Read Библи: Сыгъдӕг Рацыд 4 Bible Online

Рацыд 4 - Библи: Сыгъдӕг bible

Рацыд 4

¹Фӕлӕ Моисей загъта: «Куынӕ мыл баууӕндой ӕмӕ мӕм куынӕ байхъусой, уӕд та? Зӕгъдзысты, Дунедарӕг дӕм нӕ раргом ис, зӕгъгӕ».

²Дунедарӕг ӕй бафарста: «Уый та дӕ къухы цы ис?» Моисей дзуапп радта: «Лӕдзӕг».

³Дунедарӕг ын загъта: «Аппар ӕй зӕхмӕ». Моисей йӕ аппӕрста. Лӕдзӕг калм фестадис, ӕмӕ Моисей лидзынмӕ фӕци.

⁴«Йӕ къӕдзилӕй йӕ ацахс», — загъта Дунедарӕг. Моисей калмы къӕдзилмӕ февнӕлдта, ӕмӕ калм йӕ къухы лӕдзӕг фестад.

⁵Дунедарӕг загъта: «Уый уымӕн афтӕ у, цӕмӕй сӕ бауырна: Дунедарӕг, сӕ фыдӕлты Хуыцау — Авраамы Хуыцау, Исаакы Хуыцау, Йаковы Хуыцау — дӕумӕ ӕргом рацыд».

⁶Дунедарӕг ма ноджы загъта: «Дӕ къух дӕ роны акӕн». Моисей йӕ къух йӕ роны акодта. Фӕстӕмӕ йӕ куы райста, уӕд къух хъотырӕй митау урс фестад.

⁷«Ногӕй йӕ дӕ роны акӕн», — загъта та йын Дунедарӕг. Моисей ногӕй йӕ къух йӕ роны акодта. Куы йӕ райста, уӕд фӕстӕмӕ йӕ хуыз райста.

⁸Дунедарӕг загъта: «Фыццаг диссаг куы ницӕмӕ ӕрдарой ӕмӕ дыл куынӕ баууӕндой, уӕддӕр сӕ дыккаг диссаг баууӕндын кӕндзӕн.

⁹Уыцы дыууӕ диссаджы фӕстӕ дӕр куынӕ баууӕндой ӕмӕ дӕм куынӕ байхъусой, уӕд та-иу Нилы донӕй сис, зӕххыл ӕй акал, ӕмӕ уыцы дон сур зӕххыл туг фестдзӕн».

¹⁰Моисей Дунедарӕгӕн загъта: «О Бардарӕг! Ӕз дзурынмӕ дӕсны нӕ дӕн. Амӕй размӕ дӕр нӕ уыдтӕн ӕмӕ ныр дӕр, Ды мемӕ, Дӕ цагъаримӕ, куы ныхас кӕныс, уӕд дӕр. Къӕзӕнӕг дӕн, ме ’взаг мӕ дзыхы дзӕбӕх нӕ тасы».

¹¹Дунедарӕг ын загъта: «Адӕймагӕн ӕвзаг чи радта? Гоби кӕнӕ йӕ къуырма чи скӕны? Чи йӕ кӕны куырм кӕнӕ цӕстджын? Ӕз, Дунедарӕг!

¹²Цу уӕдӕ! Ӕз демӕ уыдзынӕн, куы дзурай, уӕд. Цы зӕгъын хъӕуы, уый дын Ӕз Мӕхӕдӕг бацамондзынӕн».

¹³«О Бардарӕг! — загъта Моисей. — Дӕ хорзӕхӕй, ӕндӕр искӕй арвит».

¹⁴Дунедарӕг смӕсты ис Моисеймӕ ӕмӕ йын загъта: «Аарон-левит де ’фсымӕр нӕу? Йӕ дзыхарӕхст ын Ӕз хорз зонын! Ныридӕгӕн дӕ размӕ рацӕуы. Куы дӕ фена, уӕд ныццин кӕндзӕн,

¹⁵ӕмӕ-иу ын зӕгъ, цы дзурын хъӕуы, уый. Ӕз Мӕхӕдӕг уемӕ уыдзынӕн, куы дзурат, уӕд. Ӕз уын Мӕхӕдӕг бацамондзынӕн, цы гӕнгӕ уын у, уый.

