Read Библи: Сыгъдӕг 2 Азфыстытӕ 9 Bible Online

2 Азфыстытӕ 9 - Библи: Сыгъдӕг bible

2 Азфыстытӕ 9

¹Соломон ахӕм номдзыд сси, ӕмӕ йӕ кой суанг Савайы ус-паддзахмӕ дӕр байхъуыст. Уый йӕм, уыци-уыцитӕй йӕ бафӕлварынмӕ, йӕ бирӕ фӕсдзӕуинтимӕ ӕрбацыди Йерусалиммӕ. Теуатыл ын ӕрбаласта бирӕ лӕвӕрттӕ: хӕрздӕфгӕнӕнтӕ, ӕнӕнымӕц сыгъзӕрин ӕмӕ зынаргъ дуртӕ. Соломонмӕ куы бацыд, уӕд йемӕ, цӕуыл ӕй фӕндыд, уыдӕттыл фӕныхас кодта.

²Соломон ын йӕ алы фарстӕн дӕр дзуапп радта, йӕ фӕрстытӕй йын иу дӕр зынӕмбарӕн нӕ уыд ӕмӕ ӕнӕ дзуаппӕй нӕ баззад.

³Савайы ус-паддзах йӕхи цӕстӕй федта Соломоны куырыхон зонд, стӕй, цы галуан сарӕзта, уый;

⁴йӕ дзаджджын фынгтӕ; йӕ барджынтӕ цы агъуыстыты бадынц; йӕ лӕггадгӕнджытӕ ӕмӕ йӕ дзагдарты сӕ аив дарӕсты. Ноджы ма федта, Соломон Дунедарӕджы Кувӕндоны цы иууылсудзинаг нывӕндтӕ хӕссы, уый дӕр, ӕмӕ йын фыр дисӕй улӕфт дӕр нал фаг кодта.

⁵Паддзахӕн загъта: — Мӕ зӕххыл дын дӕ хъуыддӕгтӕ ӕмӕ дӕ куырыхон зонды тыххӕй цы фехъуыстон, уыдон ӕцӕг разындысты.

⁶Уыцы ныхӕстӕ мӕ нӕ уырныдтой, цалынмӕ ӕрбацыдтӕн ӕмӕ сӕ мӕхи цӕстӕй федтон, уӕдмӕ. Дӕ куырыхон зонд, цы фехъуыстон, уымӕй дзӕвгар фылдӕр у. Ӕппӕт уыдӕттӕн мын се ’мбисы бӕрц дӕр нӕ радзырдтой.

⁷Тӕхудиаг сты дӕ адӕм! Тӕхудиаг сты дӕ лӕггадгӕнджытӕ, ӕдзух дӕ разы чи лӕууы, дӕ уӕлзондмӕ дын чи хъусы!

⁸Арфӕгонд уӕд Дунедарӕг, дӕ Хуыцау, хӕрзаудӕн дын Чи кӕны ӕмӕ дӕ Йӕ паддзахы къӕлӕтджыны Чи сбадын кодта, цӕмӕй Дунедарӕджы, дӕ Хуыцауы раз, паддзахиуӕг кӕнай! Дунедарӕг Израилы адӕмы кӕй уарзы, Йӕ зӕрды сӕ мыггагмӕ ӕрфидар кӕнын кӕй ис, уый тыххӕй дӕ сӕвӕрдта паддзахӕй, цӕмӕй сын рӕстаг тӕрхон кӕнай.

⁹Ӕмӕ Савайы ус-паддзах Соломонӕн балӕвар кодта ӕхсӕзыссӕдз таланты сыгъзӕрин, ӕнӕнымӕц хӕрздӕфгӕнӕнтӕ ӕмӕ хӕзнадуртӕ. Савайы ус-паддзах паддзах Соломонӕн цы диссаджы хӕрздӕфгӕнӕнтӕ ӕрбаласта, ахӕмтӕ уӕды онг никуыма ничи федта.

¹⁰Хирам ӕмӕ Соломоны кусджытӕ дӕр Офирӕй ӕрбаластой канд сыгъзӕрин нӕ, фӕлӕ ма зынаргъ хъӕдӕрмӕг алмуг ӕмӕ хӕзнадуртӕ дӕр.

¹¹Уыцы хъӕдӕрмӕгӕй Соломон Дунедарӕджы Кувӕндон ӕмӕ йӕ Галуанӕн скодта асинтӕ. Ноджы ма дзы Кувӕндоны фӕндырдзӕгъдджытӕн сарӕзта хъисфӕндыртӕ ӕмӕ дыууадӕстӕнонтӕ. Ахӕм диссӕгтӕ раздӕр никуыма ничи федта Иудейы.

¹²Паддзах Соломон йӕхӕдӕг дӕр Савайы ус-паддзахы йӕ лӕвӕрттӕй сбуц кодта, ноджы ма йын радта, йӕ зӕрдӕ цыдӕриддӕр загъта ӕмӕ дзы йӕхи дзыхӕй цы ракуырдта, уыдон дӕр. Ӕмӕ Савайы ус-паддзах йӕ фӕсдзӕуинтимӕ сӕхимӕ аздӕхти.

¹³Соломонмӕ ӕрвылаз цы сыгъзӕрин ӕфтыд, уымӕн йӕ уӕз уыди ӕхсӕзсӕдӕ ӕхсай ӕхсӕз таланты.

