Read Библи: Сыгъдӕг Рацыд 12 Bible Online

Рацыд 12 - Библи: Сыгъдӕг bible

Рацыд 12

¹Мысыры ма куы уыдысты Моисей ӕмӕ Аарон, уӕд сын Дунедарӕг загъта:

²«Ацы мӕй уын хъуамӕ афӕдзы фыццаг мӕйыл нымад уа.

³Израилы дзыллӕйӕн фехъусын кӕнут, йӕ дӕсӕм бон уӕ алы хӕдзар дӕр йӕ лыстӕг фосӕй иу уӕрыкк рахицӕн кӕнӕд, зӕгъгӕ.

⁴Гыццыл бинонтӕ куы уой ӕмӕ сын уӕрыкк иу хӕрдӕн бирӕ куы уа, уӕд-иу ӕй ӕввахсдӕр сыхагимӕ иумӕ бахӕрӕнт. Цал лӕджы фаг суыдзӕн, уый-иу сбӕрӕг кӕнӕнт.

⁵Уӕрыкк хъуамӕ уа ӕнӕсахъат, нӕл, афӕдздзыд. Уӕрыччы бӕсты райсӕн ис сӕныкк.

⁶Банхъӕлмӕ-иу кӕсут мӕйы цыппӕрдӕсӕм бонмӕ ӕмӕ-иу ӕй изӕрдалынгты аргӕвдут: Израилы дзыллӕйӕ алкӕмӕн дӕр афтӕ гӕнгӕ у.

⁷Райсут-иу ын йӕ тугӕй ӕмӕ дзы айсӕрдут, цы хӕдзӕртты йӕ хӕрдзыстут, уыдонӕн сӕ дуӕртты тарвӕзтӕ ӕмӕ уӕлкъӕсӕртӕ.

⁸Дзидза иууылдӕр тӕккӕ уыцы ӕхсӕв хъуамӕ хӕрд ӕрцӕуа, хӕрын ӕй хъӕуы физонӕгфыхӕй, донгонд дзултӕ ӕмӕ маст кӕрдӕджытимӕ.

⁹Ӕрдӕгфых кӕнӕ йӕ доны фыхӕй ма хӕрут, кусарт-иу ӕнӕхъӕнӕй — ӕд сӕр, ӕд къӕхтӕ, ӕд хуылфыдзаумӕттӕ — арты сӕрмӕ сфизонӕг кӕнут.

¹⁰Райсоммӕ-иу дзы мацыуал ныууадзут, цы дзы нӕ бахӕрат, уый арты басудзут.

¹¹Хӕрут ронбастӕй, уӕ къахыдарӕс — уӕ къӕхтыл, уӕ лӕдзджытӕ — уӕ къухы, афтӕмӕй. Хӕрут-иу тагъд-тагъд — уый Дунедарӕджы Куадзӕн у.

¹²Уыцы ӕхсӕв Ӕз Мысыры астӕуты ацӕудзынӕн ӕмӕ йын фӕмард кӕндзынӕн йӕ хистӕр фыртты дӕр ӕмӕ йӕ фосы сӕртӕ дӕр. Уый уыдзӕн Мӕ тӕрхон Мысыры ӕппӕт хуыцӕуттӕн. Ӕз — Дунедарӕг!

¹³Сымахӕн та уӕ хӕдзӕрттӕ тугӕй нысангонд уыдзысты ӕмӕ, уый фенгӕйӕ, уӕ иувӕрсты ацӕудзынӕн. Ӕз Мысыры зӕхх ахъаззаг ӕрцӕвдзынӕн, фӕлӕ сымахӕн ӕппындӕр ницы уыдзӕн.

¹⁴Уыцы бон уын мысӕн бонӕй баззайӕд ӕмӕ йӕ фӕлтӕрӕй-фӕлтӕрмӕ бӕрӕг кӕнут Дунедарӕджы кадӕн. Уый уын — мыггагмӕйы ӕгъдау.

¹⁵Авд боны дӕргъы хъуамӕ хӕрат донгонд дзултӕ. Фыццаг бонӕй фӕстӕмӕ уӕ хӕдзӕртты ӕнхъизӕн куыннӕ уа, афтӕ бакӕнут. Уыцы авд боны дӕргъы ӕнхъизӕнджын дзулӕй чи фӕхъӕстӕ уа, уый Израилы адӕмӕй фӕхъӕудзӕн.

¹⁶Фыццаг бон банымайут уазыл, ӕвдӕм бон дӕр нымад ӕрцӕуӕд уазыл. Уӕхицӕн хӕринаг скӕнынӕй дарддӕр хъуамӕ мацы кусат уыцы бонты.

