Read Библи: Сыгъдӕг Иов 36 Bible Online

Иов 36 - Библи: Сыгъдӕг bible

Иов 36

¹Ӕмӕ Елигу дзырдта дарддӕр:

²«Чысыл-ма мын бабыхс, ӕмӕ дын зӕгъон Хуыцауы тыххӕй ноджы мӕ зӕгъинаг.

³Дардӕй райдайдзынӕн мӕ ныхас, цӕмӕй ме Скӕнӕджы рӕстдзинад равдисон.

⁴Дызӕрдыг ма кӕн — ницы мӕнг зӕгъдзынӕн, мӕнӕйуый цы дзуры, уый бӕлвырд зоны.

⁵Хуыцау хъомысджын у ӕмӕ Йӕхи нӕ атигъ кӕндзӕн, фидар зӕрдӕ кӕмӕн ис, ууыл.

⁶Фыдгӕнӕджы нӕ ныууадздзӕн ӕгасӕй, ӕфхӕрдӕн та раст тӕрхон скӕндзӕн.

⁷Рӕстудӕй нӕ аздахдзӕн Йе ’ргом, паддзӕхтимӕ йӕ ӕмсӕр скӕндзӕн, мыггагмӕ йӕ сбӕрзонд кӕндзӕн.

⁸Хъадамантӕ куы бакӕной адӕймагыл, бӕллӕхтӕ йыл куы ӕртыхсой,

⁹уӕд ын уымӕй та амоны йӕ тӕригъӕдтӕм, сӕрыстыр кӕй у, уымӕ,

¹⁰ӕмӕ йын Уый йӕ хъустӕ хъусынӕн кӕй гом кӕны ӕмӕ йӕ раст фӕндагыл кӕй аразы.

¹¹Кӕд Йӕ коммӕ бакӕсой ӕмӕ Йын лӕггад кӕной, уӕд арфӕйаг уыдзӕни сӕ кӕрон, райгӕ арвитдзысты сӕ царды бонтӕ.

¹²Кӕд ӕмӕ Йӕ коммӕ нӕ бакӕсой, уӕд та искӕй къухӕй амӕлдзысты, се ’нӕзонды аххосӕй бабын уыдзысты.

¹³Ӕнӕхуыцӕутты зӕрдӕтӕ мастӕй йедзаг сты, хъадамантӕ сыл куы бакӕной, уӕд дӕр Хуыцаумӕ ӕххуысагур нӕ дзыназдзысты.

¹⁴Ӕвзонгӕй амӕлынц кувӕндоны хъахбайтау.

¹⁵Фӕлӕ мӕгуыр лӕджы Уый фервӕзын кӕны фыдбылызӕй, йӕ бафхӕрды фӕрцы йын байгом кӕны йӕ хъустӕ.

¹⁶Дӕу дӕр уынгӕг ранӕй бӕргӕ ракӕнид, де уӕнгтӕ парахатӕй куыд айтынг кӕнай; дзаг фынгыл дӕ ӕрбадын кӕнид.

¹⁷Фӕлӕ дӕумӕ ӕнӕхуыцӕутты зондахаст ис: хъуыды кӕныс тӕрхон ӕмӕ тӕрхоныскъуыдыл.

¹⁸Дӕхи хъахъхъӕн, Йӕ азар дӕ куы баййафа, уымӕй, уӕд дӕ иу ахӕстаргъ дӕр нӕ фервӕзын кӕндзӕн.

¹⁹Хъӕздыгдзинады фӕрцы фыдбылызӕй фервӕздзынӕ? Де ’ппӕт хъарутӕ куы бахардз кӕнай, уӕд дӕр фыдбылызӕй нӕ фервӕздзынӕ.

²⁰Адӕмтӕн се сӕфт куы ралӕудзӕн, уыцы фыдӕхсӕвмӕ ма бӕлл!

²¹Тӕригъӕдӕй дӕхи хиз — фыдӕвзарӕнты дзӕгъӕлы нӕ бахаудтӕ.

²²Хуыцауы хъомыс ӕгӕрон у. Уый хуызӕн зондамонӕг кӕм и?

²³Уымӕн фӕндаг чи бацамондзӕн? Чи Йын зӕгъдзӕн: „Раст нӕ кӕныс?“

²⁴Ма Йын рох кӕн Йӕ хъуыддӕгтӕ стауын, адӕм кады зарджытӕ кӕуыл скодтой, уыдон.

²⁵Алчидӕр сӕ уыны, адӕммӕ дардмӕ дӕр зынынц.

²⁶Стыр Хуыцауы махӕн нӕ бон базонын нӕу, Йӕ азты нымӕцӕн банымайӕн нӕй.

²⁷Уый ӕрӕмбырд кӕны доны ’ртӕхтӕ, ӕмӕ сӕ къӕвдайы ’ртӕхтӕ фестын кӕны.

²⁸Ӕврӕгътӕй ӕркӕлынц, сахайӕ адӕмы ныххуылыдз кӕнынц.

²⁹Чи бамбардзӕн, мигътӕ куыд тӕхынц, уый, ӕрвнӕрды гыбар-гыбур — Йӕ цатыры?

³⁰Мӕнӕ ныррухс кодта мигътӕ, денджызы бын балӕууыдысты Йӕ фӕттӕ.

³¹Афтӕ тӕрхон кӕны адӕмтӕн ӕмӕ сын парахатӕй хойраг ратты.

³²Уый Йӕ армы арвӕрттывд дары, кӕдӕм цӕвын хъӕуы, уый йын амоны.

³³Арвы гыбар-гыбур дзуры Йе ’рбацыдыл, фыддзинадмӕ Йӕ маст кӕй рафыхти, ууыл.