Read Библи: Сыгъдӕг Иов 18 Bible Online

Иов 18 - Библи: Сыгъдӕг bible

Иов 18

¹Дзуапп ын радта Билдад, шуахаг:

²«Цы пайда ис дзӕгъӕл ныхӕстӕй? Ахъуыды уал кӕнут, ӕмӕ стӕй дзурдзыстӕм.

³Фос куы не стӕм, мыййаг, къуымыхы цӕстӕй нӕм цӕмӕ хъуамӕ кӕсай?

⁴Ныр ды фыр мӕстӕй дӕхи хӕрыс, ӕмӕ дӕу тыххӕй зӕхх хъуамӕ сафтид уа, айнӕг йӕ бынатӕй феггуырса?

⁵Ӕнаккагыл йӕ бон баталынг уыдзӕн, йӕ арт ахуысдзӕн.

⁶Йӕ хӕдзарӕй рухсы цъыртт нал кӕлдзӕн, йӕ цырагъ бамынӕг уыдзӕн.

⁷Йӕ къӕхтыл ма тыхамӕлттӕй цӕудзӕн, йӕ фыдвӕндты азар йӕхиуыл ӕртыхсдзӕн.

⁸Йӕхи къахӕй къӕппӕгмӕ бацӕудзӕн ӕмӕ ахст ӕрцӕудзӕн.

⁹Къӕппӕг ӕй ӕрцахсдзӕни йӕ къахӕй, цъысымы бахаудзӕн.

¹⁰Разӕй йӕм фыдбылыз ӕнхъӕлмӕ кӕсы, йӕ фӕндагыл къӕппӕг цӕттӕйӕ лӕууы.

¹¹Йӕ алыварс ӕй алцы тасы ӕфтаудзӕн, фыр тӕссӕй йӕ сӕр йӕ кой суыдзӕн.

¹²Фыдбылыз ӕм гӕппӕввонгӕй лӕууы, кӕд фесӕфдзӕни, уый бӕрӕг нӕй.

¹³Йӕ буар уӕлхъӕдӕй ӕмбийы, мӕлӕты минӕвар ӕй бахордта.

¹⁴Йӕ хӕдзарӕй йӕ раласдзысты, Фыд азары паддзахы размӕ йӕ акӕндзысты.

¹⁵Арт ссудздзӕни йӕ дзӕгъӕл цатыры, йӕ хӕдзарыл судзгӕ сондон ныккӕлдзӕни.

¹⁶Бынӕй йӕ уидӕгтӕ бахус уыдзысты, уӕлейӕ йӕ къалиутӕ баруайдзысты.

¹⁷Зӕххыл йӕ кой дӕр нал уыдзӕн, уынгты йын йӕ ном дӕр ничиуал хъуыды кӕндзӕн.

¹⁸Рухсӕй йӕ талынгмӕ тӕрынц, цӕмӕй ацы зӕххыл мауал уа.

¹⁹Нӕдӕр ын цот ис, нӕдӕр цоты цот, адӕмы ’хсӕн йӕ хӕдзар дзӕгъӕлӕй баззайдзӕни.

²⁰Йӕ хъысмӕты коймӕ ныгуылӕны баризынц, скӕсӕны ныккӕрзынц.

²¹Ахӕм фидӕн ис фыдгӕнӕджы уӕзӕгӕн, Хуыцауы кӕм нӕ нымайынц, уыцы бынатӕн».