¹⁴Уымӕй уӕлдай ма йӕм сыгъзӕрин ластой йӕ базаргӕнджытӕ ӕмӕ йӕ сӕудӕджертӕ, стӕй йӕ бӕстыхицӕуттӕ ӕмӕ суанг Аравийы ӕппӕт паддзӕхтӕ дӕр.

¹⁵Соломон рацӕгъдын кодта дыууӕсӕдӕ стыр сыгъзӕрин уарты, алкӕмӕн дӕр дзы йӕ сыгъзӕрины уӕз уыди ӕхсӕзсӕдӕ шекелы.

¹⁶Ноджы ма — ӕртӕсӕдӕ гыццыл уарты, алкӕмӕн дӕр дзы йӕ сыгъзӕрины уӕз — ӕртӕсӕдӕ шекелы. Паддзах уыцы уартытӕ бафснайдта Ливайнаг хъӕдӕй фӕлыст агъуысты.

¹⁷Соломон пылыстӕгӕй скодта паддзахы егъау къӕлӕтджын ӕмӕ йӕ састӕрдта сыгъдӕг сыгъзӕринӕй.

¹⁸Паддзахы къӕлӕтджынмӕ цыди ӕхсӕз къахӕвӕрӕны, алкӕмӕн дӕр дзы йӕ фӕйнӕфарс уыди фӕйнӕ цонгӕнцайӕны, уыдоны раз та — фӕйнӕ домбайы фӕлгонцы. Бынӕй йыл фидаргонд уыди сыгъзӕрин къахӕвӕрӕн.

¹⁹Ӕхсӕз къахӕвӕрӕны фӕйнӕфарс лӕууыдысты дыууадӕс домбайы фӕлгонцы. Ахӕм диссаджы къӕлӕтджын иу паддзахады дӕр нӕ уыди.

²⁰Соломонӕн йӕ нуазӕнтӕ иууылдӕр уыдысты сыгъзӕринӕй конд, ливайнаг хъӕдӕй фӕлыст агъуысты дзауматӕ дӕр иууылдӕр — сыгъдӕг сыгъзӕринӕй конд. Ӕвзист дзаумайӕ йӕм ницы уыди, уымӕн ӕмӕ Соломоны заман ӕвзистӕн ницы аргъ уыд.

²¹Паддзахмӕ уыди, Хирамы адӕмимӕ Таршишмӕ чи цыди, ахӕм наутӕ, ӕмӕ йын уыдон Хирамы наудзогтимӕ ӕртӕ афӕдзы иу хатт ластой сыгъзӕрин, ӕвзист ӕмӕ пылыстӕг, стӕй маймулитӕ ӕмӕ мӕлхъытӕ.

²²Дунейы паддзӕхты ’хсӕн Соломоны куырыхон зонд ӕмӕ хъӕздыгдзинадӕн ӕмбал нӕ уыди.

²³Зӕххыл цы паддзӕхтӕ уыд, уыдон иууылдӕр бӕллыдысты Соломоны фенынмӕ, Хуыцау ын цы куырыхон зонд балӕвар кодта, уымӕ байхъусынмӕ.

²⁴Афӕдзӕй-афӕдзмӕ-иу ын уыдонӕй алчидӕр ӕрбаласта лӕвӕрттӕ: ӕвзист ӕмӕ сыгъзӕрин дзауматӕ, дарӕстӕ, хӕцӕнгӕрзтӕ, хӕрздӕфгӕнӕнтӕ, бӕхтӕ ӕмӕ хӕргӕфсытӕ.

²⁵Соломонмӕ уыди цыппар мин бӕхдоны — бӕхтӕ ӕмӕ хӕцӕн уӕрдӕттӕн, дыууадӕс мины та йӕм уыди бӕхтӕ. Дардта сӕ, хӕцӕн уӕрдӕттӕн цы сахартӕ сарӕзта, уыдоны, сӕ иу хай та сын ныууагъта йӕхимӕ, Йерусалимы.

²⁶Евфраты донӕй филистимӕгты зӕхх ӕмӕ Мысыры арӕны онг цы паддзӕхтӕ уыди, уыдон се ’ппӕт дӕр уыдысты Соломоны дӕлбар.

²⁷Соломоны заманы ӕвзист Йерусалимы сарӕх ис хуымӕтӕг дурау, кедр та, хохрӕбын цы сикомортӕ зайынц, уыдонау.

²⁸Соломонӕн бӕхтӕ ластой Мысыр ӕмӕ зӕххы цъары ӕндӕр бӕстӕтӕй.

²⁹Паддзах Соломонӕн йӕ иннӕ хабӕрттыл райдианӕй кӕронмӕ дзырдӕуы пехуымпар Натаны азфыстыты, силомаг Ахийайы рагуацты чиныджы ӕмӕ, зонынджын Йеддойӕн Наваты фырт Йоровамы тыххӕй Хуыцау цы цӕстылуайӕнтӕ раргом кодта, уыдоны.

³⁰Соломон ӕппӕт Израилӕн Йерусалимы паддзахиуӕг фӕкодта дыууиссӕдз азы.

³¹Соломон куы амарди, уӕд ӕй бавӕрдтой йӕ фыд Давиды сахары. Йӕ фӕстӕ паддзах сси йӕ фырт Роховам.