Read Библи: Сыгъдӕг Естер 5 Bible Online

Естер 5 - Библи: Сыгъдӕг bible

Естер 5

¹Ӕртыккаг бон Естер йӕ уӕлӕ скодта йӕ паддзахфӕлыст, ацыд ӕмӕ паддзахы дуары раз слӕууыди. Паддзах йӕ къӕлӕтджыны бадти, йӕ цӕсгом — дуары ’рдӕм.

²Естер-ӕхсины кӕрты лӕугӕ куы ауыдта, уӕд ӕм кӕсгӕйӕ аззади. Йӕ къухы цы зӕрин лӕдзӕг уыди, уымӕй йын ацамыдта. Естер хӕстӕг бацыди ӕмӕ лӕдзӕджы хъуымбылӕгыл бандзӕвыди къухӕй.

³Паддзах ӕй бафарста: «Цы дӕ хъӕуы, ӕхсин-паддзах Естер, цы курдиат дӕм ис? Ӕрмӕст ской кӕн, ӕмӕ дын паддзахады ӕмбис дӕр ратдзынӕн».

⁴Естер загъта: «Кӕд паддзахӕн фӕндон у, уӕд ӕй абон мӕ фынгмӕ хонын ӕмӕ мӕм Аманимӕ саккаг кӕнӕд».

⁵Паддзах загъта: «Аманмӕ фӕдзурут, ӕмӕ Естеры фӕндон ӕххӕстгонд куыд уа!» Уыйадыл паддзах Естеры хуындмӕ фӕзынди Аманимӕ.

⁶Сӕны нуазӕнтӕ систой, афтӕ та паддзах Естеры бафарста: «Цавӕр курдиат дӕм ис? Паддзахады ӕмбис куы бацагурай, уӕд дӕр дӕу у».

⁷Естер загъта: «Курдиат мӕм бӕргӕ ис. Кӕд мӕ паддзахы хорзӕх уа, уӕд мын ӕй сӕххӕст кӕндзӕн. Райсом дӕр та паддзах мӕ хуындмӕ саккаг кӕнӕд Аманимӕ, ӕмӕ йын уӕд дзуапп ратдзынӕн».

⁹Уыцы бон Аман уӕлдай зӕрдӕхъӕлдзӕг ӕмӕ буцӕй рараст йӕ хӕдзармӕ. Паддзахы галуаны ӕрбахизӕны Мардохейыл амбӕлд. Уый йӕ хъуыды дӕр не ’ркодта. Цыт кӕныны охыл йӕ бынатӕй уӕлдай змӕлд нӕ фӕкодта. Аман мӕстӕй ссыгъди. Йӕхи йӕм тыххӕй баурӕдта, афтӕмӕй сӕхимӕ ацыди. Йӕ ус Зереш ӕмӕ йӕ хӕлӕрттӕм фӕдзурын кодта.

¹¹Йӕхицӕй ӕппӕлынӕй сын нал ӕфсӕсти — куыд кадджын ӕмӕ бонджын у, куыд бирӕ фырттӕ йын ис, куыд хъулон у паддзахӕн иннӕ уӕздӕттӕ ӕмӕ дӕлбарты ’хсӕн.

¹²«Суанг ма ӕхсин-паддзах Естер дӕр, — дзырдта Аман, — йӕ фынгмӕ мӕн йеддӕмӕ никӕй фӕхуыдта. Райсом дӕр та йӕм паддзахимӕ хуынд дӕн.

¹³Фӕлӕ мын уыдӕттӕ ад нал фӕкӕнынц, иудейаг Мардохейы паддзахы галуаны ӕрбахизӕны куы фенын, уӕд».

¹⁴Йӕ ус Зереш ӕмӕ йын йӕ хӕлӕрттӕ бауынаффӕ кодтой: «Фӕндзай ӕлмӕрины бӕрзӕндӕн цӕджындз ныссадзын кӕн ӕмӕ райсом паддзахӕн зӕгъ, цӕмӕй Мардохейы уыцы цӕджындзыл ӕрцауындзой. Ды та зӕрдӕхъӕлдзӕгӕй паддзахимӕ хуындмӕ ацӕудзынӕ». Аманмӕ хорз фӕкасти уыцы хъуыды, ӕмӕ цӕджындз ныссадзын кодта.