Read Библи: Сыгъдӕг Рацыд 38 Bible Online

Рацыд 38 - Библи: Сыгъдӕг bible

Рацыд 38

¹Бецалел акъацийӕ сарӕзта иууылсудзинӕгты нывондхӕссӕн. Уыд раст цыппаркъуымон — фондз ӕлмӕрины дӕргъмӕ дӕр ӕмӕ уӕрхмӕ дӕр, йӕ бӕрзӕнд та — ӕртӕ ӕлмӕрины.

²Йӕ цыппар тигъыл ын скодта фӕйнӕ сыкъайы, нывондхӕссӕнимӕ иу куыд уыдаиккой, афтӕ ӕмӕ йӕ иууылдӕр састӕрдта ӕрхуыйӕ.

³Скодта нывондхӕссӕны ӕппӕт дзауматӕ: дурынтӕ, фыййӕгтӕ, кӕхцытӕ, фыдистӕ ӕмӕ цӕхӕрисӕн кӕфойтӕ. Иууылдӕр сӕ скодта ӕрхуыйӕ.

⁴Нывондхӕссӕнӕн ӕрхуыйӕ скодта хызӕг, бынӕй йыл ӕй бафидар кодта, нывондхӕссӕнӕн йӕ астӕумӕ куыд ӕххӕссыдаид, афтӕ.

⁵Скодта цыппар цӕджы ӕмӕ сӕ бафидар кодта ӕрхуы хызӕгӕн йӕ цыппар къуымыл — нывондхӕссӕны хъилтӕн.

⁶Хъилтӕ скодта акъацийӕ ӕмӕ сӕ састӕрдта ӕрхуыйӕ,

⁷батъыста сӕ нывондхӕссӕны фӕйнӕфарс цӕгты, цӕмӕй йӕ хӕссӕн уа. Нывондхӕссӕн скодта фӕйнӕгӕй, мидӕгӕй афтид куыд уыдаид, афтӕ.

⁸Уый фӕстӕ Бецалел ӕрхуыйӕ сарӕзта хихсӕн аг ӕмӕ йын скодта ӕрхуы суанцъы. Скодта сӕ, Фембӕлды Цатыры къӕсӕры раз чи лӕггад кодта, уыцы сылгоймӕгты ӕрхуы айдӕнтӕй.

⁹Бецалел скодта кӕрт. Йе ’мбонд-ӕмбӕрзӕн, здыхт гӕнӕй уафт, хуссарӕрдыгӕй дӕргъмӕ уыди фондзыссӕдз ӕлмӕрины,

¹⁰ссӕдз цӕджындзыл ауыгъд. Цӕджындзтӕн уыди ссӕдз ӕрхуы бынӕнцайӕны. Цӕджындзтыл уыди ӕвзист къӕпсыртӕ ӕмӕ ӕвзист тӕлытӕ.

¹¹Ӕмбонд-ӕмбӕрзӕн цӕгатӕрдыгӕй дӕр дӕргъмӕ уыди фондзыссӕдз ӕлмӕрины, ссӕдз цӕджындзыл ауыгъд, алы цӕджындзӕн дӕр — ӕрхуы бынӕнцайӕн. Цӕджындзтыл уыди ӕвзист къӕпсыртӕ ӕмӕ ӕвзист тӕлытӕ.

¹²Ныгуылӕнӕрдыгӕй ӕмбонд-ӕмбӕрзӕн уыди дӕс ӕмӕ дыууиссӕдз ӕлмӕрины, дӕс цӕджындзыл ауыгъд; цӕджындзтӕн — дӕс бынӕнцайӕны, цӕджындзтыл — ӕвзист къӕпсыртӕ ӕмӕ ӕвзист тӕлытӕ.

¹³Кӕрты скӕсӕнӕрдыгӕй фарсӕн йӕ дӕргъ уыди дӕс ӕмӕ дыууиссӕдз ӕлмӕрины.

¹⁴Кулдуары фӕйнӕфарс ӕмбонд-ӕмбӕрзӕнты дӕргъ — фӕйнӕ фынддӕс ӕлмӕрины, сӕ дыууӕ дӕр уыдысты ӕртыгай цӕджындзтыл ауыгъд, алы цӕджындзӕн дӕр — бынӕнцайӕн.

¹⁶Кӕрты ӕмбонд-ӕмбӕрзӕн иууылдӕр уыди здыхт гӕнӕй уафт,

¹⁷йӕ цӕджындзты бынӕнцайӕнтӕ та — ӕрхуыйӕ конд. Цӕджындзтыл — ӕвзист къӕпсыртӕ ӕмӕ ӕвзист тӕлытӕ, цӕджындзты цъуппытӕ — ӕвзистӕй астӕрд, цӕджындзтӕн се ’ппӕтӕн дӕр — ӕвзист тӕлытӕ.

