Read Библи: Сыгъдӕг Рацыд 35 Bible Online

Рацыд 35 - Библи: Сыгъдӕг bible

Рацыд 35

¹Моисей ӕрӕмбырд кодта Израилы ӕппӕт дзыллӕйы ӕмӕ сын загъта: «Дунедарӕг фӕдзӕхсы:

²Ӕхсӕз боны дӕргъы кусут, ӕвдӕм бон та уын уӕд уаз ӕнцойбон, сабат, Дунедарӕгӕн — уаз. Уыцы бон чидӕриддӕр бакуса, уый мард ӕрцӕудзӕн.

³Сабаты-иу арт дӕр ма скӕнут уӕ хӕдзӕртты».

⁴Моисей Израилы дзыллӕйӕн загъта: «Мӕнӕ цы фӕдзӕхсы Дунедарӕг:

⁵Дунедарӕгӕн ӕрӕмбырд кӕнут мысайнӕгтӕ. Алчидӕр уӕ, йӕ зӕрдӕ куыд зӕгъы, афтӕ Йын ӕрбахӕссӕд сыгъзӕрин, ӕвзист ӕмӕ ӕрхуы,

⁶ӕрвхуыз, тар сырх ӕмӕ сӕнт сырх тӕбын, лыстӕг гӕн ӕмӕ тинтычъи,

⁷сырхахуырст фысдзӕрмттӕ, гогырӕ сӕрак ӕмӕ акъаци хъӕдӕрмӕг,

⁸оливӕйы сой — цырагъӕн, хӕрздӕфгӕнӕнтӕ — сӕрдӕн сойӕн ӕмӕ буд судзынӕн,

⁹оникс дур ӕмӕ фӕлгӕты бавӕргӕ зынаргъ дуртӕ — ефод ӕмӕ риуылдарӕн фӕлындынӕн.

¹⁰Къухджын уӕ чи у, уыдон иууылдӕр ӕрбацӕуӕнт ӕмӕ скӕнӕнт, Дунедарӕг цыдӕриддӕр бафӕдзӕхста, уый:

¹¹Цатыр ӕмӕ йӕ сӕр йе ’ддаг ӕмбӕрзӕнимӕ, йӕ къӕпсыртӕ, йӕ фӕлгӕттӕ, йӕ хъилтӕ, йӕ цӕджындзтӕ ӕмӕ йӕ бынӕнцайӕнтӕ,

¹²Фидыды Чырын, йӕ хӕссӕн хъилтӕ ӕмӕ йӕ сӕр, стӕй мидӕмбӕрзӕн,

¹³фынг, йӕ хӕссӕн хъилтӕ ӕмӕ йе ’ппӕт дзауматӕ, стӕй, Мӕ разы ӕвӕрд цы дзултӕ хъуамӕ уой, уыдон,

¹⁴цырагъдарӕн ӕд дзауматӕ, ӕд цырӕгътӕ, цырӕгътӕн — сой,

¹⁵будсудзӕн нывондхӕссӕн ӕмӕ йӕ хӕссӕн хъилтӕ, сӕрдӕн сой ӕмӕ буд, Цатыры дуарӕмбӕрзӕн,

¹⁶иууылсудзинӕгты нывондхӕссӕн ӕд ӕрхуы хызӕг-фӕлгӕт, йӕ хӕссӕн хъилтӕ ӕмӕ йе ’ппӕт дзауматимӕ, хихсӕн аг йӕ суанцъыимӕ,

¹⁷кӕрты ӕмбонд-ӕмбӕрзӕнтӕ, сӕ цӕджындзтӕ ӕд бынӕнцайӕнтӕ, кӕрты дуарӕмбӕрзӕн,

¹⁸Цатыр ныффидар кӕнынӕн — михтӕ, кӕрты ӕмбонд-ӕмбӕрзӕн ныффидар кӕнынӕн — михтӕ ӕмӕ бӕндӕнтӕ.

¹⁹Уаз Цӕрӕны лӕггад кӕнынӕн дарӕстӕ — алчер Аарон ӕмӕ йӕ сауджын фырттӕн».

²⁰Израилы дзыллӕ Моисейы цурӕй рацыдысты.

