Read Библи: Сыгъдӕг Псаломтӕ 44 Bible Online

Псаломтӕ 44 - Библи: Сыгъдӕг bible

Псаломтӕ 44

¹Зарӕггӕнджыты къорды разамонӕгӕн. Мелоди «Хъоппӕджытӕ»-йы зӕлтӕм гӕсгӕ. Корахы фыртты зондамонӕн псалом. Уарзондзинады зарӕг.

²Мӕ зӕрдӕйӕ рацыдысты фарны дзырдтӕ. Мӕ зарӕг — Паддзахыл. Ме ’взаг — дӕсны фыссӕджы сис.

³Ды дӕ ӕппӕт адӕмӕй хуыздӕр, Дӕ дзыхӕй фарн кӕлы, — Хуыцау Дын арфӕ ракодта ӕнусмӕ.

⁴Дӕ кард Дӕ фарсыл ӕрбабӕтт, Хъомысджын, Дӕ уӕлӕ ’ркӕн Дӕ кад ӕмӕ Дӕ хъомыс,

⁵Дӕ уӕрдоны ӕрбад — ӕцӕгад, сӕрныллӕгдзинад ӕмӕ рӕстдзинады сӕраппонд. Дӕ хъомысджын къух стыр хъуыддӕгтӕ саразӕд.

⁶Дӕ фӕттӕ — цыргъ, ӕрсӕтдзысты Дӕ разы адӕмтӕ. Паддзахы знӕгтӕн асасти сӕ ныфс.

⁷Хуыцау, Дӕ паддзахы бадӕн у ӕнусон, Дӕ Паддзахады лӕдзӕг — рӕстдзинады лӕдзӕг.

⁸Ды бауарзтай рӕстдзинад, фыддзинад Дын ӕнӕуынон у. Уымӕ гӕсгӕ Дӕу Хуыцау, Дӕ Хуыцау, демӕ чи ис, уыдонӕй уӕлдай циндӕттӕг сойӕ байсӕрста.

⁹Дӕ дарӕс ӕнӕхъӕнӕй миррӕ, алой ӕмӕ кассийы хӕрздӕф кӕны, пылыстӕгӕй арӕзт галуаны Дӕу хъӕлдзӕг кӕнынц дыууадӕстӕноны зӕлтӕ.

¹⁰Дӕ кадджын фӕсдзӕуинты ’хсӕн — паддзахы чызджытӕ, ус-паддзах офираг сыгъзӕрины фӕлыстӕй ӕрлӕууыди Дӕ фарсмӕ.

¹¹Байхъус, чызг, кӕс ӕмӕ хъус лӕмбынӕг, ферох кӕн дӕ адӕмы, дӕ фыды хӕдзар.

¹²Паддзах бабӕлдзӕни дӕ рӕсугъддзинадмӕ; Уый у дӕ Бардарӕг, ӕмӕ Йын бакув.

¹³Тиры чызг ӕд лӕвӕрттӕ, стӕй адӕмӕн сӕ хъӕздыгдӕртӕ агурдзысты Дӕ хорзӕх.

¹⁴Паддзахы чызгӕн йӕ намыс — йӕ уды фидауц, йӕ дарӕс — сыгъзӕринӕй нывӕфтыд.

¹⁵Паддзахмӕ йӕ фӕкӕнынц нывӕфтыд дарӕсы, йӕ фӕдыл фӕцӕуынц йӕ чызгӕмбӕлттӕ.

¹⁶Хъӕлдзӕгӕй, цины хъӕртимӕ сӕ фӕхонынц, Паддзахы галуанмӕ фӕхизынц.

¹⁷Дӕ байзӕддӕгтӕ раивдзысты сӕ фыдӕлты, ӕгас зӕххыл сӕ сӕвӕрдзынӕ хицӕуттӕй.

¹⁸Дӕ ном сын рох кӕнын нӕ бауадздзынӕн фӕлтӕрӕй фӕлтӕрмӕ, адӕмтӕ Дӕ стаудзысты мыггагӕй мыггагмӕ.