Read Библи: Сыгъдӕг Иов 7 Bible Online

Иов 7 - Библи: Сыгъдӕг bible

Иов 7

¹Адӕймагӕн нывгонд у цагъары уӕззау куыст цӕрӕнбонты.

²Цагъарау тыхсы ӕмӕ бӕллы аууонмӕ, ӕххуырст кусӕгау йӕ цӕстытӕ ныуурс вӕййынц йӕ куысты мыздмӕ.

³Афтӕ мӕ хай сты мӕнӕн дӕр ӕнӕуд мӕйтӕ, мӕ хъысмӕт — уӕззау ӕхсӕвтӕ.

⁴Куыддӕр ӕрхуыссын, афтӕ сыстынмӕ ӕнхъӕлмӕ кӕсын райдайын, фӕлӕ ӕхсӕв ныддаргъ вӕййы, ӕмӕ боныцъӕхтӕм мӕ рафт-бафтӕй не ’рӕнцайын.

⁵Мӕ буар скӕлм ис, хӕлмӕгтӕй нал зыны, аскъуыдтӕ ис, ӕмӕ йӕ цъӕй мизы.

⁶Тынуафӕджы цъӕгъӕдзау стырындз сты мӕ бонтӕ, ӕмӕ сӕм кӕсын ныфссастӕй.

⁷О ме Скӕнӕг, мӕ цард — дымгӕйы иу ӕрбафуттау, хорзӕй ницыуал фендзынӕн.

⁸Ныр мӕ чи уыны, уый мӕ нал фендзӕни. Кӕс — ӕмӕ нал дӕн.

⁹Мигъы стыг тайын куыд райдайы ӕмӕ куыд ӕрбайсӕфы, афтӕ мӕрдтыбӕстӕм ныххизӕг дӕр уӕлӕмӕ нал сыздӕхы.

¹⁰Йӕ хӕдзармӕ нал раздӕхдзӕн, йӕ райгуырӕн уӕзӕг ӕй нал фендзӕни.

¹¹Уымӕ гӕсгӕ ӕз мӕ дзыхыл нӕ ныххӕцдзынӕн — мӕ уды хъизӕмӕрттӕ фӕдзурдзынӕн, мӕ уды риссӕгтӕ скалдзынӕн.

¹²Денджыз дӕн ӕви фурды залым дӕн, мыййаг, хъахъхъӕнджытӕ мын цы сӕвӕрдтай?

¹³Мӕхицӕн бӕргӕ фӕзӕгъын, мӕ хуыссӕнуат мын мӕ хъизӕмар айсдзӕн, хуыссӕг мын мӕ зӕрдӕ фӕфидар кӕндзӕн.

¹⁴Фӕлӕ мӕ фыдфынты хай фӕкӕныс, ӕбуалгъ нывтӕ мын мӕ цӕстытыл бафтауыс.

¹⁵Бӕргӕ, куынӕуал сулӕфин фӕлтау, куы амӕлин ӕмӕ ацы буарӕй куы фервӕзин.

¹⁶Сӕнад мын ис цард, фӕлӕ йын кӕрон уыдзӕн. Ныууадз мӕ! — дымгӕйы иу ӕрбафуттау — мӕ бонтӕ!

¹⁷Уый аккаг у адӕймаг, ӕмӕ йӕ Ды афтӕ скадджын кӕнай ӕмӕ дзы Дӕ цӕст ма исай?

¹⁸Ӕрвылрайсом ӕм фӕзыныс, алы уысм дӕр ӕй фӕлварыс.

¹⁹Иу ран мӕ кӕд ныууадздзынӕ, иу уысм мӕ кӕд феуӕгъд кӕндзынӕ, — мӕ сӕт уӕд та нынныхъуырон?

²⁰Тӕригъӕды кӕд бацыдтӕн, уӕд дӕр Дӕуӕн цы ракодтон, о адӕмы Цӕстдарӕг? Цӕмӕн мӕ сӕвӕрдтай мысанӕн, мӕхицӕй дӕр куы стыхстӕн, уӕд?

²¹Цӕуылнӕ мын ныббарыс мӕ азым, цӕуылнӕ мын ныххатыр кӕныс мӕ тӕригъӕд? Ӕз рӕхджы фӕдӕлсыджыт уыдзынӕн, агурдзынӕ ма мӕ, фӕлӕ — ницы!»