Read Библи: Сыгъдӕг Псаломтӕ 143 Bible Online

Псаломтӕ 143 - Библи: Сыгъдӕг bible

Псаломтӕ 143

¹Давиды псалом. Арфӕгонд у Дунедарӕг, мӕ къӕдзӕх — мӕ къухтӕ мын цӕттӕ кӕны хӕстмӕ, ме ’нгуылдзтӕ — хӕцӕнгарзыл хӕцынмӕ.

²Уый у мӕ уарзӕгой Хуыцау, мӕ фидар, ме ’мбӕхсӕн, мӕ ирвӕзынгӕнӕг, мӕ уарт, ӕз мӕ зӕрдӕ Ууыл дарын; мӕ адӕмы мын бакодта мӕ дӕлбар.

³О Дунедарӕг, цы у адӕймаг, ӕмӕ йыл Ды аудай? Цы у лӕджы фырт, ӕмӕ йыл Ды бамӕт кӕнай?

⁴Адӕймаг у дымгӕйы ӕрбадымдау, йӕ царды бонтӕ аууонау ӕрбайсӕфынц.

⁵О Дунедарӕг, ӕркъул кӕн уӕлӕрвтӕ ӕмӕ ӕрхиз дӕлӕмӕ; бандзӕв хӕхтыл, ӕмӕ сӕ фӕздӕг скӕла.

⁶Мӕ фыдгултыл мын ныффалгӕрон кӕн арвӕрттывдтӕй, лидзӕг сӕ фӕкӕн Дӕ фаттӕй.

⁷Бӕрзондӕй ӕрдар Дӕ къух ӕмӕ мӕ фервӕзын кӕн хуыдымӕй, байс мӕ ӕцӕгӕлӕтты къухтӕй!

⁸Уыдонӕн сӕ дзыхӕй рацӕуы мӕнг ныхас, сӕ рахиз къух мӕнгарддзинадӕй — йедзаг.

⁹О Хуыцау, ног зарӕг азардзынӕн Дӕ кадӕн, ӕрцӕгъддзынӕн Дын дӕстӕнонӕй!

¹⁰Ды фервӕзын кӕныс паддзӕхты, Дӕ цагъар Давиды бахизыс мӕлӕтхӕссӕг кардӕй.

¹¹Фервӕзын мӕ кӕн, ӕцӕгӕлӕтты къухтӕй мӕ байс! Уыдонӕн сӕ дзыхӕй рацӕуы мӕнг ныхас, сӕ рахиз къух мӕнгарддзинадӕй — йедзаг.

¹²Нӕ фырттӕ уадз ӕмӕ фестой, ӕвзонгӕй бӕрзонд чи фӕцыд, уыцы бӕлӕстау, нӕ чызджытӕ та — галуаны нывӕфтыд цӕджындзтау.

¹³Нӕ хордӕттӕ семыдзаг бауӕнт алыхуызон хоры бӕркадӕй, нӕ фыстӕ мингай уӕрыччытӕ уадзӕнт, дӕсгай минтӕй хизӕнт нӕ сӕрвӕтты.

¹⁴Хӕрзхаст уӕнт нӕ галтӕ, давӕг сӕм ӕввахс куыннӕ цӕуа, сӕфгӕ дӕр дзы куыннӕ кӕна; ма хъуысӕд хъарӕг нӕ уынгты.

¹⁵Тӕхудиаг сты уыцы адӕм, ахӕм арфӕ кӕуыл ӕрцыд! Тӕхудиаг сты уыцы адӕм, Дунедарӕг сӕ Хуыцау кӕмӕн у!