Read Библи: Сыгъдӕг Псаломтӕ 21 Bible Online

Псаломтӕ 21 - Библи: Сыгъдӕг bible

Псаломтӕ 21

¹Зарӕггӕнджыты къорды разамонӕгӕн. «Сӕуӕхсид»-ы зӕлтӕм гӕсгӕ. Давиды псалом.

²Мӕ Хуыцау! Мӕ Хуыцау! Цӕмӕн мӕ ныууагътай? Куыд дард дӕ мӕнӕй, куыннӕ мӕ фервӕзын кӕныс, куыннӕ Дӕм хъуысы мӕ дзыназын?

³Мӕ Хуыцау, хъӕрахст Дӕм кӕнын бонӕй, фӕлӕ мӕ нӕ хъусыс; ӕхсӕв дӕр ӕрдиаг кӕнын, фӕлӕ мӕ сабыргӕнӕг нӕй.

⁴Уаз дӕ Ды, Израилы кады зарджыты астӕу Дӕ паддзахы бадӕны бадыс.

⁵Нӕ фыдӕлтӕ сӕ зӕрдӕ дардтой Дӕуыл, ӕмӕ-иу сӕ Ды бахызтай бӕллӕхӕй.

⁶Дӕумӕ-иу дзынӕзтой ӕмӕ-иу фервӕзтызты, сӕхи дыл фӕдзӕхстой ӕмӕ никуы фӕфыдӕнхъӕл сты.

⁷Ӕз та цыма адӕймаг нӕ, фӕлӕ уаллон дӕн: адӕмӕн — фидиссаг, дзыллӕйӕн — ӕлгъаг.

⁸Чи мӕ уыны, уыдон мыл худынц, сӕ сӕртӕ банкъусынц, бахудынц былысчъилӕй:

⁹«Дунедарӕгыл дардта йӕ зӕрдӕ — фервӕзын ӕй кӕнӕд ныр! Кӕд Ын афтӕ адджын у, уӕд ӕй Уый бахизӕд!»

¹⁰Ды мӕ райстай мӕ мады гуыбынӕй, хъахъхъӕдтай мӕ, хъӕбысы ма куы уыдтӕн, уӕд.

¹¹Мӕ райгуырынӕй Дӕуыл фӕдзӕхст дӕн, мады гуыбыны ма куы уыдтӕн, уӕдӕй фӕстӕмӕ Ды мӕ Хуыцау дӕ.

¹²Ма адард у мӕнӕй, — мӕ хъизӕмары бон ӕрӕввахс, ӕххуысгӕнӕг та нӕй.

¹³Галты рӕгъау ӕртыхсти мӕ алыварс, Башаны хӕрзхаст галтӕ мыл ӕрхъула кодтой.

¹⁴Ныххӕлиу мӕм кодтой сӕ дзыхтӕ, йӕ амӕттаджы аскъуыдтӕ кӕнынмӕ цӕттӕ ӕмӕ рыхӕг домбайау.

¹⁵Чи ӕркалди, уыцы донӕй уӕлдай нал дӕн, ме стджытӕ кӕрӕдзиуыл нал хӕцынц, мӕ зӕрдӕ мыдадзау батади мӕ риуы.

¹⁶Хус ӕлыгау баруади мӕ хъару, ме ’взаг мӕ комарынгыл баныхӕст, — мӕрдон сыджыты мӕ нывӕрдтай Ды.

¹⁷Ӕрхъула мыл кодтой куыйтӕ, знӕт ӕрдонг мӕ алыварс ӕртыхсти, ныррӕхуыстой мын мӕ къӕхтӕ ӕмӕ мӕ къухтӕ.

¹⁸Царм ӕмӕ стджытӕ фестадтӕн. Уыдон та мӕм кӕсынц ӕмӕ мыл сӕхи ирхӕфсынц.

¹⁹Мӕ дарӕс мын се ’хсӕн уарынц, мӕ уӕлӕдарӕсыл хӕлттӕ ’ппарынц.

²⁰О Дунедарӕг, ма адард у мӕнӕй! Ды — мӕ хъару, ӕххуысмӕ мӕм фӕтагъд кӕн!

²¹Мӕ уд мын бахиз кардӕй, мӕ цард мын бахъахъхъӕн куыйтӕй.

²²Домбайы комӕй, хъӕддаг галты сыкъатӕй мӕ фервӕзын кӕн!

²³Ӕз Дын Дӕ ном фехъусын кӕндзынӕн ме ’фсымӕртӕн, Дӕуӕй ӕппӕлдзынӕн адӕмы ’хсӕн:

²⁴«Дунедарӕгӕй чи тӕрсы, уыдон, скад Ын кӕнут! Сыстаут Ӕй, Йаковы фӕдонтӕ! Аргъуыц кӕнут Йӕ разы, Израилы байзӕддӕгтӕ, —

²⁵Уый ӕнӕввӕрсон нӕ уыди мӕгуырыл, ӕлгъгӕнгӕ нӕ касти ӕфхӕрд адӕймаджы хъизӕмармӕ, Йӕхи йыл нӕ атигъ кодта; Йӕ цӕсгом дзы нӕ бамбӕхста; ӕххуысмӕ Йӕм куы дзынӕзта, уӕд ӕй фехъуыста».

²⁶Стыр ӕмбырды ӕппӕлдзынӕн Дӕуӕй, чи Дӕ тӕрсы, уыдоны раз сӕххӕст кӕндзынӕн мӕ сомытӕ.

²⁷Мӕгуыртӕ хӕрдзысты ӕмӕ бафсӕддзысты; Дунедарӕджы чи агуры, уыдон Ӕй скадджын кӕндзысты! Цардӕгас уӕнт уӕ зӕрдӕтӕ ӕнустӕм!

²⁸Ӕрымысдзысты Дунедарӕджы ӕмӕ Йӕм раздӕхдзысты зӕххы алы кӕрӕттӕй; Дӕ разы ӕрзоныг кӕндзысты муртаттӕгты ӕппӕт знӕмтӕ,

²⁹уымӕн ӕмӕ паддзахы бартӕ Дунедарӕджы къухы сты, адӕмтыл Йӕ бар цӕуы.

³⁰Хӕрдзысты ӕмӕ Йын кад кӕндзысты ӕппӕт зӕххы цардӕфсӕст бонджынтӕ; ӕрзоныг кӕндзысты Йӕ разы, сыджытмӕ чи цӕуы, йӕ удыл хӕцыны хъару кӕмӕ нӕй, уыдон се ’ппӕт дӕр.

³¹Фӕстагӕттӕ йын лӕггад кӕндзысты ӕмӕ Дунедарӕджы адӕмы ном хӕсдзысты мыггагмӕ.

³²Дунемӕ чи фӕзына, уыцы адӕмӕн ракӕндзысты Йӕ рӕстады, Йӕ хъуыддӕгты кой.