Read Библи: Сыгъдӕг Псаломтӕ 113 Bible Online

Псаломтӕ 113 - Библи: Сыгъдӕг bible

Псаломтӕ 113

¹Израил Мысырӕй куы рацыдысты, Йаковы байзӕддӕгтӕ — ӕцӕгӕлӕтты ’хсӕнӕй,

²уӕд Иудӕ Дунедарӕджы уаз цӕрӕн сси, Израил баци Йӕ исбон.

³Денджыз сӕ уындӕй фӕлыгъди, Иорданы цӕугӕдон фӕстӕрдӕм фӕцыди.

⁴Хӕхтӕ схъиудтытӕ кодтой фырытау, къуылдымтӕ — уӕрыччытау.

⁵Цы кӕныс, денджыз, кӕдӕм лидзыс? Цы кӕныс, Иордан, фӕстӕмӕ цӕмӕн раздӕхтӕ?

⁶Цы схъиут, хӕхтӕ, фырытау, къуылдымтӕ — уӕрыччытау?

⁷Нырриз, зӕхх, Дунедарӕджы, Йаковы Хуыцауы раз!

⁸Уый айнӕг фестын кӕны цад, дур — донгуырӕн.

⁹Мах нӕ, Дунедарӕг, мах нӕ, фӕлӕ Дӕ ном скадджын кӕн, Дӕ хорзӕхы, Дӕ ӕцӕгады сӕраппонд!

¹⁰Цӕмӕн хъуамӕ дзурой муртаттӕгтӕ: «Кӕм ис уӕдӕ сӕ Хуыцау?»

¹¹Нӕ Хуыцау уӕлӕрвты ис, Уый цы бафӕнда, ӕмӕ цы нӕ бакӕндзӕн!

¹²Уыдонӕн та сӕ гуымирытӕ — ӕвзист ӕмӕ сыгъзӕринӕй, адӕймаджы къухтӕй конд:

¹³дзых ис, фӕлӕ нӕ дзурынц, цӕстытӕ ис, фӕлӕ нӕ уынынц;

¹⁴хъустӕ ис, фӕлӕ нӕ хъусынц, ӕмбудӕнтӕ ис, фӕлӕ не ’мбудынц;

¹⁵къухтӕ ис, фӕлӕ не ’нкъарынц, къӕхтӕ ис, фӕлӕ нӕ цӕуынц; сӕ хъӕлӕсӕй иунӕг мыр дӕр нӕ сыхъуысы.

¹⁶Чи сӕ аразы ӕмӕ сӕ ныфс кӕмӕн сты, уыдон дӕр уыдоны хуызӕн суӕнт!

¹⁷Израил, уӕ зӕрдӕ дарут Дунедарӕгыл! — Уый у махӕн не ’ххуысгӕнӕг, нӕ уарт.

¹⁸Аароны байзӕддӕгтӕ, уӕ зӕрдӕ дарут Дунедарӕгыл! — Уый у махӕн не ’ххуысгӕнӕг, нӕ уарт.

¹⁹Дунедарӕджы тас кӕй ис, уыдон! Уӕ зӕрдӕ дарут Дунедарӕгыл! — Уый у махӕн не ’ххуысгӕнӕг, нӕ уарт.

²⁰Дунедарӕг нӕ рох кӕны мах ӕмӕ нын арфӕ кӕны: арфӕ кӕны Израилы байзӕддагӕн, арфӕ кӕны Аароны фӕдонтӕн.

²¹Арфӕ кӕны Уый, Дунедарӕджы тас кӕй ис, уыдонӕн се ’ппӕтӕн дӕр — стырӕй, чысылӕй.

²²Дунедарӕг уын сбирӕ кӕнӕд уӕ мыггаг — уӕхицӕн дӕр ӕмӕ уӕ цотӕн дӕр.

²³Арфӕгонд стут сымах Дунедарӕгӕй, арв ӕмӕ зӕхх Сфӕлдисӕгӕй.

²⁴Арв Дунедарӕджы у, зӕхх та Уый адӕмӕн саккаг кодта.

²⁵Дунедарӕджы мӕрдтӕ не стауынц, ингӕнмӕ ныххизджытӕ Йын кады зарӕг нӕ сисынц,

²⁶фӕлӕ мах арфӕ кӕндзыстӕм Дунедарӕгӕн, абон дӕр ӕмӕ мыггагмӕ дӕр. Алелуйа!