Read Библи: Сыгъдӕг Псаломтӕ 131 Bible Online

Псаломтӕ 131 - Библи: Сыгъдӕг bible

Псаломтӕ 131

¹Уӕлвонг Кувӕндонмӕ цӕуджыты зарӕг. О Дунедарӕг, ӕрымыс Давиды, ӕрымыс ын йӕ бирӕ хъизӕмӕрттӕ —

²куыд басомы кодта Дунедарӕгӕн, дзырд куыд радта Йаковы Хъомысджынӕн:

³«Мӕ цатырмӕ нӕ бацӕудзынӕн, мӕ хуыссӕны не ’рхуысдзынӕн,

⁴мӕ цӕстытӕ не ’рцъынд кӕндзынӕн, мӕ уӕлтъыфылтӕй хуыссӕг фӕсурдзынӕн,

⁵цалынмӕ Дунедарӕгӕн, Йаковы Хъомысджынӕн цӕрӕн бынат ссарон, уӕдмӕ».

⁶Йӕ кой уымӕн фехъуыстам Ефрафӕйы, Йаары быдырты йӕ ссардтам.

⁷Фӕцӕуӕм Йӕ цӕрӕны размӕ, Бакувӕм Ын Йӕ къахӕвӕрӕны цур!

⁸О Дунедарӕг, ӕрцу Де ’нцойады бынатмӕ, Ды ӕмӕ Дӕ хъомысы Чырын.

⁹Дӕ сауджынтӕ сӕхи сфӕлындӕнт рӕстадӕй! Дӕ иузӕрдионтӕн сӕ цины хъӕр райхъуысӕд!

¹⁰Давиды, Дӕ цагъары, сӕраппонд, ма атигъ кӕн Дӕхи Дӕ байсӕрстыл!

¹¹Дунедарӕг Давидӕн ӕнувыдӕй расомы кодта ӕмӕ никуы аивдзӕни Йӕ сомы: «Дӕ паддзахы бадӕны дын сбадын кӕндзынӕн дӕ байзӕддаджы.

¹²Мӕ фидыдыл Мын иузӕрдион куы уой, Мӕ фӕдзӕхстытӕ Мын куы ӕххӕст кӕной, уӕд-иу уыдоны байзӕддаг дӕр мыггагӕй мыггагмӕ дӕ паддзахы бадӕны ӕрбаддзысты».

¹³Дунедарӕг равзӕрста Сионы сахар, Йӕхицӕн дзы цӕрӕнбынат скодта:

¹⁴«Мӕнӕ Мӕ цӕрӕн ран мыггагмӕ! Ӕрцӕрдзынӕн дзы, уымӕн ӕмӕ йӕ уарзын!

¹⁵Йӕ хойраджы бӕркадӕн ын раарфӕ кӕндзынӕн, йӕ мӕгуырты йын бафсаддзынӕн дзулӕй.

¹⁶Йӕ сауджынты йын ирвӕзындзинадӕй сфӕлынддзынӕн, уадз ӕмӕ цин кӕной йӕ сыгъдӕджытӕ.

¹⁷Уым Давидӕн сбирӕ кӕндзынӕн йӕ хъомыс, Мӕ байсӕрст паддзахӕн йӕ цырагъ ахуыссын нӕ бауадздзынӕн.

¹⁸Йӕ фыдгулты йын фӕхудинаг кӕндзынӕн, уымӕн та йӕ сӕрыл тӕмӕнтӕ калдзӕни кады худ».