Read Библи: Сыгъдӕг Иов 30 Bible Online

Иов 30 - Библи: Сыгъдӕг bible

Иов 30

¹Ныр та мыл мӕхицӕй кӕстӕртӕ худынц, мӕ фыййау куыйтӕм дӕр хӕстӕг кӕй нӕ бауагътаин, уыдон:

²сӕ къухты хъару мӕ кӕм хъӕуы, стӕй ма сӕм цӕй хъару ис?

³Ӕххормаг ӕмӕ гӕвзыккӕй басасти сӕ хъару, афтӕмӕй хъеллау кодтой гӕныстон быдырты, тары.

⁴Маст кӕрдӕджытӕ ӕууылдтой, ӕхсӕлыйы уидаг — сӕ хойраг.

⁵Адӕм сӕ ӕввахс нӕ уагътой сӕхимӕ, сӕ фӕдыл-иу хъӕр кодтой, цыма къӕрныхтӕ уыдысты, уыйау.

⁶Ахӕмтӕ хуыскъ адӕгты скӕнынц бынат, къӕдзӕхы ’хсӕнты, зӕххы скъуыдты ӕрцӕрынц.

⁷Къутӕртӕй сӕ ниуын цӕуы, хӕмпӕлгӕрдӕджы бын батымбылтӕ вӕййынц.

⁸Хъодыгонд адӕм, ном кӕмӕн нӕй, уыцы фидиссӕгтӕ, алы ранӕй дӕр — тард!

⁹Ӕмӕ ма суанг уыдонӕн дӕр ӕз фӕндырты цӕгъдинаг фӕдӕн.

¹⁰Былысчъилӕй мӕ сӕхи иуварс ласынц, ӕнӕфсӕрмӕй мыл ту кӕнынц.

¹¹Ӕдых, ӕнӕбон мӕ скодта Хуыцау, ӕмӕ сӕ бӕттӕнтӕ райхӕлдтой.

¹²Рахизӕрдыгӕй мыл сӕхи ныццӕвынц, ӕмӕ куы ахауын, уӕд сӕхи марынмӕ ӕрцӕттӕ кӕнынц.

¹³Мӕ фӕндӕгтӕ мын сӕхгӕдтой, фыдбылыз мын цӕттӕ кӕнынц, ӕмӕ сӕ бауромӕг нӕй.

¹⁴Цыма искуыцӕй раирвӕзтысты, уыйау мыл ӕваст сӕхи ныццавтой.

¹⁵Дудгӕбон акодта мӕ сӕрыл, мӕ кад мын дымгӕмӕ ныддардӕуыд, мӕ цардамонд ӕврагъау атади.

¹⁶Хъизӕмарӕй мӕлын, саубон мыл акодта.

¹⁷Ме стджыты рыстӕй ӕхсӕвыгон ӕнцой нал зонын.

¹⁸Мӕ дарӕс мын скъуынынц мӕ уӕлӕ, ме ’фцӕгготмӕ мын лӕбурынц.

¹⁹Цъыфы мӕ ныппӕрста Уый, ӕмӕ рыг фестадтӕн, бартхутӕг дӕн.

²⁰О Хуыцау, дзыназын Дӕм, фӕлӕ мын дзуапп нӕ дӕттыс, Дӕ разы лӕууын, фӕлӕ мӕм Ды кӕсгӕ дӕр нӕ кӕныс.

²¹Ӕгъатыр сдӕ мемӕ, Дӕ хъомысджын къух мӕ не здахыс.

²²Дӕ уӕлныхты мӕ фелвӕстай, дымгӕмӕ мӕ ныддардтай, мӕ бындзарӕй мӕ ныууыгътай.

²³Зонын ӕй, маргӕ мӕ кӕныс, удӕгӕстӕ иууылдӕр кӕдӕм бацӕуынц, уырдӕм у мӕ фӕндаг.

²⁴Ӕнӕуи дӕр, мӕлӕты къахыл чи лӕууы ӕмӕ фӕдисхъӕр чи кӕны, уымӕ ма йӕ къух чи сисы?

²⁵Ау, зын раны чи бахауди, уыдоныл нӕ хъыг кодтон? Ау, мӕ зӕрдӕ нӕ рысти мӕгуыры тӕригъӕдӕй?

²⁶Хорзмӕ куы ’нхъӕлмӕ кастӕн, уӕд мӕ сӕр фыдбылыз баййӕфта, рухсмӕ куы ’нхъӕлмӕ кастӕн, уӕд мыл бон баталынг ис.

²⁷Мӕ хуылф мӕстӕй судзы ӕдзухдӕр, сау бонтӕ мӕ уӕгъд нӕ уадзынц.

²⁸Сӕудары хъеллау кӕнын, адӕммӕ ӕххуысмӕ сидын.

²⁹Хъӕддаг куыйтӕн ӕфсымӕр сдӕн, страустӕн — хӕлар.

³⁰Мӕ царм ныссау ис, алӕбырди мӕ уӕлӕ, ме стджытӕ мӕ буары тӕвдӕй судзынц.

³¹Мӕ хъисфӕндыр хъарӕг кӕны, мӕ уадындз дзыназы, кӕуӕгау.