Read Библи: Сыгъдӕг 2 Азфыстытӕ 11 Bible Online

2 Азфыстытӕ 11 - Библи: Сыгъдӕг bible

2 Азфыстытӕ 11

¹Роховам Йерусалиммӕ куы ’рбахӕццӕ ис, уӕд Иудӕ ӕмӕ Бениамины хӕдзарвӕндӕгтӕй ӕрӕмбырд кодта сӕдӕ ӕстай мин ӕвзаргӕ хӕстоны, цӕмӕй Израилы ныхмӕ схӕцой ӕмӕ Роховамӕн йӕ паддзахад фӕстӕмӕ йӕ къухы бакӕной.

²Дунедарӕг Хуыцауы ӕвзӕрст лӕг Шемайайӕн загъта:

³«Соломоны фырт Роховамӕн, Иудейы паддзахӕн, стӕй, Иудӕ ӕмӕ Бениамины зӕххытыл чи цӕры, уыцы израилӕгтӕн се ’ппӕтӕн дӕр зӕгъ:

⁴„Дунедарӕг афтӕ зӕгъы: уе ’фсымӕрты ныхмӕ ма схӕцут! Алчидӕр уӕ йӕ хӕдзармӕ аздӕхӕд, уымӕн ӕмӕ алцыдӕр ӕрцыд Мӕ фӕндонӕй!“» Адӕм Дунедарӕджы ныхасмӕ байхъуыстой ӕмӕ фӕстӕмӕ аздӕхтысты, Йоровамы ныхмӕ нал схӕцыдысты.

⁵Паддзах Роховам царди Йерусалимы. Иудейы сахарты алыварс сарӕзта бырутӕ.

⁶Уый рацарӕзта Вифлеем, Етам, Текоа,

⁷Бет-Цур, Сохо, Адуллам,

⁸Гат, Мареша, Зиф,

⁹Адораим, Лахиш, Азека,

¹⁰Цора, Айалон ӕмӕ Хеврон. Ацы сахартӕ уыдысты Иудӕ ӕмӕ Бениамины зӕххытыл.

¹¹Сахартӕ бырутӕй куы сӕхгӕдта, уӕд сын хицӕуттӕ сӕвӕрдта. Алы сахары дӕр сарӕзта ӕфтауцуӕттӕ: хойраг, сой ӕмӕ сӕнӕн.

¹²Алы сахар дӕр сифтонг кодта уартытӕ ӕмӕ ӕрцытӕй, хорз сӕ сфидар кодта. Афтӕмӕй Иудӕ ӕмӕ Бениамины зӕххытӕ баззадысты йӕ дӕлбар.

¹³Израилы зӕххыл сауджынтӕ ӕмӕ левиттӕй чидӕриддӕр уыди, уыдон алы рӕттӕй Роховаммӕ ӕрӕмбырд сты.

¹⁴Левиттӕ ныууагътой сӕ фосы хизӕнуӕттӕ, сӕ исбон ӕмӕ ӕрцыдысты Иудеймӕ, Йерусалиммӕ, уымӕн ӕмӕ сӕ Йоровам ӕмӕ йӕ фырттӕ Дунедарӕгӕн лӕггад кӕнын нал уагътой.

¹⁵Роховам йӕхицӕн саужынтӕ равзӕрста, цӕмӕй кувӕн къуыбыртыл лӕггад кӕной, табу кӕной цӕутӕ ӕмӕ уӕнгуыты гуымирытӕн — йӕхӕдӕг кӕй саразын кодта, уыдонӕн.

¹⁶Сауджынтӕ ӕмӕ левиттӕй уӕлдай Израилы хӕдзарвӕндӕгты ’хсӕн Дунедарӕгӕн, Израилы Хуыцауӕн, зӕрдиагӕй лӕггад кӕнын чи сфӕнд кодта, уыдон дӕр Йерусалиммӕ цыдысты ӕмӕ уым Дунедарӕгӕн, сӕ фыдӕлты Хуыцауӕн, хастой нывӕндтӕ.

¹⁷Уыдон стыр ахъаз фесты Иудейы паддзахад сфидар кӕнынӕн. Сӕ фӕрцы Соломоны фырт Роховам ӕртӕ азы паддзахиуӕг кодта, уымӕн ӕмӕ уыцы ӕртӕ азы дӕргъы адӕм цыдысты Давид ӕмӕ Соломоны фӕндагыл.

¹⁸Роховам ракуырдта Махалаты. Йӕ фыд — Давиды фырт Йеримот, йӕ мад та — Йессейы фырт Елиавы чызг Авихаил.

¹⁹Ӕмӕ йын уый ныййардта фырттӕ: Йеуш, Шемариа ӕмӕ Загамы.

²⁰Уый фӕстӕ Роховам ракуырдта Авессаломы чызг Маахайы, ӕмӕ йын уый ныййардта Авийа, Аттай, Зиза ӕмӕ Шеломиты.

²¹Роховамӕн ӕдӕппӕтӕй уыдис ӕстдӕс усы ӕмӕ ӕхсай номылусы, ӕмӕ йын уыдонӕй райгуырди дыууын аст фырты ӕмӕ ӕхсай чызджы. Фӕлӕ йӕ устытӕй Авессаломы чызг Маахайы бӕрц никӕй уарзта.

²²Ӕмӕ Роховам Маахайы лӕппу Авийайы йӕ иннӕ фырттӕн скодта хицау, йӕ фӕстӕ йӕ паддзахы бынат уымӕн куыд баззайа, афтӕ.

²³Паддзах Роховам зондджын ми бакодта: йӕ фыртты се ’ппӕты дӕр арвыста Иудӕ ӕмӕ Бениамины зӕххыты алы рӕттӕм, бырутӕй ӕхгӕд сахартӕм. Алкӕмӕн дӕр дзы парахатӕй радта фӕсауӕрц ӕмӕ сын бирӕ устытӕ ӕрхаста.