Read Библи: Сыгъдӕг Псаломтӕ 30 Bible Online

Псаломтӕ 30 - Библи: Сыгъдӕг bible

Псаломтӕ 30

¹Зарӕггӕнджыты къорды разамонӕгӕн. Давиды псалом.

²Дунедарӕг, Дӕуыл фӕдзӕхсын мӕхи — нӕ фӕхудинаг уыдзынӕн мыггагмӕ! Равдис Дӕ рӕстдзинад, фервӕзын мӕ кӕн!

³Дӕ хъус мӕм ӕрдар ӕмӕ мӕм ӕххуысмӕ фӕтагъд кӕн. Фест мӕ къӕдзӕх, мӕ хъахъхъӕнӕг мӕсыг, мӕ ирвӕзынгӕнӕг.

⁴Ды — мӕ къӕдзӕх, мӕ фидар гӕнах, размӕ мӕ кӕн Дӕ номы сӕраппонд, раст фӕндагыл мӕ сараз.

⁵Сусӕгӕй мын мӕ размӕ ахсӕн хыз сӕвӕрдтой — фервӕзын мӕ кӕн! Ды — мӕ фидар мӕсыг.

⁶Дӕ къухмӕ Дын дӕттын мӕ уд. О Дунедарӕг, иузӕрдион Хуыцау, фервӕзын мӕ кӕн!

⁷Мӕнгхуыцӕуттӕм кувджытӕ мын сты ӕнӕуынон, ӕз Дунедарӕгыл дарын мӕ зӕрдӕ.

⁸Цин кӕндзынӕн Дӕ хорзӕхыл, уымӕн ӕмӕ мын Ды ӕркастӕ мӕ бӕллӕхмӕ, базыдтай мын мӕ зындзинад.

⁹Знаджы къухтӕм мӕ нӕ радтай, слӕууын мӕ кодтай мӕ къӕхтыл, уынгӕг ранӕй мӕ ракодтай.

¹⁰Батӕригъӕд мын кӕн, Дунедарӕг — уынгӕджы бон мыл акодта, фыр хъизӕмарӕй мӕ цӕстытӕ дудынц, судзынц мӕ уд ӕмӕ мӕ буар.

¹¹Фыр удхарӕй баруадтӕн, мӕ азтӕ дзыназгӕйӕ ӕрвитын, мӕ тӕригъӕдтӕй басасти мӕ хъару, бахус сты ме стджытӕ.

¹²Ме знӕгтӕ мӕ хынджылӕг кӕнынц, суанг мыл мӕ сыхӕгтӕ дӕр худынц. Ме ’рдхӕрдтыл мӕ уындӕй тас бахӕцы, куы мӕ ауынынц, уӕд лидзӕг фӕвӕййынц.

¹³Мардау ферох дӕн алкӕмӕй, саст дурынау сдӕн;

¹⁴алырдыгӕй дам-думтӕ хъусын. Мӕ алыварс — тас, адӕм мӕ ныхмӕ сарӕзтой фыдвӕнд, амарынмӕ мӕ хъавынц.

¹⁵Ӕз та мӕ зӕрдӕ дарын Дӕуыл, Дунедарӕг! Ӕз зӕгъын: «Ды мӕ Хуыцау дӕ».

¹⁶Мӕ цард Дӕ къухы ис, фервӕзын мӕ кӕн ме знӕгтӕй, мӕ фӕдылзилджытӕй.

¹⁷Дӕ цагъармӕ рухс цӕстӕй ракӕс, фервӕзын мӕ кӕн Дӕ хорзӕхы фӕрцы.

¹⁸Дунедарӕг, Дӕумӕ кӕй сидын, уый тыххӕй, уадз, ӕгады бынаты ма баззайон! Ӕнӕхуыцӕуттӕ фӕхудинаг уӕнт, мӕрдтыбӕсты ныхъхъус уӕнт!

¹⁹Багомыг уӕнт мӕнгӕвзӕгтӕ, рӕстгӕнӕгыл сӕрбӕрзондӕй, ӕлгъгӕнгӕйӕ, цъыф чи калы, уыдон.

²⁰Чи Дӕ тӕрсы, Дӕуыл йӕ зӕрдӕ чи дары, уыдонӕн цас ӕмӕ цас хӕрзтӕ балӕвар кӕныс ӕппӕт адӕмы раз!

²¹Дӕ базыры бын сӕ хъахъхъӕныс адӕмы фыдӕхӕй, алы даутӕй сӕ бахизыс.

²²Арфӕйаг у Дунедарӕг — знӕгтӕ цы сахарыл ӕртыхстысты, уым мын Йӕ диссаджы хорзӕх балӕвар кодта!

²³Ӕз мӕ фыр тыхстӕй ахъуыды кодтон: «Атигъ мыл кодтай Дӕхи». Фӕлӕ Дӕм куы скуывтон, уӕд мын Ды фехъуыстай мӕ лӕгъстӕ.

²⁴Уарзут Дунедарӕджы, Йе ’ппӕт рӕстудтӕ. Дунедарӕг иузӕрдионты хъахъхъӕны, сӕрыстырты та бафхӕры дывӕрӕй.

²⁵Дунедарӕгыл йӕ зӕрдӕ чи дары, уыдон, фидар ут, ма асӕттӕд уӕ ныфс!