Read Библи: Сыгъдӕг Рацыд 27 Bible Online

Рацыд 27 - Библи: Сыгъдӕг bible

Рацыд 27

¹Акъацийӕ сараз нывондхӕссӕн: фондз ӕлмӕрины — дӕргъмӕ дӕр ӕмӕ уӕрхмӕ дӕр, йӕ бӕрзӕнд та — ӕртӕ ӕлмӕрины.

²Йӕ цыппар тигъыл ын скӕн фӕйнӕ сыкъайы, нывондхӕссӕнимӕ иу куыд уой, афтӕ, ӕмӕ йӕ иууылдӕр састӕр ӕрхуыйӕ.

³Сараз фӕныкхӕссӕн тастӕ, фыййӕгтӕ, тугӕмбырдгӕнӕн кӕхцытӕ, фыдистӕ ӕмӕ цӕхӕрисӕн кӕфойтӕ. Иууылдӕр сӕ скӕн ӕрхуыйӕ.

⁴Нывондхӕссӕнӕн ӕрхуыйӕ сараз хызӕг ӕмӕ йын йӕ цыппар къуымы бафидар кӕн фӕйнӕ ӕрхуы цӕджы.

⁵Нывондхӕссӕны мӕсчъы бын ӕй бафидар кӕн, нывондхӕссӕнӕн йӕ астӕумӕ куыд ӕххӕсса, афтӕ.

⁶Нывондхӕссӕнӕн акъацийӕ скӕн хъилтӕ ӕмӕ сӕ састӕр ӕрхуыйӕ.

⁷Нывондхӕссӕн йӕ бынатӕй куы хӕссат, уӕд-иу уыцы хъилтӕ, йӕ фӕйнӕфарс цы цӕгтӕ ис, уыдоны акӕндзыстут.

⁸Нывондхӕссӕн сараз фӕйнӕгӕй, мидӕгӕй афтид куыд уа, афтӕ. Саразын ӕй хъӕуы, хохыл дын куыддӕриддӕр равдыстӕуыд, афтӕ.

⁹Цатырӕн йӕ алыварс скӕнут кӕрт. Хуссарӕрдыгӕй йе ’мбонд-ӕмбӕрзӕн, здыхт гӕнӕй уафт, дӕргъмӕ — фондзыссӕдз ӕлмӕрины,

¹⁰ссӕдз цӕджындзыл ауыгъд, фӕйнӕ ӕрхуы бынӕнцайӕнимӕ. Цӕджындзтыл уӕд ӕвзист къӕпсыртӕ ӕмӕ ӕвзист тӕлытӕ.

¹¹Цӕгатӕрдыгӕй дӕр йе ’мбонд-ӕмбӕрзӕн — фондзыссӕдз ӕлмӕрины дӕргъӕн, ссӕдз цӕджындзыл ауыгъд, алы цӕджындз дӕр — ӕрхуы бынӕнцайӕныл. Цӕджындзтыл, кӕрӕдзимӕ сӕ бафидар кӕнынӕн, уӕд ӕвзист къӕпсыртӕ ӕмӕ ӕвзист тӕлытӕ.

¹²Ныгуылӕнӕрдыгӕй ӕмбонд-ӕмбӕрзӕн — кӕрты уӕрхӕн, дӕс ӕмӕ дыууиссӕдз ӕлмӕрины, дӕс цӕджындзыл ауыгъд, фӕйнӕ бынӕнцайӕнимӕ.

¹³Кӕрты уӕрх скӕсӕнӕрдыгӕй уӕд дӕс ӕмӕ дыууиссӕдз ӕлмӕрины.

¹⁴Кулдуары рахизфарс ӕмӕ галиуфарс ӕмбонд-ӕмбӕрзӕнтӕн сӕ дӕргъ уӕд фӕйнӕ фынддӕс ӕлмӕрины, сӕ дыууӕ дӕр уӕнт ӕртыгай цӕджындзтыл ауыгъд, фӕйнӕ бынӕнцайӕнимӕ.

¹⁶Кулдуарӕн бауаф нывӕфтыд дуарӕмбӕрзӕн, ссӕдз ӕлмӕрины дӕргъӕн. Хъуамӕ уа ӕрвхуыз, тар сырх ӕмӕ сӕнт сырх тӕбынӕй ӕмӕ здыхт гӕнӕй. Кулдуарӕн уӕд цыппар цӕджындзы, фӕйнӕ бынӕнцайӕнимӕ.

¹⁷Кӕрты цӕджындзтӕн се ’ппӕт къӕпсыртӕ ӕмӕ иугӕнӕн уистӕ дӕр уӕнт ӕвзистӕй, сӕ бынӕнцайӕнтӕ та ӕрхуыйӕ.

¹⁸Кӕртӕн йӕ дӕргъ — фондзыссӕдз ӕлмӕрины, йӕ уӕрх — дӕс ӕмӕ дыууиссӕдз ӕлмӕрины, здыхт гӕнӕй уафт ӕмбонд-ӕмбӕрзӕны бӕрзӕнд — фондз ӕлмӕрины. Цӕджындзтӕн — ӕрхуы бынӕнцайӕнтӕ.

¹⁹Цатыры ӕппӕт дзаумӕттӕ, цатыры ӕмӕ кӕртӕмбӕрзӕны михтӕ иууылдӕр хъуамӕ уой ӕрхуыйӕ.

²⁰Израилӕгтӕн бафӕдзӕхс, цӕмӕй-иу дӕм цырагъдарӕнӕн ӕрбахӕссой къухӕй лӕмӕрст сыгъдӕг оливӕйы сой — цырагъдарӕны цырӕгътӕ кӕддӕриддӕр куыд судзой.

²¹Аарон ӕмӕ йӕ фырттӕ сӕ цӕст дарӕнт, цӕмӕй цырагъдарӕны цырӕгътӕ изӕрӕй райсоммӕ судзой Дунедарӕджы раз — Фембӕлды Цатыры мидӕг, Фидыды Чырын цы мидӕмбӕрзӕны фӕстӕ ис, уый раз. Уый — мыггагмӕйы уагӕвӕрд израилӕгтӕн фӕлтӕрӕй-фӕлтӕрмӕ.