²¹Уый фӕстӕ сӕ алчидӕр хаста зӕрдӕйы фӕндон мысайнаг Дунедарӕгӕн, Фембӕлды Цатыр саразынӕн ӕмӕ йӕ мидӕг алы уаз куыст кӕнынӕн, стӕй сауджынты уазлӕггады дарӕстӕн.

²²Ӕрбацыдысты-иу нӕлгоймӕгтӕ ӕмӕ сӕ устытӕ, семӕ-иу ӕрбахастой сӕ зӕрдиаг лӕвӕрттӕ — сыгъзӕрин фӕлындӕнтӕ: фындзцӕгтӕ, хъусцӕджытӕ, къухдарӕнтӕ, фӕрдгуытӕ. Уыцы сыгъзӕринтӕ хастой Дунедарӕгӕн.

²³Ноджы ма хастой ӕрвхуыз, тар сырх ӕмӕ сӕнт сырх тӕбын, лыстӕг гӕн ӕмӕ тинтычъи, сырхахуырст ӕлдыгъгонд фысдзӕрмттӕ ӕмӕ гогырӕ сӕрак — кӕмӕ цы уыд, уый.

²⁴Кӕмӕ уыд, уый-иу Дунедарӕгӕн мысайнаг ӕрбахаста ӕвзист кӕнӕ ӕрхуы. Акъаци хъӕдӕрмӕг кӕмӕ уыд, уый дӕр-иу ӕй ӕрбахаста.

²⁵Къухмимӕ чи арӕхст, уыцы сылгоймӕгтӕ иууылдӕр ӕлвыстой ӕмӕ хастой ӕрвхуыз, тар сырх ӕмӕ сӕнт сырх тӕбын, стӕй лыстӕг гӕн.

²⁶Иннӕ сылгоймӕгтӕ, ӕлвисын чи зыдта ӕмӕ кӕй фӕндыд, уыдон ӕлвыстой тинтычъи.

²⁷Мыггӕгты хистӕртӕ хастой оникс ӕмӕ ӕндӕр зынаргъ дуртӕ фӕлгӕты бавӕрынӕн — ефод ӕмӕ риуылдарӕнӕн,

²⁸стӕй хӕрздӕфгӕнӕнтӕ ӕмӕ оливӕйы сой — цырагъӕн, сӕрдынӕн ӕмӕ буд судзынӕн.

²⁹Афтӕ израилӕгтӕ иууылдӕр, нӕлгоймагӕй, сылгоймагӕй, зӕрдиагӕй кӕй фӕндыд, уыдон се ’ппӕт дӕр Дунедарӕгӕн хастой бархи лӕвӕрттӕ, Дунедарӕг Моисейӕн цы куыстытӕ бафӕдзӕхста, уыдон сӕххӕст кӕнынӕн.

³⁰Моисей израилӕгтӕн загъта: «Уый зонут, ӕмӕ Дунедарӕг равзӕрста Иудӕйы хӕдзарвӕндагӕй Бецалелы, Хуры фырт Урийы фырты,

³¹схайджын ӕй кодта Хуыцауы Удӕй — скодта йӕ куырыхон, радта йын зонд, зонындзинӕдтӕ ӕмӕ алы ӕвзыгъддзинад,

³²ӕмӕ уый дӕсны у сыгъзӕрин, ӕвзист ӕмӕ ӕрхуыйы куыст кӕнынмӕ,

³³зоны дуртӕ кӕрдын, фӕлгӕтты сӕ ӕвӕрын, арӕхсы хъӕды куыстмӕ, алы ӕрмгуыстмӕ дӕр дӕсны у.

³⁴Уымӕн ӕмӕ Даны хӕдзарвӕндагӕй Ахисамахы фырт Охолиавӕн Дунедарӕг радта иннӕты ахуыр кӕныны курдиат дӕр.

³⁵Дунедарӕг сын радта нывӕфтауӕджы курдиат, стӕй ӕрвхуыз, сӕнт сырх, игӕрхуыз тӕбын ӕмӕ гӕнӕй нывӕфтыд ӕмӕ хуымӕтӕг хъуымӕцтӕ уафыны курдиат — радта сын алы дӕсныйад ӕмӕ алы арӕхстдзинад.