Read Библи: Сыгъдӕг Естер 2 Bible Online

Естер 2 - Библи: Сыгъдӕг bible

Естер 2

¹Фӕстӕдӕр, Ксерксӕн йӕ маст куы ’рсабыр, уӕд Ваштийы мысын райдыдта. Сылгоймаджы ми ӕмӕ йӕхи уынаффӕйыл ныссагъӕс кодта.

²Йӕ лӕггадгӕнджытӕ загътой, паддзахӕн ӕрыгон рӕсугъд чызджытӕ агурын хъӕуы, зӕгъгӕ.

³Паддзах йӕ бӕстӕйы алы рӕтты снысан кӕнӕд, йӕ зӕрдӕ кӕуыл дары, ахӕм адӕймӕгты. Уыдон Шушанмӕ, сылгоймӕгты хатӕнмӕ, ӕрхондзысты ӕппӕты рӕсугъддӕр чызджыты. Паддзахы сылдоны хицау Хегайы бӕрны сӕ бакӕндзысты, цӕмӕй алы хӕрздӕфгӕнӕнтӕй сӕхимӕ базилой.

⁴Паддзахы зӕрдӕмӕ цы ӕрыгон рӕсугъд фӕцӕуа, уый Ваштийы бынаты йӕ фарсмӕ ӕрбаддзӕн. Уыцы ныхӕстӕ паддзахы зӕрдӕмӕ фӕцыдысты ӕмӕ растдӕриддӕр афтӕ бакодта.

⁵Уыцы рӕстӕг Шушаны царди Бениамины байзӕддагӕй иу иудейаг, йӕ ном Мардохей, Иудейы паддзах Йехониаимӕ Вавилоны паддзах Навуходоносор Йерусалимӕй уацары кӕй ракодта, уыцы адӕмӕй. Мардохей уыди Иаиры фырт. Иаир та уыди Шимийы фырт, Кишы фырты фырт.

⁷Мардохейы фыды ’фсымӕр ӕмӕ йӕ ус амардысты, сӕ чызг Хадассӕ, Естер дӕр ӕй хуыдтой, сидзӕрӕй баззад, ӕмӕ йӕ Мардохей схъомыл кодта. Цӕсгомӕй дӕр ӕмӕ кондӕй дӕр Естер тынг рӕсугъд уыди.

⁸Паддзахы уынаффӕмӕ гӕсгӕ Шушанмӕ бирӕ рӕсугъд чызджытӕ ӕрбамбырд. Паддзахы сылдоны хицау Хегайы бӕрны сӕ бакодтой. Чызджыты ’хсӕн уыди Естер дӕр.

⁹Естер Хегайы зӕрдӕмӕ фӕцыд ӕмӕ йын хӕрздӕфгӕнӕнтӕ ӕмӕ, уымӕй уӕлдай цы ’мбӕлди, уыдон раттыныл фӕстиат нӕ фӕкодта. Галуаны унӕуттӕй йын авды лӕггадгӕнӕг скодта ӕмӕ йӕ семӕ сылгоймӕгты хатӕны дзӕбӕхдӕр ран ӕрцӕрын кодта.

¹⁰Чи у, кӕцӕй у, уыдӕтты тыххӕй Естер ницы дзырдта, уымӕн ӕмӕ йын Мардохейӕ афтӕ фӕдзӕхст уыди.

¹¹Мардохей та-иу ӕрвылбон фӕзынди сылгоймӕгты хатӕны кӕрты — Естер йӕхи куыд хаты, йӕ хъуыддӕгтӕ куыд сты, уый бӕрӕг кодта.

¹²Паддзах Ксерксы размӕ бацӕуыны тыххӕй алы чызг дӕр, сылгоймагӕн куыд ӕмбӕлд, афтӕ дыууадӕс мӕйы дӕргъы йӕхи хъуамӕ цӕттӕ кодтаид: ӕхсӕз мӕйы йӕ буар миррӕйы сойӕ сӕрстаид, ӕхсӕз мӕйы та — алыхуызон хӕрздӕфгӕнӕнтӕ ӕмӕ сылгоймаджы алыхуызон сӕрдӕнтӕй.

