Read Библи: Сыгъдӕг 2 Азфыстытӕ 3 Bible Online

2 Азфыстытӕ 3 - Библи: Сыгъдӕг bible

2 Азфыстытӕ 3

¹Соломон Дунедарӕджы Кувӕндон аразын райдыдта Йерусалимы, Мориайы хохыл, кӕддӕр Дунедарӕг йӕ фыд Давидмӕ кӕм раргом ис, уым, йевусаг Орнаны мусуатыл. Орнан йевусӕгтӕй уыди.

²Аразын та йӕ райдыдта йӕ паддзахиуӕджы цыппӕрӕм аз, дыккаг мӕйӕн йӕ дыккаг бон.

³Соломон Хуыцауы Кувӕндонӕн скодта ахӕм бындур: йӕ дӕргъ — ӕртиссӕдз ӕлмӕрины, йӕ уӕрх — ссӕдз ӕлмӕрины.

⁴Кувӕндоны тыргъӕн йӕ уӕрх уыди ссӕдз ӕлмӕрины, агъуыстӕн йӕхи уӕрхмӕ гӕсгӕ, йӕ бӕрзӕнд та — ӕртиссӕдз ӕлмӕрины. Йӕ мидӕггаг къултӕ йын Соломон састӕрдта сыгъдӕг сыгъзӕринӕй.

⁵Кувӕндоны сӕйраг агъуысты къултӕ мидӕгӕй састӕрдта кипарисы фӕйнӕджытӕй, уыдон та — сыгъдӕг сыгъзӕринӕй ӕмӕ сӕ сфӕлыста пальмӕтӕ ӕмӕ рӕхысты нывӕфтыдтӕй.

⁶Ноджы ма йӕ саив кодта зынаргъ дуртӕ ӕмӕ Парваимӕй ласт сыгъзӕринӕй.

⁷Кувӕндоны агъуыст, хъайванӕй, асинӕй, къулӕй, дуарӕй, састӕрдта сыгъзӕринӕй. Къултыл скӕнын кодта херувимты нывӕфтыдтӕ.

⁸Уый фӕстӕ сарӕзта Рухсмонуат. Йӕ уӕрх уыди ссӕдз ӕлмӕрины, Кувӕндоны уӕрхмӕ гӕсгӕ, йӕ дӕргъ дӕр — ссӕдз ӕлмӕрины. Йӕ састӕрынӕн бахардз кодта сыгъдӕг сыгъзӕрины ӕхсӕзсӕдӕ таланты.

⁹Сыгъзӕрин зӕгӕлтӕн сӕ уӕз уыди фӕндзай шекелы. Уӕллаг уӕттӕ дӕр иууылдӕр састӕрдта сыгъзӕринӕй.

¹⁰Рухсмонуаты мидӕг хъӕдӕрмӕгӕй сарӕзта дыууӕ базыртыгъд херувимы ӕмӕ сӕ састӕрдта сыгъзӕринӕй.

¹¹Сӕ базырты дӕргъ иумӕйагӕй — ссӕдз ӕлмӕрины. Сӕ иуӕн йӕ иу базыры дӕргъ уыди фондз ӕлмӕрины ӕмӕ ӕндзӕвыд агъуысты иу къулыл, йӕ иннӕ базыр дӕр — фондз ӕлмӕрины ӕмӕ ӕндзӕвыд иннӕ херувимы базырыл.

¹²Дыккаг херувимӕн дӕр йӕ иу базыры дӕргъ уыди фондз ӕлмӕрины ӕмӕ ӕндзӕвыд Кувӕндоны къулыл, йӕ иннӕ базыр дӕр — фондз ӕлмӕрины ӕмӕ ӕндзӕвыд иннӕ херувимы базырыл.

¹³Афтӕмӕй, дыууӕ базыртыгъд херувимӕн иу къулӕй иннӕйы онг сӕ иумӕйаг дӕргъ уыди ссӕдз ӕлмӕрины. Лӕууыдысты сӕ къӕхтыл, ӕмӕ се ’ргом арӕзт уыди Кувӕндоны сӕйраг агъуысты ’рдӕм.

¹⁴Рухсмонуатӕн Соломон бауафын кодта мидӕмбӕрзӕн, ӕрвхуыз, сӕнт сырх ӕмӕ сырх-сырхид ӕндӕхтӕй, стӕй лыстӕг гӕнӕй. Сфӕлыстой йӕ херувимты нывӕфтыдтӕй.

¹⁵Кувӕндоны раззаг фарс Соломон сарӕзта дыууӕ цӕджындзы, сӕ алкӕцыйы бӕрзӕнд дӕр — дӕс ӕмӕ ссӕдз ӕлмӕрины. Сӕ цъуппытыл ӕрсадзынӕн та — фӕйнӕ ӕфтуаны, алкӕмӕн дӕр дзы йӕ бӕрзӕнд — фондз ӕлмӕрины.

¹⁶Ноджы сарӕзта, Кувӕндоны агъуысты цы рӕхыстӕ уыди, уыдоны халдихтӕ ӕмӕ сӕ ӕфтуантыл бафидар кодта. Скодта ма гранат фӕткъуыйы нывӕфтыдтӕ ӕмӕ сӕ ныффидар кодта рӕхыстыл.

¹⁷Цӕджындзтӕ сӕвӕрдта Кувӕндоны раз: сӕ иу — рахизӕрдыгӕй, иннӕ та — галиуӕрдыгӕй. Ӕмӕ рахиз цӕджындзӕн Соломон радта ном Йахин, галиуӕн та — Боаз.