Read Библи: Сыгъдӕг Иов 21 Bible Online

Иов 21 - Библи: Сыгъдӕг bible

Иов 21

¹Ӕмӕ дзуапп радта Иов:

²«Уӕдӕ мын мӕ ныхасмӕ ӕрбайхъусут лӕмбынӕг, мӕ зӕрдӕ мын уымӕй уӕддӕр фӕфидар кӕнут.

³Бабыхсут, цалынмӕ дзурон, уӕдмӕ, дзырд куы фӕуон, уӕд-иу мыл худут.

⁴Ау, адӕймагмӕ у мӕ хъаст? Ӕви мӕсты кӕнын ӕнӕ исты ’фсонӕй?

⁵Ӕрбакӕсут-ма мӕм — фӕтӕрсӕн мӕ нӕй? Уӕ армытъӕпӕнтӕй ныххӕцут уӕ дзыхтыл?

⁶Куы ахъуыды кӕнын, уӕд мӕхиуыл дӕр стыр тас бахӕцы, ӕмӕ ӕмризӕджы нырризын.

⁷Ӕнаккӕгтӕ зӕронды бонтӕм цӕмӕн цӕрынц, ӕмӕ сӕ хъару цӕуылнӕ сӕфы?

⁸Сӕ цот — сӕ алыварс, сӕ цоты цоты дӕр — сӕ разы.

⁹Сӕ хӕдзӕрттӕн ницӕмӕй у тас, Хуыцау сӕм Йӕ лӕдзӕгӕй не ’взиды.

¹⁰Сӕ богътӕ бауадзынц гуырдз, сӕ хъуццытӕн тас нӕу фефтауынӕй.

¹¹Сӕ цот хъылдым кӕнынц уӕрыччытау, ӕнӕмӕтӕй хъазынц сӕхицӕн,

¹²далатӕ ӕмӕ хъисфӕндыртимӕ зарынц, сӕхи хъӕлдзӕг дарынц уадындзтӕй.

¹³Амондджынӕй ӕрвитынц сӕ цард, ӕнӕ удхарӕй ацӕуынц мӕрдтыбӕстӕм.

¹⁴Афтӕмӕй Хуыцауӕн та фӕзӕгъынц: „Ныууадз нӕ, нӕ фӕнды мах Дӕ фӕндӕгтыл цӕуын!

¹⁵Чи у Ӕппӕтхъомыс, цӕмӕй Йын лӕггад кӕнӕм, цы пайда нын ис Уымӕ кувынӕй?“

¹⁶Уӕддӕр сӕ къухы ис сӕ исбон, фӕлӕ ме ’нӕуынон фӕуӕнт ӕнаккӕгты фӕндтӕ!

¹⁷Ӕнаккӕгты зынг арӕх ахуыссы, бӕллӕхы арӕх бахауынц? Хуыцауы фыдӕх сӕ арӕх баййафы?

¹⁸Хъуамӕ уыдон, дымгӕ кӕй систа, уыцы хъӕмпыхалы, зилгӕ дымгӕ кӕй ахаста, уыцы цъӕмӕлты ’нгӕс уаиккой.

¹⁹Сӕ байзӕддагыл сын рахӕтдзӕн Хуыцау? Сӕхицӕн сын аккаг фӕуӕд, цӕмӕй зоной,

²⁰цӕмӕй сӕхи цӕстӕй феной се сӕфт, Ӕппӕтхъомысы азар сӕхӕдӕг куыд бавзарой.

²¹Куы амӕлой, уӕд та ма сын цы уӕлдай уыдзӕн, сӕ фӕстӕ сӕ бинонтӕ цы бауыдзысты, уый?

²²Фӕлӕ Хуыцауӕн зонд чи амоны, Уый уӕларвонтӕн дӕр куы нӕ бары, уӕд?

²³Иутӕ, сӕ хъару йӕ тӕккӕ тӕмӕны бацӕуы, афтӕмӕй ӕрбамӕлынц, сабыр ӕмӕ ӕдасӕй.

²⁴Сӕ буӕрттӕ — хъӕддых, се стӕг — фидар.

²⁵Иннӕтӕ та амӕлынц зӕрдӕрыстӕй, цардӕй ницы фенынц, афтӕмӕй.

²⁶Дыууӕйӕ дӕр сыджытмӕ цӕуынц, сӕ дыууӕ дӕр ӕмхуызон скӕлм уыдзысты.

²⁷Зонын уын уӕ хъуыдытӕ, мӕ ныхмӕ цы зӕгъинаг стут, уый дӕр.

²⁸Сымах зӕгъдзыстут: „Цы фесты уӕздӕтты хӕдзӕрттӕ, ӕнӕхуыцӕутты цатыртӕ цы баисты?“

²⁹Фӕлӕ-ма уӕдӕ бӕлццӕтты бафӕрсут, сӕ ныхӕстыл-ма сын ахъуыды кӕнут:

³⁰бӕллӕхы бон фыдгӕнӕг ӕнӕхъыгдардӕй баззайы, Азары бон ацӕуы йӕ иувӕрсты.

³¹Ӕргомӕй йын рӕстдзинад чи зӕгъдзӕн, йӕ хъуыддӕгты тыххӕй дзы дзуапп чи ӕрдомдзӕн?

³²Чырыны сӕр ыл куы ’рӕхгӕной, уӕд ын йӕ ингӕны раз хъалагъур сӕвӕрдзысты,

³³ӕхцон ын уыдзӕн дӕлвӕзы сыджыт, йӕ мӕрддзыгойӕн нымӕц нӕ уыдзӕн.

³⁴Уӕдӕ мын сымах уӕ тутт ныхӕстӕй мӕ зӕрдӕ куыд фӕфидар кӕндзыстут? Уӕ ныхӕсты — ӕрмӕст мӕнгдзинад!»