Read Библи: Сыгъдӕг Иов 19 Bible Online

Иов 19 - Библи: Сыгъдӕг bible

Иов 19

¹Ӕмӕ дзуапп радта Иов:

²«Кӕдмӕ мӕ удхарӕй мардзыстут, уӕ ныхӕстӕй мын мӕ зӕрдӕ кӕдмӕ къахдзыстут?

³Ныридӕгӕн мӕ иу-дӕс хатты уӕ уайдзӕфты бын фӕкодтат ӕмӕ уӕм худинаг дӕр нӕ кӕсы.

⁴Кӕд ӕцӕгӕйдӕр фӕрӕдыдтӕн, уӕд мӕ тӕригъӕд мӕхи фӕуӕд,

⁵фӕлӕ кӕд мӕ разы уӕхи уӕлдӕр кӕнут ӕмӕ мын мӕ худинаг мӕ цӕстмӕ дарут,

⁶уӕд зонут: Хуыцау мӕ афӕлдӕхта, Уый мӕ баппӕрста цъысымы.

⁷Фӕдисхъӕр бӕргӕ кӕнын, фӕлӕ дзуапп нӕй, бӕргӕ сидын ӕххуысмӕ, фӕлӕ мӕ сӕрыл ничи хӕцы.

⁸Хуыцау мын сӕхгӕдта мӕ фӕндаг, ӕмӕ мӕ бон акъахдзӕф кӕнын нӕу, саудалынг мын бафтыдта мӕ фӕндагыл.

⁹Мӕ кад мын байста, мӕ кады худ мын систа мӕ сӕрӕй.

¹⁰Алырдыгӕй дӕр мӕ ныззыгуым кодта, ӕмӕ сӕфын, мӕ ныфс мын бӕласау йӕ бындзарӕй срӕдывта.

¹¹Йӕ маст мӕм ссыгъди, ӕмӕ мӕ Йе знагыл банымадта.

¹²Йе ’фсӕдтӕ ӕмвӕтӕнӕгӕй сӕ ных сарӕзтой мӕнӕрдӕм, мӕ хӕдзарыл мын ӕрхъула кодтой.

¹³Фӕхицӕн мӕ кодта ме ’фсымӕртӕй, мӕ зонгӕтӕ мӕ сӕхи хизынц.

¹⁴Мӕ зӕрдӕмӕ хӕстӕг чи уыди, уыдон мӕ ныууагътой, чи мӕ зыдта, уыдонӕй ферох дӕн.

¹⁵Мӕ хӕдзары ӕрцӕуӕггаг ӕмӕ унӕутӕй чи ис, уыдонӕн ӕцӕгӕлон сдӕн.

¹⁶Ме ’ххуырстмӕ дзурын, фӕлӕ мын дзуапп нӕ дӕтты, цалынмӕ йын балӕгъстӕ кӕнын, уӕдмӕ.

¹⁷Мӕ комытӕфӕй мӕ бинойнаджы зӕрдӕ схӕццӕ вӕййы, ме ’фсымӕртӕ дӕр мыл ӕлгъ кӕнынц.

¹⁸Суанг ма мыл чысыл сабитӕ дӕр былысчъилтӕ кӕнынц, куыддӕр мӕ ауынынц, афтӕ мӕ мӕстӕй марын райдайынц.

¹⁹Ме ’рдхӕрдтӕ мыл ӕнӕввӕрсон систы, кӕй уарзтон, уыдон рацыдысты мӕ ныхмӕ.

²⁰Царм ӕмӕ мӕ стджытӕ йеддӕмӕ ницыуал баззад, мӕ уд ӕндахыл хӕцы.

²¹Батӕригъӕд мын кӕнут, мӕ хӕлӕрттӕ, — Хуыцауы азар мӕ баййӕфта!

²²Сымах дӕр Хуыцауы хуызӕн мӕ фӕдыл цы зилут? Мӕ уд хӕрынӕй бафсис куынӕуал зонут!

²³Тӕхуды, мӕ ныхӕстӕ мын чиныджы ныффысс,

²⁴ӕфсӕн цыргъагӕй сӕ здыйыл скъах, дурыл сӕ сныв кӕн ӕнустӕм!

²⁵Ӕз зонын: цардӕгас у мӕ Ирвӕзынгӕнӕг. Фӕстагмӕ Уый сыджыты сӕрмӕ ’рлӕудзӕн,

²⁶ӕмӕ, мӕ буар куы азгъӕла, уӕд дӕр ӕз фендзынӕн Хуыцауы.

²⁷Ӕз Ӕй фендзынӕн мӕхи цӕстӕй, ӕндӕр исчи нӕ, фӕлӕ мӕхӕдӕг, мӕ зӕрдӕ мӕ риуы куы ныллӕууа, уӕд дӕр!

²⁸Сымах та мӕ фӕдыл зилут ӕмӕ мын мӕ хъизӕмӕрттӕ мӕхи аххос фӕкӕнынмӕ хъавут, —

²⁹уӕдӕ тӕрсут кардӕй: ӕнӕхъуаджы ӕфхӕрӕгмӕ карды ком кӕсы, цӕмӕй зонат: ис уӕлдӕр Тӕрхон».