Read Библи: Сыгъдӕг Рацыд 7 Bible Online

Рацыд 7 - Библи: Сыгъдӕг bible

Рацыд 7

¹Фӕлӕ Дунедарӕг загъта Моисейӕн: «Ӕз афтӕ бакӕндзынӕн, ӕмӕ ды фараонӕн Хуыцау уыдзынӕ, де ’фсымӕр Аарон та дӕ пехуымпар уыдзӕни.

²Ды-иу Ааронӕн дзур, Ӕз дын цы фӕдзӕхсон, уый, Аарон та фараонӕн зӕгъдзӕн, цӕмӕй израилӕгты рауадза Мысырӕй.

³Ӕз фараоны зӕрдӕ афтӕ ныддур кӕндзынӕн, ӕмӕ, Мысыры зӕххыл цасфӕнды диссӕгтӕ ӕмӕ ӕвдисӕйнӕгтӕ куы равдисон,

⁴уӕддӕр уӕм фараон нӕ байхъусдзӕн. Ӕмӕ уӕд Ӕз Мысырыл Мӕ цонджы хъару бавзардзынӕн. Мӕ адӕмы, израилӕгты ӕфсад, уырдыгӕй ракӕндзынӕн фӕд-фӕдыл, Мысыры бӕстӕ та Мӕ азары хай бакӕндзынӕн.

⁵Израилӕгты куы ракӕнон ӕмӕ Мысырыл Мӕ къухы уӕз куы ӕруадзон, уӕд мысырӕгтӕ базондзысты, Дунедарӕг Чи у, уый».

⁶Моисей ӕмӕ Аарон, Дунедарӕг сын куыд бафӕдзӕхста, афтӕ бакодтой.

⁷Фараонимӕ куы ныхас кодтой, уӕд Моисейыл цыди цыппарыссӕдз азы, Аароныл та — ӕртӕ ӕмӕ цыппарыссӕдз.

⁸Дунедарӕг загъта Моисей ӕмӕ Ааронӕн:

⁹«Фараон уӕ, диссаг равдисут, зӕгъгӕ, куы дома, уӕд-иу Ааронӕн йӕ лӕдзӕг фараоны раз аппарын кӕн, ӕмӕ лӕдзӕг калм фестдзӕн».

¹⁰Моисей ӕмӕ Аарон бацыдысты фараонмӕ ӕмӕ, Дунедарӕг сын куыд загъта, афтӕ бакодтой. Аарон йӕ лӕдзӕг фараон ӕмӕ йӕ дӕлдӕрты раз аппӕрста, ӕмӕ лӕдзӕг калм фестад.

¹¹Уӕд фараон фӕсидти йӕ куырыхонтӕм ӕмӕ йӕ кӕлӕнгӕнджытӕм, ӕмӕ Мысыры дӕсныфӕрсджытӕ дӕр хин ӕмӕ кӕлӕны руаджы афтӕ бакодтой:

¹²алчи сӕ йӕ лӕдзӕг аппӕрста, ӕмӕ лӕдзджытӕ кӕлмытӕ фестадысты. Фӕлӕ Аароны лӕдзӕг иннӕ лӕдзджытӕ аныхъуырдта!

¹³Уӕддӕр фараон нӕ басаст ӕмӕ нӕ байхъуыста Моисей ӕмӕ Ааронмӕ, Дунедарӕг куыд дзырдта, афтӕ.

¹⁴Дунедарӕг Моисейӕн загъта: «Хивӕнд у фараон. Нӕ йӕ фӕнды Мӕ адӕмы рауадзын.

¹⁵Райсом сӕумӕйӕ доны былмӕ куы рацӕуа, уӕд ӕм бацу, йӕ разы Нилы былгӕрон ӕрлӕуу ӕмӕ, калм дын-иу цы лӕдзӕг фестад, уый дӕ къухы дар,

¹⁶афтӕмӕй ӕмӕ фараонӕн зӕгъ, уымӕ дӕ кӕй рарвыста Дунедарӕг, дзуттӕгты Хуыцау, цӕмӕй йын Йӕ фӕндон зӕгъай: „Мӕ адӕмы Мын рауадз, ӕмӕ Мӕм бакувой ӕдзӕрӕг быдыры. Нырмӕ ды коммӕ нӕ кастӕ,

¹⁷ӕмӕ дын афтӕ зӕгъы Дунедарӕг: Уӕдӕ ныртӕккӕ базондзынӕ, Дунедарӕг Чи у, уый. Мӕ къухы цы лӕдзӕг ис, уымӕй ӕз мӕнӕ Нилы дон ӕрцӕвдзынӕн, ӕмӕ туг фестдзӕни.

¹⁸Нилы кӕсӕгтӕ ныммӕлдзысты, ӕмӕ дон афтӕ сысмаг уыдзӕн, ӕмӕ мысырӕгтӕн нуазынӕн нал бӕздзӕни“».

¹⁹Дунедарӕг Моисейӕн бафӕдзӕхста: «Зӕгъ Ааронӕн, цӕмӕй йӕ лӕдзӕгӕй февзида Мысыры дӕттӕм — цӕугӕдӕттӕм, Нилы къабӕзтӕм, цадтӕм, донуӕттӕм, — ӕмӕ туг фестой. Мысыры зӕхх иууылдӕр туджы бын фӕуыдзӕн, туг уыдзӕни суанг хъӕдын ӕмӕ дурын мигӕнӕнты дӕр».

²⁰Моисей ӕмӕ Аарон, Дунедарӕг сын куыд бафӕдзӕхста, афтӕ бакодтой. Аарон систа йӕ лӕдзӕг ӕмӕ дзы фараон ӕмӕ йӕ дӕлдӕрты цӕстыты раз Нилы дон ӕрцавта. Дон туг фестади.

²¹Нилы кӕсӕгтӕ ныххӕдмӕл сты, ӕмӕ дон афтӕ сысмаг ис, ӕмӕ дзы мысырӕгтӕ нуазын нал фӕрӕзтой. Мысыры зӕхх иууылдӕр туджы бын фӕци.

²²Фӕлӕ Мысыры кӕлӕнгӕнджытӕн дӕр сӕ кӕлӕнты руаджы сӕ бон афтӕ бакӕнын баци, ӕмӕ та уӕд фараон ныддур кодта йӕ зӕрдӕ ӕмӕ нӕ байхъуыста Моисей ӕмӕ Ааронмӕ, Дунедарӕг куыд дзырдта, афтӕ.

²³Цы ’рцыд, уый ӕппындӕр ницӕмӕ ӕрдардта, афтӕмӕй аздӕхт йӕ галуанмӕ.

²⁴Мысырӕгтӕ цӕугӕдоны былгӕрӕтты цъайтӕ къахын байдыдтой, уымӕн ӕмӕ Нилы дон нуазынӕн нал бӕззыд.

²⁵Дунедарӕг Нилы дон туг куы фестын кодта, ууыл рацыд авд боны.