Read Библи: Сыгъдӕг 1 Азфыстытӕ 9 Bible Online

1 Азфыстытӕ 9 - Библи: Сыгъдӕг bible

1 Азфыстытӕ 9

¹Афтӕ хыгъд ӕрцыдысты Израилы ӕппӕт хӕдзарвӕндӕгтӕ ӕмӕ мыггӕгтӕ, фыст сты Израилы паддзӕхты чиныджы. Хуыцауыл сӕ зӕрдӕ кӕй сивтой, уый тыххӕй иудейӕгты уацары атардтой Вавилонмӕ.

²Уый фӕстӕ сӕ уӕзӕгмӕ, сӕ сахартӕм, фыццаг чи ӕрыздӕхт, уыдон уыдысты сауджынтӕ, левиттӕ, Кувӕндоны кусджытӕ ӕмӕ иннӕ израилӕгтӕ.

³Йерусалимы ӕрцӕрӕг адӕм уыдысты Иудӕйы, Бениамины, Ефремы ӕмӕ Менассиайы байзӕддӕгтӕй.

⁴Иудӕйы фырт Парецы байзӕддӕгтӕй ӕрыздӕхти Утай. Йӕ фыдӕлтӕ кӕстӕрӕй хистӕрмӕ: Аммиуд, Омри, Имри, Бани.

⁵Иудӕйы фырт Шелайы байзӕддӕгтӕй ӕрыздӕхтысты йӕ хистӕр зӕнӕг Асайа ӕмӕ йӕ фырттӕ.

⁶Иудӕйы фырт Зарахы байзӕддӕгтӕй ӕрыздӕхти Йеуел. Се ’рвад-ӕфсымӕртимӕ уыдысты ӕхсӕзсӕдӕ нӕуӕдз лӕджы.

⁷Бениамины байзӕддӕгтӕй ӕрыздӕхти Саллу. Йӕ фыдӕлтӕ кӕстӕрӕй хистӕрмӕ: Мешуллам, Ходави, Сенуа.

⁸Йерохамы фырт Ивнейа, Михрийы байзӕддаг Уззийы фырт Ела, стӕй Мешуллам, йӕ фыдӕлтӕ кӕстӕрӕй хистӕрмӕ: Шефати, Реуел, Ивнейа.

⁹Семӕ ӕрыздӕхтысты се ’рвадӕлтӕ дӕр, иннӕ мыггӕгты адӕм, фарастсӕдӕ фӕндзай ӕхсӕз лӕджы. Се ’ппӕт дӕр уыдысты мыггӕгты хистӕртӕ.

¹⁰Сауджынтӕй ӕрыздӕхтысты Иедайа, Йехорив, Йахин,

¹¹Азариа, Хуыцауы хӕдзары хицау, йӕ фыдӕлтӕ кӕстӕрӕй хистӕрмӕ: Хилкиа, Мешуллам, Цадок, Мерайот, Ахитув;

¹²Адайа, йӕ фыдӕлтӕ кӕстӕрӕй хистӕрмӕ: Йерохам, Пашхур, Малкиа; ноджы ма Масай, йӕ фыдӕлтӕ кӕстӕрӕй хистӕрмӕ: Адиел, Йахзера, Мешуллам, Мешиллемит, Иммер.

¹³Семӕ ӕрыздӕхтысты се ’рвадӕлтӕ дӕр, мыггӕгты хистӕртӕ, мин авдсӕдӕ ӕхсай лӕджы — Хуыцауы хӕдзары фӕлтӕрдджын лӕггадгӕнджытӕ.

¹⁴Левиттӕй ӕрыздӕхти Шемайа, Мерарийы мыггагӕй, йӕ фыдӕлтӕ — кӕстӕрӕй хистӕрмӕ — Хашшув, Азрикам, Хашавиа,

¹⁵ноджы ма Бакбакар, Хереш, Галал ӕмӕ Маттаниа, йӕ фыдӕлтӕ — кӕстӕрӕй хистӕрмӕ — Миха, Зихри, Асаф,

¹⁶ноджы ма Овади, йӕ фыдӕлтӕ — кӕстӕрӕй хистӕрмӕ — Шемайа, Галал, Йедутун, стӕй нетофӕгты хъӕуты цӕрӕг Варахи, Елканайы байзӕддаг Асайы фырт.

¹⁷Дуаргӕстӕй ӕрыздӕхтысты: Шаллум, Аккув, Талмон, Ахиман ӕмӕ се ’фсымӕртӕ; Шаллум сын хицау уыд.

¹⁸Ныронг дӕр сӕ мыггӕгтӕ хъалагъур хӕссынц Паддзахы кулдуары цур, Кувӕндоны скӕсӕнварс. Сӕ фыдӕлтӕ кӕддӕр уыдысты левитты рӕсӕнуӕтты хъахъхъӕнджытӕ.

¹⁹Шаллум (йӕ фыдӕлтӕ кӕстӕрӕй хистӕрмӕ: Коре, Евиасаф, Корах) йе ’рвадӕлтимӕ, Корахы байзӕддӕгтимӕ, хъалагъур лӕууыдысты Цатыры къӕсӕрыл, кӕддӕр сӕ фыдӕлтӕ Дунедарӕджы рӕсӕнуатмӕ бацӕуӕн куыд хъахъхъӕдтой, афтӕ.