¹⁷Алы аз дӕр кӕнут Донгонд дзулты бӕрӕгбон, уымӕн ӕмӕ уӕ, ӕфсадау, рӕнхъгай слӕууын кӕнгӕйӕ, Ӕз уыцы бон ракодтон Мысырӕй. Уыцы бон бӕрӕг кӕнут фӕлтӕрӕй-фӕлтӕрмӕ. Уый уын — мыггагмӕйы ӕгъдау.

¹⁸Фыццаг мӕйӕн йӕ цыппӕрдӕсӕм бон изӕрӕй йӕ дыууын фыццӕгӕм боны изӕрмӕ хъуамӕ ӕрмӕстдӕр донгонд дзултӕ хӕрат.

¹⁹Авд боны дӕргъы уӕ хӕдзӕртты ӕнхъизӕнӕн йӕ кой дӕр ма уӕд. Ӕнхъизӕнӕй конд дзул чи бахӕра, фӕнды ӕрцӕуӕггаг уӕд, фӕнды израилаг — Израилы адӕмӕй фӕхъӕудзӕн.

²⁰Кӕмфӕнды куы цӕрат, уӕддӕр уыцы бонты ӕнхъызт хыссӕйы хъӕстӕ ма фӕкӕнут уӕхи — хӕрут-иу донгонд дзултӕ».

²¹Моисей басидт Израилы адӕмы хистӕртӕм ӕмӕ сын загъта: «Алы бинонтӕ дӕр сӕ лыстӕг фосӕй равзарӕнт фыркъа кӕнӕ цӕукъа ӕмӕ акӕнут Куадзӕны кусӕрттӕ.

²²Стӕй-иу райсут иссопы баст, стулут ӕй, мигӕнӕны цы туг уа, уым ӕмӕ дзы бапырх кӕнут уӕлкъӕсӕр ӕмӕ дуары дыууӕ тарвазы. Райсоммӕ уӕ йӕ къӕсӕрӕй ӕддӕмӕ мачи рахизӕд.

²³Дунедарӕг Мысырыл Йӕ азар бафтауынмӕ куы рацӕуа ӕмӕ уын уӕ уӕлкъӕсӕртӕ ӕмӕ уӕ тӕрвӕзтыл туг куы фена, уӕд мӕлӕтхӕссӕг зӕды нӕ бауадздзӕн уӕ хӕдзӕрттӕм бацӕуын, цӕмӕй уӕ ма амара.

²⁴Ацы уагӕвӕрд мыггагмӕйы ӕгъдау уӕд сымахӕн дӕр ӕмӕ уӕ байзӕддагӕн дӕр.

²⁵Дунедарӕг уын зӕрдӕ цы зӕххӕй бавӕрдта, уырдӕм куы бацӕуат, уӕд-иу ӕй ӕххӕст кӕнут.

²⁶Уӕ цот уӕ куы фӕрсой, уый цы ӕгъдау у, зӕгъгӕ,

²⁷уӕд-иу сын зӕгъут: „Уый Дунедарӕгӕн у Куадзӕны нывонд. Дунедарӕг мысырӕгты куы цагъта, уӕд израилӕгты хӕдзӕрттӕн сӕ иувӕрсты рацыд ӕмӕ нын нӕ бинонты фыдбылызӕй бахызта“». Израилӕгтӕ Дунедарӕджы раз ӕрзоныг кодтой ӕмӕ Йӕм скуывтой.

²⁸Уый фӕстӕ ацыдысты ӕмӕ, Дунедарӕг Моисей ӕмӕ Ааронӕн куыддӕриддӕр бафӕдзӕхста, афтӕ бакодтой.

²⁹Дунедарӕг ӕмбисӕхсӕв ныццагъта Мысыры фыццаг цӕуӕт: цагъды фесты, паддзахы бадӕны чи бады, уыцы фараоны хистӕр фырт дӕр, ахӕстоны чи бады, уыцы уацайраджы хистӕр фырт дӕр, фосы фыццаг нӕл зӕйц дӕр.

³⁰Уыцы ӕхсӕв фараон, йӕ дӕлдӕртӕ ӕмӕ Мысыры адӕм иууылдӕр удаистӕй фестадысты сӕ хуыссӕнтӕй, зӕрдӕхалӕн хъарӕг ӕмӕ судзаджы ӕрдиагӕй байдзаг ис Мысыры бӕстӕ — алы хӕдзары дӕр уыди зиан.

³¹Раст уыцы ӕхсӕв фараон фӕсидти Моисей ӕмӕ Ааронмӕ ӕмӕ сын загъта: «Сыстут мӕ адӕмы ’хсӕнӕй, сымах дӕр ӕмӕ израилӕгтӕ дӕр, ӕмӕ, куыд дзырдтат, афтӕ цӕут ӕмӕ Дунедарӕгӕн бакувут.

³²Уӕ лыстӕг фос ӕмӕ стурты дӕр, куыд дзырдтат, афтӕ уӕ разӕй атӕрут ӕмӕ Дзы Йӕ хорзӕх мӕнӕн дӕр ракурут».

