Read Библи: Сыгъдӕг Псаломтӕ 117 Bible Online

Псаломтӕ 117 - Библи: Сыгъдӕг bible

Псаломтӕ 117

¹Арфӕ кӕнут Дунедарӕгӕн, уымӕн ӕмӕ Уый хӕрзаудӕг у, Йӕ хорзӕх мыггагмӕ у.

²Зӕгъӕд Израил: «Йӕ хорзӕх мыггагмӕ у».

³Зӕгъӕд Аароны хӕдзар: «Йӕ хорзӕх мыггагмӕ у».

⁴Дунедарӕгӕн кад чи кӕны, уыдон зӕгъӕнт: «Йӕ хорзӕх мыггагмӕ у».

⁵Мӕ тыхсты рӕстӕг Дунедарӕгмӕ сдзынӕзтон, ӕмӕ мӕ Уый ракодта тыгъдадмӕ.

⁶Дунедарӕг мӕ фарс у, ӕмӕ ӕз нӕ фӕтӕрсдзынӕн: цы мын ракӕндзӕн адӕймаг?

⁷Дунедарӕг мын ӕххуыс кӕны, ӕмӕ ме знӕгтӕм ӕдӕрсгӕйӕ кӕсдзынӕн.

⁸Адӕймагӕй ныфс ӕвӕрыны бӕсты Дунедарӕгыл зӕрдӕ дарын — хуыздӕр.

⁹Барджынтӕй ныфс ӕвӕрыны бӕсты Дунедарӕгыл зӕрдӕ дарын — хуыздӕр.

¹⁰Ӕрӕмбырд мыл сты ӕппӕт адӕмтӕ, фӕлӕ сӕ Дунедарӕджы номӕй басастон;

¹¹ӕртыхстысты мыл, ӕрӕмбырд мыл сты, фӕлӕ сӕ Дунедарӕджы номӕй басастон.

¹²Ӕртыхстысты мыл мыдыбындзытау, фӕлӕ сындзкъутӕры артау бамынӕг сты: Дунедарӕджы номӕй сӕ басастон.

¹³Куыд ахауон, афтӕ мӕ фесхуыстой, фӕлӕ мӕ Дунедарӕг фӕцудын нӕ бауагъта.

¹⁴Дунедарӕг — мӕ тых, мӕ зарӕг; мӕ ирвӕзынгӕнӕг Уый у.

¹⁵Рӕстудты цатыртӕй хъуысынц цин ӕмӕ уӕлахизы хъӕртӕ, Дунедарӕг Йӕ рахиз къухы хъомыс равдыста!

¹⁶Дунедарӕджы рахиз къух бӕрзонд у, Дунедарӕджы рахиз къух ӕвдисы Йӕ хъару!

¹⁷Нӕ, ӕз нӕ амӕлдзынӕн, мӕ удӕгасӕй хъусын кӕндзынӕн Дунедарӕджы хъуыддӕгтӕ.

¹⁸Карз мӕ бафхӕрдта Дунедарӕг, фӕлӕ мӕ мӕлӕты къухмӕ нӕ радта.

¹⁹Рӕстады кулдуар мын бакӕнут — ӕз бацӕуон ӕмӕ Дунедарӕджы сыстауон.

²⁰Мӕнӕ Дунедарӕджы кулдуар, рӕстгӕнджытӕ йыл бахиздзысты.

²¹Стауын Дӕ, уымӕн ӕмӕ мӕ фехъуыстай, мӕ ирвӕзынгӕнӕг сдӕ.

²²Аразджытӕ цы дурыл нӕ баввӕрсыдысты, уый сси фисыны сӕйраг дур:

²³уый Дунедарӕг сарӕзта, ӕмӕ уыцы диссаг мах нӕ цӕстӕй уынӕм.

²⁴Ацы бон Дунедарӕг сфӕлдыста: цин кӕнӕм, скӕнӕм бӕрӕгбон!

²⁵Дунедарӕг, фервӕзын нӕ кӕн! Дунедарӕг, баххуыс кӕн!

²⁶Арфӕгонд уӕд Дунедарӕджы номӕй ӕрцӕуӕг! Арфӕ уын кӕнӕм Дунедарӕджы хӕдзарӕй!

²⁷Хуыцау у Дунедарӕг, ӕмӕ нӕ Уый срухс кодта Йӕ рухсӕй. Сбӕттут бӕндӕнтӕй бӕрӕгбоны нывонды, ӕрбахӕссут ӕй нывондхӕссӕнмӕ.

²⁸Ды мӕ Хуыцау дӕ, ӕмӕ Дын кад кӕндзынӕн, Ды мӕ Хуыцау дӕ, ӕмӕ Дӕ стаудзынӕн.

²⁹Кад кӕнут Дунедарӕгӕн, уымӕн ӕмӕ Уый хӕларзӕрдӕ у, Йӕ хорзӕх ӕнусон у.