²⁰Уӕд Елеазары фырт Пинхас уыди сӕ хицау. Дунедарӕг ӕй ӕрымысӕд!

²¹Мешелемиайы фырт Захариа уыди Фембӕлды Цатыры дуаргӕс.

²²Дуаргӕстӕ кӕй скодтой, уыдон ӕдӕппӕт уыдысты дыууӕсӕдӕ дыууадӕс. Мыггӕгты номхыгъды фыст ӕрцыдысты сӕ хъӕуты. Дуаргӕстӕй сӕ сӕвӕрдтой Давид ӕмӕ зонынджын Самуел.

²³Сӕхӕдӕг дӕр ӕмӕ сӕ фырттӕ дӕр хъалагъур хастой Дунедарӕджы хӕдзары, Уаз Цатыры, дуӕртты цур.

²⁴Дуаргӕстӕ хъалагъур хастой цыппарӕрдыгӕй: скӕсӕнӕрдыгӕй, ныгуылӕнӕрдыгӕй, цӕгатӕрдыгӕй ӕмӕ хуссарӕрдыгӕй.

²⁵Се ’рвадӕлтӕ цардысты хъӕуты ӕмӕ-иу сӕм къордгай ӕрбацыдысты къуырийы ӕмгъуыдмӕ, семӕ балӕггад кӕнынмӕ.

²⁶Цыппар сӕйраг хъахъхъӕнӕджы та ӕдзух уыдысты сӕ бӕрнон куысты лӕуд. Адонӕн, левиттӕн, сӕ бӕрны уыдысты Хуыцауы хӕдзары хатӕнтӕ ӕмӕ хӕзнатӕ.

²⁷Хуыцауы хӕдзары алыварс-иу баззадысты ӕхсӕвӕй райсоммӕ, уымӕн ӕмӕ уыдоны бӕрны уыди хъалагъур хӕссыны, стӕй алы райсом дуӕрттӕ гом кӕныны хъуыддаг дӕр.

²⁸Сӕ иуты къухы уыдысты аргъауыны ахсджиаг мигӕнӕнтӕ, нымадӕй сӕ хастой мидӕмӕ дӕр ӕмӕ ӕддемӕ дӕр.

²⁹Иннӕты къухы уыдысты Кувӕндоны иннӕ мигӕнӕнтӕ, стӕй ӕвзаргӕ ссад, сӕн, сой, буд ӕмӕ хӕрздӕфгӕнӕнтӕ.

³⁰Хӕрздӕфгӕнӕнтӕ аразгӕ та кодтой сауджынтӕ.

³¹Левиттӕй иуӕн, Корахы байзӕддаг Шаллумы хистӕр фырт Маттитиайӕн, йӕ бӕрны уыди кувинаг лауаситӕ фыцын.

³²Се ’рвадӕлтӕй, Кехаты байзӕддӕгтӕй, кӕйдӕрты бӕрны уыди, алы сабат дӕр-иу Дунедарӕджы раз Кувӕндоны кӕй ӕрӕвӕрдӕуыд, уыцы дзултӕ фыцын.

³³Зарӕггӕнджытӕ, левитты мыггӕгты хистӕртӕ, цардысты Кувӕндоны хатӕнты. Иннӕ куыстытӕй уыдысты сӕрибар, уымӕн ӕмӕ ӕхсӕв дӕр ӕмӕ бон дӕр ӕххӕст кодтой, сӕ бӕрны чи уыд, уыцы куыст.

³⁴Адон уыдысты левитты мыггӕгты хистӕртӕ; цардысты Йерусалимы.

³⁵Гивоны царди Йеиел, Гивоны сахарӕн йӕ бындурӕвӕрӕг; йӕ усы ном — Мааха.

³⁶Йӕ хистӕр фырт — Авдон, уый дӕле Цур, Киш, Баал, Нер, Надав,

³⁷Гедор, Ахйо, Захариа, Миклот.

³⁸Миклотӕй райгуырди Шимам. Адон дӕр се ’рвад-ӕфсымӕртимӕ цардысты Йерусалимы.

³⁹Нерӕй райгуырди Киш; Кишӕй райгуырди Саул; Саулӕй райгуырдысты Ионатан, Малкишуа, Авинадав ӕмӕ Ешбаал.

⁴⁰Ионатаны фырт — Мерив-Баал; Мерив-Баалӕй райгуырди Миха.

⁴¹Михайы фырттӕ: Питон, Мелех, Тахреа, Ахаз.

⁴²Ахазӕй райгуырд Йара; Йарайӕ райгуырдысты Алемет, Азмавет ӕмӕ Зимри; Зимрийӕ райгуырди Моца;

⁴³Моцайӕ райгуырди Бина; уый фырт Рефайа, уый фырт Еласа, уый фырт Ацел.

⁴⁴Ацелӕн уыд ӕхсӕз фырты: Азрикам, Бохру, Измаел, Шеари, Овади, Ханан.