Read Библи: Сыгъдӕг Псаломтӕ 29 Bible Online

Псаломтӕ 29 - Библи: Сыгъдӕг bible

Псаломтӕ 29

¹Давиды псалом. Зарӕг Кувӕндон срухс кӕныны бон.

²Стауын Дӕ, Дунедарӕг — ингӕнӕй мӕ сластай, ме знӕгты мыл уӕлахиз кӕнын нӕ бауагътай.

³Дунедарӕг, мӕ Хуыцау! Скуывтон Дӕм, ӕмӕ мӕ сдзӕбӕх кодтай.

⁴Мӕ уд мын ракодтай мӕрдтыбӕстӕй, райгас мӕ кодтай, ингӕнмӕ куыннӕ ныххизон, афтӕ.

⁵Зарут Дунедарӕгӕн, Йӕ иузӕрдионтӕ, сыстаут Ын Йӕ уаз ном,

⁶уымӕн ӕмӕ иу уысм ахӕссы Йӕ маст, Йӕ хорзӕх та — цӕрӕнбонты. Изӕрыгон райхъуысы кӕуын, райсомӕй та циндзинад фӕзыны.

⁷Ӕнӕмӕтӕй куы цардтӕн, уӕд дзырдтон: «Ӕз никуы фӕкӕлдзынӕн».

⁸Дунедарӕг, Дӕ хӕрзаудӕн мыл ӕмбӕлди, ӕмӕ мӕ Ды сфидар кодтай хохау. Фӕлӕ мӕ ныр Де ’ргом аздӕхтай, ӕмӕ мыл катай бахӕцыд.

⁹Дзынӕзтон Дӕм, о Дунедарӕг, лӕгъстӕ кодтон мӕ Дунедарӕгӕн:

¹⁰«Цы пайда ис мӕ мӕлӕтӕй, ингӕнмӕ кӕй бацӕудзынӕн, уымӕй? Зӕххы рыг Дын скад кӕндзӕни? Дӕ иузӕрдионы кой ракӕндзӕни?

¹¹Дунедарӕг, фехъус мӕ, ныббар мын! Баххуыс мын кӕн, Дунедарӕг!»

¹²Ӕмӕ мын Ды мӕ хъыг раивтай цинӕй, мӕ сӕхъис мын раластай ӕмӕ мыл бӕрӕгбоны дарӕс скодтай.

¹³Ӕнӕрӕнцойӕ Дӕ стаудзӕни мӕ зӕрдӕ. Дунедарӕг, мӕ Хуыцау, Стаудзынӕн Дӕ ӕнусмӕ.