³³Мысырӕгтӕ израилӕгты тагъд кодтой; ӕвӕстиатӕй сӕ фӕндаг куыд дарой, ууыл архайдтой, науӕд иууылдӕр цагъды фӕуыдзыстӕм, зӕгъгӕ.

³⁴Цы гӕнӕн ма уыд израилӕгтӕн, хыссӕ нӕма сӕнхъызт, афтӕмӕй алчи йӕ хыссӕйы арынг йӕ уӕлӕфтауы атыхта ӕмӕ йӕ йе ’ккой акодта.

³⁵Моисей сын куыд фӕдзӕхста, Израилы адӕм афтӕ бакодтой — мысырӕгтӕй куырдтой ӕвзист ӕмӕ сыгъзӕрин фӕлындӕнтӕ, дарӕс.

³⁶Дунедарӕджы фӕндонӕй мысырӕгтӕ израилӕгтӕм хӕлар цӕстӕй ракастысты ӕмӕ сын, цы куырдтой, уый лӕвӕрдтой. Израилӕгтӕ Мысырӕй рацыдысты стыр ӕфтиагимӕ.

³⁷Рамсесӕй Суккотмӕ фистӕгӕй чи араст ис, уыдон, сабитӕ ӕмӕ сылгоймӕгты нӕ нымайгӕйӕ, уыдысты ӕхсӕзсӕдӕ мин лӕджы бӕрц.

³⁸Ӕндӕрбӕстӕгтӕй дӕр семӕ бирӕ уыд. Семӕ уыди тынг бирӕ фос — фыстӕ ӕмӕ сӕгътӕ, стуртӕ.

³⁹Мысырӕй цы хыссӕ рахастой, уымӕй афыхтой донгонд дзултӕ. Хыссӕйыл ӕнхъизӕн нӕ уыди, уымӕн ӕмӕ израилӕгты Мысырӕй сургӕ ракодтой, ӕмӕ сӕ фӕндагмӕ хӕринаг сцӕттӕ кӕныны бон нал фӕци.

⁴⁰Израилӕгтӕ Мысыры фӕцардысты цыппарсӕдӕ ӕртын азы.

⁴¹Цыппарсӕдӕ ӕртын азы куы рацыди, тӕккӕ уыцы бон Дунедарӕджы адӕм рӕнхъыстадӕй рацыдысты Мысыры зӕххӕй.

⁴²Дунедарӕг сӕ Мысырӕй цы ӕхсӕв ракодта, уыцы ӕхсӕв сӕм иудадзыг йӕ хъус дардта. Уӕдӕй фӕстӕмӕ израилӕгтӕ фӕлтӕрӕй-фӕлтӕрмӕ Дунедарӕджы кадӕн бӕрӕг кӕнынц уыцы ӕхсӕв.

⁴³Дунедарӕг Моисей ӕмӕ Ааронӕн загъта: «Мӕнӕ уын Куадзӕны ӕгъдау. Ӕндӕрбӕстӕгтӕн дзы аходын не ’мбӕлы.

⁴⁴Хӕрӕн дзы ис, ӕвзистӕй ӕлхӕд чи ӕрцӕуа ӕмӕ сунӕт кӕмӕн скӕнат, уыцы цагъарӕн.

⁴⁵Рӕстӕгмӕ дӕ хӕдзары чи цӕры, уыцы ӕххуырст дзы ма бахӕрӕд.

⁴⁶Дзидза хӕрын хъӕуы, кусарт кӕм акодтой, уым. Ӕддӕмӕ дзы мацы рахӕссут, йе стджытӕ дӕр ын ма асӕттут.

⁴⁷Куадзӕн хъуамӕ бӕрӕг кӕна ӕппӕт Израилы дзыллӕ.

⁴⁸Ӕрцӕуӕггаг чи у уе ’хсӕн, уый куы бафӕнда Дунедарӕджы Куадзӕн сбӕрӕг кӕнын, уӕд-иу ын йӕ хӕдзары нӕлгоймӕгтӕн се ’гасӕн дӕр сунӕт скӕнут. Уый фӕстӕ йӕ бон уыдзӕни Куадзӕн скӕнын, уымӕн ӕмӕ нымад ӕрцӕудзӕни бынӕттон цӕрӕгыл. Ӕнӕсунӕттӕй дзы мачи саходӕд.

⁴⁹Уыцы иу ӕгъдау уӕм уӕд израилагӕн дӕр ӕмӕ, уе ’хсӕн ӕрцӕуӕггаг чи у, уымӕн дӕр».

⁵⁰Ӕмӕ израилӕгтӕ бакодтой, Дунедарӕг Моисей ӕмӕ Ааронӕн куыддӕриддӕр бафӕдзӕхста, афтӕ.

⁵¹Тӕккӕ уыцы бон Дунедарӕг израилӕгты ӕфсад ракодта Мысыры зӕххӕй.