¹⁶Дӕ бӕсты Аарон дзурдзӕн адӕмимӕ ӕмӕ сӕм хӕццӕ кӕндзӕн дӕ ныхӕстӕ, ды та йын Хуыцауы хуызӕн уыдзынӕ.

¹⁷Айс демӕ ацы лӕдзӕг — уый ӕххуысӕй диссӕгтӕ сараздзынӕ».

¹⁸Моисей хӕдзармӕ куы бафтыди, уӕд йӕ каис Ифройӕн загъта: «Бар мын ратт, ӕмӕ Мысырмӕ аздӕхон, ме ’фсымӕртӕ ма ӕгас сты ӕви нӕ, уый бабӕрӕг кӕнон». Ифро йын загъта: «Цу фарнимӕ».

¹⁹Моисей ма Мидианы уыд, афтӕмӕй йын Дунедарӕг загъта: «Аздӕх Мысырмӕ. Марынмӕ дӕ чи хъавыд, уыдонӕй иу дӕр удӕгас нал у».

²⁰Моисей йӕ ус ӕмӕ йӕ фыртты хӕрӕгыл сӕвӕрдта, Хуыцауы лӕдзӕг йемӕ райста ӕмӕ араст ис Мысырмӕ.

²¹Дунедарӕг Моисейӕн загъта: «Мысырмӕ куы баздӕхай, уӕд-иу, хъусыс, диссӕгтӕ саразыны тыххӕй дын цы хъару радтон, уый фараоны раз равдис. Ӕз та йын йӕ зӕрдӕ ныддур кӕндзынӕн, ӕмӕ адӕмы нӕ рауадздзӕн.

²²Ӕмӕ-иу уӕд ды фараонӕн зӕгъ, афтӕ, дам, зӕгъы Дунедарӕг: „Израил Мӕ фырт у, Мӕ хистӕр зӕнӕг.

²³Ӕз дын загътон, рауадз Мын Мӕ фырты, ӕмӕ Мӕм бакува. Ды йӕ нӕ рауагътай, ӕмӕ дын Ӕз дӕ хистӕр фырты амардзынӕн“».

²⁴Фӕндагыл, ӕхсӕвиуат кӕм кодтой, уырдӕм Моисеймӕ фӕзынди Дунедарӕг ӕмӕ йӕ марынмӕ хъавыд.

²⁵Уӕд Циппора райста ӕхсон цыргъаг, йӕ лӕппуйӕн скодта сунӕт, сунӕты лыггагӕй байсӕрста Моисейы къӕхтӕ ӕмӕ загъта: «Туджы фӕрцы дӕ мӕ мойаг».

²⁶Уӕд Дунедарӕг ныууагъта Моисейы. (Йӕ лӕппуйӕн сунӕт кӕй скодта, уымӕ гӕсгӕ загъта Циппора Моисейӕн, туджы фӕрцы дӕ мӕ мойаг, зӕгъгӕ.)

²⁷Дунедарӕг Ааронӕн загъта: «Ӕдзӕрӕг быдырмӕ Моисейы размӕ ацу». Уый фӕраст ис, фембӕлд ыл Хуыцауы хохы рӕбын ӕмӕ йын аба кодта.

²⁸Моисей Ааронӕн радзырдта, Дунедарӕг ӕй цы ныхӕстимӕ рарвыста, цы диссӕгтӕ бакӕнын ын бафӕдзӕхста, уый.

²⁹Ацыдысты Моисей ӕмӕ Аарон ӕмӕ ӕрӕмбырд кодтой Израилы адӕмы хистӕрты.

³⁰Аарон сын рафӕзмыдта, Дунедарӕг Моисейӕн цыдӕриддӕр загъта, уыдӕттӕ. Моисей сын диссӕгтӕ равдыста,

³¹ӕмӕ баууӕндыдысты. Дунедарӕг сӕм кӕй ӕркаст ӕмӕ сын сӕ хъизӕмӕрттӕ кӕй федта, уый куы фехъуыстой, уӕд зӕххыл ныддӕлгом сты ӕмӕ Йын скад кодтой.