Read Библи: Сыгъдӕг Псаломтӕ 101 Bible Online

Псаломтӕ 101 - Библи: Сыгъдӕг bible

Псаломтӕ 101

¹Рыст адӕймаджы куывд, Дунедарӕджы раз йӕ зӕрдӕйы хъыгтӕ куы раргом кӕны, уӕд.

²О Дунедарӕг! Фехъус мын мӕ куывд, мӕ дзыназын Дӕм сыхъуысӕд.

³Ды Де ’ргом ма аздах мӕнӕй, мӕ хъыджы бон мӕм Дӕ хъус ӕрдар, куы Дӕм дзыназон — дзуапп мын ратт ӕвӕстиатӕй.

⁴Фӕздӕгау фӕивгъуыйынц мӕ бонтӕ, судзынц ме стджытӕ ӕхсидавау.

⁵Мӕ зӕрдӕ — цӕф, бахус ис кӕрдӕгау, хӕрды мӕт дӕр мӕ ферох ис.

⁶Мӕ фыр рыстӕй ӕз царм ӕмӕ стджытӕ фестадтӕн,

⁷ӕдзӕрӕг быдыры цӕрӕг уыгау сдӕн, мӕ рӕстӕг уыйау хӕлддзӕгтыл ӕрвитын.

⁸Уӕлхӕдзары иунӕгӕй фӕбады цъиу, ӕз уыйау ныр фынӕй нӕ кӕнын, бадын.

⁹Фауынц мӕ ӕрвылбон ме знӕгтӕ, кӕнынц хынджылӕг, ӕлгъитынц искӕй мӕ номӕй.

¹⁰Хӕрын фӕнык ӕз дзулау, мӕ дон цӕссыгтимӕ схӕццӕ.

¹¹Дӕ маст у уый, ӕз бавзӕрстон Дӕ азар, бӕрзонд мӕ систай, стӕй мӕ фехстай зӕхмӕ.

¹²Мӕ царды бонтӕ ивгъуыйынц аууонау, ӕз баруадтӕн кӕрдӕгау.

¹³Дунедарӕг, Ды ӕнусон дӕ, ӕмӕ Дӕ кой фӕлтӕрӕй фӕлтӕрмӕ нӕ фесӕфдзӕн.

¹⁴Ды растдзынӕ ӕмӕ Сионӕн фӕтӕригъӕд кӕндзынӕ, ныххатыр кӕнын афон ын ӕрцыд, ӕрхӕццӕ ис йӕ рӕстӕг.

¹⁵Суанг йӕ дуртӕ дӕр ын бауарзтой Дӕ цагъартӕ, йӕ рыг дӕр нын сси зынаргъ.

¹⁶Дунедарӕджы номӕй адӕмтӕ тӕрсдзысты, ӕппӕт зӕххон паддзӕхтӕ риздзысты Дӕ кады раз.

¹⁷Уымӕн ӕмӕ Дунедарӕг рацараздзӕни Сион, Йӕ кадимӕ нӕм равдисдзӕни Йӕхи.

¹⁸Ӕнӕбонты куывд фехъусдзӕни Уый, нӕ атигъ кӕндзӕни Йӕхи сӕ куывдтытыл.

¹⁹Ног фӕлтӕртӕн уыдӕттӕ ныффысдзысты, фидӕны фӕлтӕр Дунедарӕджы стаудзысты.

²⁰Уымӕн ӕмӕ Уый Йӕ уаз бӕрзӕндӕй ракасти, Дунедарӕг зӕхмӕ ’ркасти уӕларвӕй —

²¹ахст адӕмӕн фехъуыста сӕ куывд, мӕлинӕгтӕн сӕрибар радта,

²²цӕмӕй Сионы Дунедарӕджы ном хъусын кӕной, цӕмӕй Йын скад кӕной Йерусалимы —

²³адӕмтӕ ’мӕ паддзахӕдтӕ куы ’рӕмбырд уой Дунедарӕгӕн лӕггад кӕнынмӕ, уӕд.

²⁴Мӕ тых мын басаста Дунедарӕг мӕ фӕндагыл, фӕкъаддӕр мын кодта мӕ царды бонтӕ.

²⁵Ӕз загътон: «О мӕ Хуыцау! Мӕ цард мын ма аскъуыйын кӕн ӕрдӕгыл, Дӕ азтӕ Дӕуӕн — фӕлтӕрӕй фӕлтӕрмӕ.

²⁶Ды незаманты зӕххӕн ӕрӕвӕрдтай бындур, Дӕ къухӕй конд у арв дӕр.

²⁷Уыдонӕн ӕрцӕудзӕнис кӕрон, Ды та уыдзынӕ мыггагмӕ; уыдон алӕзӕрдзысты дарӕсау, пӕлӕзау сӕ раивдзынӕ Ды, ӕмӕ нал уыдзӕни сӕ кой дӕр.

²⁸Ды та ӕнӕивгӕ уыдзынӕ, Дӕ азтӕн нӕй кӕрон.

²⁹Дӕ цагъарты цот цӕрдзысты, ӕмӕ сӕ мыггаг нӕ сыскъуыйдзӕн Дӕ цӕсгомы раз».