¹⁸Кулдуары дуарӕмбӕрзӕн уыд алыхуызон ӕндӕхтӕй уафт — здыхт гӕн, стӕй ӕрвхуыз, игӕрхуыз ӕмӕ сӕнт сырх тӕбынӕй, уыди ссӕдз ӕлмӕрины дӕргъӕн. Йӕ бӕрзӕнд уыди фондз ӕлмӕрины, кӕрты ӕмбонд-ӕмбӕрзӕны хуызӕн.

¹⁹Кулдуарӕн уыди цыппар цӕджындзы, ӕрхуы бынӕнцайӕнтӕ сын. Цӕджындзтыл уыди ӕвзист къӕпсыртӕ, сӕ цъуппытӕ уыдысты ӕвзистӕй астӕрд, кӕрӕдзимӕ та баст цыдысты ӕвзист уистӕй.

²⁰Уаз Цӕрӕны ӕмӕ кӕрты ӕмбонд-ӕмбӕрзӕны михтӕ иууылдӕр уыдысты ӕрхуыйӕ конд.

²¹Мӕнӕ Фембӕлды Цатыр саразыны хӕрдзтӕ. Моисейы фӕдзӕхстмӕ гӕсгӕ сӕ бахыгътой левиттӕ, сауджын Аароны фырт Итамар сӕ сӕргъы, афтӕмӕй.

²²Цатыр саразыны ӕппӕт хъуыддӕгтӕ та кӕнгӕ бакодта, Дунедарӕг Моисейӕн куыд бафӕдзӕхста, афтӕ Бецалел, Хуры фырт Урийы фырт, Иудӕйы хӕдзарвӕндагӕй.

²³Йемӕ ӕмгуыст кодта Ахисамахы фырт Охолиав — Даны хӕдзарвӕндагӕй, нывӕфтауӕг, стӕй ӕрвхуыз, игӕрхуыз ӕмӕ сӕнт сырх тӕбынӕй ӕмӕ гӕнӕй нывӕфтыд хъуымӕцтӕ уафӕг ӕрмдӕсны.

²⁴Уаз Цӕрӕн йе ’ппӕт дзауматимӕ саразынӕн нывондаг сыгъзӕрин бахъуыди фараст ӕмӕ ссӕдз таланты ӕмӕ авдсӕдӕ ӕртын шекелы, кувӕндоны шекелтӕй нымайгӕйӕ.

²⁵Адӕмы сфыст саразыны тыххӕй цы ӕвзист ӕрӕмбырд, уымӕн йӕ бӕрц уыди сӕдӕ таланты ӕмӕ мин авдсӕдӕ ӕвдай фондз шекелы, кувӕндоны шекелтӕй нымайгӕйӕ.

²⁶Ӕхсӕзсӕдӕ ӕртӕ мин фондзсӕдӕ фӕндзай лӕгӕй, ссӕдзаздзыдтӕй уӕлӕмӕ йӕхи чи сфыста, уыдонӕй алкӕмӕй дӕр ист ӕрцыд ӕвзисты шекелы ӕмбис, кувӕндоны шекелтӕй нымайгӕйӕ.

²⁷Уаз Цӕрӕны цӕджындзты ӕмӕ йӕ мидӕмбӕрзӕны цӕджындзты бынӕнцайӕнтӕн бахъуыди ӕвзисты сӕдӕ таланты, сӕдӕ бынӕнцайӕнӕн — сӕдӕ таланты, иу бынӕнцайӕнӕн — иу талант.

²⁸Ӕвзисты мин авдсӕдӕ ӕвдай фондз шекелӕй та цӕджындзтӕн скодтой къӕпсыртӕ ӕмӕ уистӕ, стӕй састӕрдтой цӕджындзты цъуппытӕ.

²⁹Нывондаг ӕрхуыйы бӕрц уыди дӕс ӕмӕ ӕртиссӕдз таланты ӕмӕ дыууӕ мин цыппарсӕдӕ шекелы.

³⁰Уымӕй конд ӕрцыдысты Фембӕлды Цатырмӕ бацӕуӕны цӕджындзты бынӕнцайӕнтӕ, ӕрхуы нывондхӕссӕн йӕ хызӕг ӕмӕ йе ’ппӕт дзауматимӕ,

³¹кӕрты ӕппӕт цӕджындзты бынӕнцайӕнтӕ, кулдуары цӕджындзты бынӕнцайӕнтӕ, стӕй Цатыры ӕмӕ кӕрты ӕмбонд-ӕмбӕрзӕны ӕппӕт михтӕ.