Read Библи: Сыгъдӕг Иов 20 Bible Online

Иов 20 - Библи: Сыгъдӕг bible

Иов 20

¹Ӕмӕ йын дзуапп радта Цофар, наамайаг:

²«Сагъӕссаг фӕдӕн, ӕмӕ мӕ бон ӕмырӕй лӕууын нал у.

³Ӕфхӕрӕн уайдзӕфтӕ хъусын ӕз, мӕ сӕрызонд мӕм дзуапп раттынмӕ сиды.

⁴Ау, ӕнӕзонгӕ дын у, рагӕй-ӕрӕгмӕ, адӕймаг зӕххыл кӕдӕй цӕры, уӕдӕй нырмӕ,

⁵ӕнаккаджы цин бирӕ кӕй нӕ хӕссы, ӕнӕхуыцауы ферад рӕстӕгмӕ кӕй у, уый?

⁶Йӕ кад уӕларвмӕ дӕр сӕххӕссӕд, йӕ сӕр арвыл ныдзӕвӕд,

⁷уӕддӕр йӕ фаджысау йӕхӕдӕг дӕр ӕрбайсӕфдзӕн, чи йӕ федта, уыдон зӕгъдзысты: „Цы фӕци?“

⁸Ӕрбайсӕфдзӕни фынау, ӕрбацыдӕр уыдзӕн ӕхсӕвы цӕстылуайӕнау.

⁹Чи йӕ федта, уый йӕ никуыуал фендзӕн, цы ран уыди, уым никуыуал фӕзындзӕн.

¹⁰Йӕ цот мӕгуыргурты раз козбау митӕ кӕндзысты, хӕлӕттаг ын фӕкӕндзысты йӕ мулк.

¹¹Се стджыты цы ’взонджы бонты хъару ис, уыимӕ сыджыты ӕрхуысдзысты йӕ фарсмӕ.

¹²Кӕд ын фыддзинад афтӕ адджын у, ӕмӕ йӕ йе ’взаджы бын дары,

¹³йӕ комыкъулты ’хсӕн ӕй хъахъхъӕны,

¹⁴уӕд уыцы хойраг йӕ гуыбыны калмы марг фестдзӕн.

¹⁵Цы мулк аныхъуырдта, уый фӕстӕмӕ сомдзӕн, — Хуыцау ын ӕй йӕ фарсӕй фӕкӕндзӕн.

¹⁶Калмы марг цъиры, ӕмӕ калмы ’взагӕй йӕ мӕлӕт ссардзӕн.

¹⁷Ӕхсыры цадтӕ уый нӕ фендзӕн, йӕ цард мыдыкъусау нӕ уыдзӕн.

¹⁸Йӕ фӕллӕйттӕ хиды бынты ацӕудзысты, йе ’фтиӕгтыл цин нӕ кӕндзӕн.

¹⁹Уымӕн ӕмӕ мӕгуыртыл йӕ тых ӕвзӕрста, былысчъилтӕ сыл кодта; цы хӕдзӕрттӕ нӕ сарӕзта, уыдон-иу йӕхи бакодта.

²⁰Уымӕн ӕмӕ ницӕмӕй ӕфсӕсти, алцӕуыл дӕр хӕлоф кодта,

²¹цы нӕ аныхъуырдта, ахӕмӕй йын ницыуал баззад, ӕмӕ йӕ цардамонд уымӕн у тӕссонд.

²²Цардӕй къӕртт ӕппардзӕн, афтӕмӕй йыл сау бон акӕндзӕн.

²³Бухъхъ цардӕй цӕрдзӕн, афтӕ йӕ Хуыцауы азар баййафдзӕн, ихуарӕгау ыл ныккӕлдзӕн.

²⁴Ӕфсӕн цыргъагӕй куы аирвӕза — ӕрхуы фат ӕй баййафдзӕн.

²⁵Йӕ буары ахиздзӕн, йӕ маст ын ныппырх кӕндзӕн, мӕрдудхӕрттӕ йыл бафтаудзӕн.

²⁶Саудалынджы ахӕсты фӕуыдзӕн, йӕ фӕстаг муртӕ ӕнӕхуысгӕ арты сау ӕвзалы фестдзысты.

²⁷Арв ын йӕ тӕригъӕдтӕ раргом кӕндзӕн, зӕхх йӕ ныхмӕ рацӕудзӕн.

²⁸Йӕ хӕдзары мур дӕр ницыуал баззайдзӕн, Хуыцауы азары бон йӕ мулк байсысдзӕн донау.

²⁹Ӕнаккагӕн ахӕм хъысмӕт сныв кодта Хуыцау, уый йын — Хуыцауы тӕрхон».