адӕмы сафыны бӕсты фӕлтау Дӕ азар ныххуырс мӕныл ӕмӕ мӕ бинонтыл».

¹⁸Уӕд мӕлӕтхӕссӕг зӕд Гадӕн загъта: «Давид ссӕуӕд йевусаг Орнаны мусмӕ ӕмӕ дзы Дунедарӕгӕн нывондхӕссӕн саразӕд».

¹⁹Давид, Дунедарӕджы фӕдзӕхстмӕ гӕсгӕ йын Гад куыд загъта, афтӕ бакодта — ссыди мусмӕ.

²⁰Уый хӕдразмӕ Орнан йӕ цыппар фыртимӕ мӕнӕу най кодта. Фӕстӕмӕ фӕкаст ӕмӕ ауыдта мӕлӕтхӕссӕг зӕды. Орнаны фырттӕ фыр тӕссӕй сӕхи амбӕхстой.

²¹Давид схӕццӕ Орнанмӕ. Орнан ӕй куы ауыдта, уӕд мусӕй йӕ размӕ рацыд ӕмӕ зӕххыл ныддӕлгом ис.

²²Давид Орнанӕн загъта: «Ратт-ма мын дӕ мусы бынат, ӕмӕ дзы Дунедарӕгӕн нывондхӕссӕн саразон. Йе ’ххӕст аргъыл мын ӕй ратт, ӕмӕ фыд азары амӕттаг мауал кӕной адӕм».

²³Орнан загъта Давидӕн: «Айс ӕй дӕхицӕн: мӕ бардарӕг паддзах, куыд ӕй фӕнды, афтӕ бакӕнӕд. Мӕнӕ дын иууылсудзинагӕн дӕттын галтӕ, сугӕн — найгӕнӕн дзоныгътӕ, хойраджы хуынӕн та — мӕнӕу. Лӕвар дын сӕ дӕттын иууылдӕр».

²⁴Фӕлӕ паддзах Давид Орнанӕн загъта: «Нӕ, се ’ххӕст аргъӕй сӕ хъуамӕ балхӕнон ӕнӕмӕнг. Дунедарӕгӕн раттыны охыл дын лӕвар нӕ райсдзынӕн дӕ исбон; иууылсудзинаг нывонд, лӕвар цы райсон, уымӕй не ’рхӕсдзынӕн».

²⁵Афтӕмӕй Давид уыцы бынаты тыххӕй Орнанӕн радта сыгъзӕрины ӕхсӕзсӕдӕ шекелы.

²⁶Дунедарӕгӕн уым сарӕзта нывондхӕссӕн ӕмӕ ӕрхаста иууылсудзинаг нывӕндтӕ ӕмӕ фидыды нывӕндтӕ. Скуывта Дунедарӕгмӕ, ӕмӕ йын Уый йӕ куывд айста — иууылсудзинӕгты нывондхӕссӕнмӕ уӕларвӕй зынг ӕрӕрвыста.

²⁷Стӕй Дунедарӕг мӕлӕтхӕссӕг зӕдӕн загъта, ӕмӕ уый йӕ кард кӕрддзӕмы нытътъыста.

²⁸Давид федта, Дунедарӕг ӕй фехъуыста, уый ӕмӕ уӕдӕй фӕстӕмӕ нывӕндтӕ хаста йевусаг Орнаны мусыл.

²⁹Моисей Дунедарӕгӕн ӕдзӕрӕг быдыры кӕй сарӕзта, уыцы Уаз Цӕрӕн ӕмӕ иууылсудзинӕгты нывондхӕссӕн та уӕд нырма Гивоны кувӕн къуыбырыл уыдысты,

³⁰фӕлӕ Давид Хуыцауы бафӕрсынмӕ уырдӕм нал суӕндыд, афтӕ тынг фӕтарсти Дунедарӕджы ӕрвыст удхӕссӕджы кардӕй.