¹³Уый фӕстӕ чызгӕн паддзахмӕ фӕндаг уыди. Сылгоймӕгты хатӕнӕй паддзахы размӕ цӕугӕйӕ цӕмӕйфӕнды куы загътаид, хъӕуы мӕ, зӕгъгӕ, уӕддӕр ын ӕй лӕвӕрдтой.

¹⁴Изӕры-иу бахызти паддзахы къӕсӕрӕй, райсомӕй та йӕ фӕндаг уыди сылгоймӕгты ӕндӕр хатӕнмӕ, паддзахы номылустытӕ кӕм цардысты, уырдӕм. Уым хицау уыди Шаашгаз. Паддзах ӕй йӕхӕдӕг ма ӕрцагурӕд, ӕндӕр ӕм чызгӕн фӕндаг нал уыди.

¹⁵Естерӕн, Мардохейы фыды ’фсымӕр Авихаилы чызгӕн, йӕ рад куы ’рцыди ӕмӕ паддзахмӕ куы раст кодта, уӕд ӕппындӕр ницы бадомдта, сылгоймӕгтӕм йӕ цӕст чи дардта, уыцы евнух Хегай йын цӕмӕ бацамыдта, уымӕй уӕлдай. Чи-иу ӕй федта, уыдонӕй алкӕй зӕрдӕмӕ дӕр цыди Естер.

¹⁶Ксерксӕн йӕ паддзахиуӕджы ӕвдӕм аз бахызти йӕ къӕсӕрӕй Естер. Уый уыди дӕсӕм мӕйы, теветы.

¹⁷Йӕ иннӕ устытӕй йӕ фылдӕр бауарзта Ксеркс, иннӕ чызджытӕй йӕ зӕрдӕмӕ тынгдӕр фӕцыд. Паддзахы худ ын ӕркодта йӕ сӕрыл ӕмӕ йӕ ус-паддзахӕй ӕрбадын кодта Ваштийы бынаты.

¹⁸Естеры кадӕн паддзах стыр куывд скодта йӕ барджынтӕ ӕмӕ йӕ уӕздӕттӕн. Сӕ фиддонтӕ фӕкъаддӕр сты йӕ паддзахады алы бӕстӕйӕн дӕр, йӕ зӕрдӕйы хорзӕй паддзахы лӕвӕрттӕ фӕкодта.

¹⁹Дыккаг хатт куы фӕсидтысты чызджытӕм, уӕд Мардохей паддзахы галуаны кулдуары раз бадти.

²⁰Естер ницыма загъта, чи у ӕмӕ кӕцон у, уый тыххӕй, Мардохей йын куыд бафӕдзӕхста, афтӕ. Йӕ ныхасмӕ та йын Естер, йӕ хъомылгӕнинаг куы уыди, уӕд куыд хъуыста, ныр дӕр афтӕ.

²¹Мардохей паддзахы галуаны кулдуары раз куы бадти, уӕд паддзахы дӕлдӕртӕ, йӕ дуаргӕстӕ Бигтан ӕмӕ Тереш, паддзах Ксерксы ныхмӕ фыдвӕнд сарӕзтой, цӕмӕй йӕ амарой.

²²Мардохей уый базыдта ӕмӕ йӕ Естерӕн загъта, Естер та йӕ Мардохейы номӕй паддзахӕн фехъусын кодта.

²³Уыйадыл хъуыддагмӕ каст ӕрцыди, сбӕлвырд ӕй кодтой ӕмӕ дыууӕйы дӕр бӕласыл ӕрцауыгътой. Ӕппӕт уыдӕттӕ та паддзахы цӕстыты раз азфыстмӕ хаст ӕрцыдысты.