Read Библи: Сыгъдӕг 2 Азфыстытӕ 22 Bible Online

2 Азфыстытӕ 22 - Библи: Сыгъдӕг bible

2 Азфыстытӕ 22

¹Йерусалимы цӕрджытӕ йын йӕ бӕсты паддзахӕй сӕвӕрдтой йӕ кӕстӕр фырт Ахазиайы, уымӕн ӕмӕ йӕ хистӕр фырттӕ ӕгас нал уыдысты. Араббӕгтимӕ цы ӕфсӕддон къорд ӕрбацыд, уый иудейӕгты хӕстон асадӕнмӕ бабырста ӕмӕ сӕ ныццагъта. Афтӕмӕй Иудейӕн паддзах сси Иорамы фырт Ахазиа.

²Йерусалимы паддзах куы сси, уӕд ыл цыди дыууӕ ӕмӕ дыууиссӕдз азы, ӕмӕ йӕ паддзахиуӕг ахаста иу аз. Йӕ мад Атали уыд Амрийы фырты чызг.

³Ахазиа дӕр Ахавы мыггаджы фӕндагыл цыди, уымӕн ӕмӕ йын уынаффӕгӕнӕг уыдис йӕ мад, ӕнӕхуыцау митыл ӕй ардыдта.

⁴Ахавы байзӕддӕгты фӕзмгӕйӕ, Дунедарӕгӕн ӕнӕуынон цы уыди, уыдӕттӕ кодта, уымӕн ӕмӕ йын йӕ фыды амӕлӕты фӕстӕ уынаффӕгӕнджытӕ уыдон уыдысты ӕмӕ йӕ сӕфтмӕ ӕркодтой.

⁵Сӕ уынаффӕмӕ байхъусгӕйӕ, Израилы паддзах Йорамимӕ, Ахавы фыртимӕ, бабырста Галаадаг Рамотмӕ ӕмӕ Сирийы паддзах Хазаелы ныхмӕ схӕцыди. Сириӕгтӕ йӕ фӕцӕф кодтой,

⁶ӕмӕ ӕрбаздӕхти Изреелмӕ, Сирийы паддзах Хазаелы ныхмӕ хӕцгӕйӕ, Рамоты сахары цы цӕфтӕ райста, уыдонӕй йӕхи сдзӕбӕх кӕнынмӕ. Ахавы фырт Йораммӕ йӕ рынчыны заман Изреелмӕ бӕрӕггӕнӕг ӕрбацыд Иудейы паддзах Ахазиа, Иорамы фырт.

⁷Ӕмӕ уый Ахазиайӕн уыди йӕ адзалы бон, уымӕн ӕмӕ афтӕ сфӕнд кодта Хуыцау. Ахазиа Йораммӕ куы ’рбацыди, уӕд иумӕ Нимшийы фырт Йегуйы ныхмӕ хӕцынмӕ рацыдысты, уый та Дунедарӕг байсӕрста паддзахӕй, цӕмӕй Ахавы бинонты ныццӕгъда.

⁸Ахавы бинонтӕн цы тӕрхон рахастӕуыд, уый ӕххӕстгӕнгӕйӕ, Йегу ссардта Иудейы ӕфсады хицӕутты, стӕй Ахазиайӕн йе ’фсымӕрты лӕппуты, лӕггад ын чи кодта, уыдоны, ӕмӕ сӕ амардта.

⁹Уый фӕстӕ Ахазиайы агурын райдыдта ӕмӕ, Самарийы ӕмбӕхстӕй куы бадти, уӕд ахст ӕрцыди. Йегумӕ йӕ ӕрбакодтой ӕмӕ йӕ амардтой. Бавӕрыны аккаг ӕй скодтой, уымӕн ӕмӕ загътой: «Цыфӕнды куы уа, уӕддӕр Дунедарӕгӕн зӕрдиагӕй кад чи кодта, уыцы Иосафаты фырты фырт у». Ӕмӕ Ахазиайы хӕдзары, паддзахиуӕг кӕнын йӕ бон кӕмӕн суыдаид, ахӕмӕй ничиуал баззад.

¹⁰Уымӕн ӕмӕ йын йӕ мад Атали йӕ амӕлӕты хабар куы базыдта, уӕд бавдӕлд ӕмӕ Иудӕйы хӕдзарвӕндаджы паддзӕхты мыггаг бынтондӕр сыскъуыйын кодта.

¹¹Фӕлӕ паддзахы чызг Йошевӕ Ахазиайы чысыл лӕппу Иоасы, марынвӕнд кӕмӕн скодтой, паддзахы уыцы фыртты ’хсӕнӕй радавта, йӕ дыджызӕйы дӕр ын ракодта ӕмӕ сӕ уаты бамбӕхста. Афтӕмӕй Йошевӕ (паддзах Иорамы чызг, сауджын Йеходайы бинойнаг, Ахазиайы хо), Иоасы Аталийӕ бамбӕхста, ӕмӕ йӕ уый нӕ амардта.

¹²Дунедарӕджы Кувӕндоны Иоас семӕ ӕмбӕхстӕй фӕци ӕхсӕз азы. Бӕстӕйы та уыцы заман паддзахиуӕг кодта Атали.